ભારતીય ટીમે ગ્વાલિયરમાં રમાયેલી 3 મેચની T20 શ્રેણીની પ્રથમ મેચમાં બાંગ્લાદેશને 7 વિકેટે હરાવ્યું હતું. આ મેચમાં હાર્દિક પંડ્યા ચમક્યો હતો.

આ મેચમાં ઓલરાઉન્ડર પંડ્યાએ 16 બોલમાં અણનમ 39 રનની શાનદાર ઇનિંગ રમી હતી. દરમિયાન તેણે 2 સિક્સર અને 5 ફોર ફટકારીને જીત હાંસલ કરી હતી.

પોતાની ઈનિંગ દરમિયાન પંડ્યાએ એવો એરિયલ શોટ રમ્યો કે બધા દંગ રહી ગયા. પંડ્યાએ જોયા વગર અપર કટ શોટ રમીને બાઉન્ડ્રી ફટકારી હતી.

ભારતીય ઇનિંગ્સની 12મી ઓવરના ત્રીજા બોલ પર પંડ્યાએ આ શોટ માર્યો હતો. બોલર તસ્કીન અહેમદ પણ આ શાનદાર શોટ જોઈને આશ્ચર્યચકિત થઈ ગયો હતો.

આ પછી પંડ્યાએ પછીના બોલ પર ફરી ચોગ્ગો ફટકાર્યો. પંડ્યાએ પાંચમા બોલ પર સિક્સર ફટકારીને ભારતીય ટીમને 7 વિકેટે મેચ જીતાડવામાં મદદ કરી હતી.

મેચમાં ટોસ હારીને પ્રથમ બેટિંગ કરવા ઉતરેલી બાંગ્લાદેશની ટીમ માત્ર 127 રન જ બનાવી શકી હતી. જ્યારે ભારતીય ટીમે માત્ર 11.5 ઓવરમાં એટલે કે 71 બોલમાં મેચ જીતી લીધી હતી.