કોંગ્રેસના વરિષ્ઠ નેતા રાહુલ ગાંધીએ રવિવારે દાવો કર્યો હતો કે સરકારની બેદરકારીને કારણે કોરોના વાયરસ મહામરી દરમિયાન 40 લાખ ભારતીયોના મોત થયા છે. તે જ સમયે, તેમણે ફરી એકવાર તમામ મૃતકોના પરિવારોને 4-4 લાખ રૂપિયા વળતરની માંગ કરી. રાહુલ ગાંધી દ્વારા ટ્વીટર પર ન્યૂયોર્ક ટાઈમ્સના રિપોર્ટનો સ્ક્રીનશોટ શેર કર્યો હતો, જેમાં દાવો કરવામાં આવ્યો હતો કે ભારત વિશ્વવ્યાપી કોવિડ ડેથ ડેટાને સાર્વજનિક કરવાના વર્લ્ડ હેલ્થ ઓર્ગેનાઈઝેશન (WHO)ના પ્રયાસોને અવરોધી રહ્યું છે.
કોંગ્રેસના પૂર્વ અધ્યક્ષે એક ટ્વિટમાં કહ્યું કે મોદીજી ન તો સાચું બોલે છે અને ન તો તેમને બોલવા દે છે. તેઓ હજુ પણ જૂઠું બોલે છે કે ઓક્સિજનના અભાવે કોઈનું મૃત્યુ થયું નથી! રાહુલે કહ્યું કે મેં પહેલા પણ કહ્યું હતું – કોવિડ દરમિયાન સરકારની બેદરકારીને કારણે પાંચ લાખ નહીં પરંતુ 40 લાખ ભારતીયોના મોત થયા છે. તેમણે કહ્યું કે મોદીજી તમારી ફરજ બજાવો – દરેક પીડિત પરિવારને 4 લાખ રૂપિયાનું વળતર આપો.
દેશમાં કોરોનાને કારણે થયેલા મૃત્યુની સંખ્યા પર ચર્ચા
નોંધનીય છે કે ભારતે શનિવારે દેશમાં કોવિડ-19 મૃત્યુ દરના અંદાજ માટે વિશ્વ આરોગ્ય સંસ્થાની પદ્ધતિ પર સવાલ ઉઠાવ્યા હતા. સરકારે કહ્યું હતું કે આટલા વિશાળ ભૌગોલિક કદ અને વસ્તી ધરાવતા દેશમાં મૃત્યુઆંકનો અંદાજ કાઢવા માટે આવા ગાણિતિક મોડલનો ઉપયોગ કરી શકાતો નથી.
કેન્દ્રીય આરોગ્ય મંત્રાલયે 16 એપ્રિલના રોજ પ્રકાશિત થયેલા ‘વૈશ્વિક COVID મૃત્યુની સંખ્યાને સાર્વજનિક બનાવવા માટે WHOના પ્રયાસને ભારત અવરોધે છે’ શીર્ષકવાળા ન્યૂયોર્ક ટાઇમ્સના લેખના જવાબમાં આ જણાવ્યું હતું. મંત્રાલયે કહ્યું કે વિશ્વ આરોગ્ય સંસ્થા દ્વારા અપનાવવામાં આવી રહેલી પદ્ધતિને લઈને દેશે ઘણી વખત પોતાની ચિંતા વ્યક્ત કરી છે.
આ પણ વાંચો : કોંગ્રેસ પાર્ટીની નારાજ હાર્દિક પટેલ જશે દિલ્હી, શું હાઈકમાન્ડ સમક્ષ કરશે ખુલાસા?
