કેરળના એર્નાકુલમમાં રવિવારે સવારે એક કન્વેન્શન સેન્ટરમાં થયેલા પ્રચંડ બ્લાસ્ટને લઈને એક મોટો ખુલાસો થયો છે. ખ્રિસ્તીઓના ‘યહોવાહના સાક્ષીઓ’ સંપ્રદાયના સભ્ય હોવાનો દાવો કરતા એક વ્યક્તિએ કલામસેરીમાં એક ખ્રિસ્તી ધાર્મિક મેળાવડામાં અનેક વિસ્ફોટોની જવાબદારી લીધી હતી. તેણે સોશિયલ મીડિયા પર એક વીડિયો મેસેજ પણ પોસ્ટ કર્યો હતો. ઘણી ટીવી ચેનલો પર પણ તેનું પ્રસારણ થયું હતું. વીડિયોમાં તેણે પોતાની ઓળખ માર્ટિન તરીકે આપી હતી અને દાવો કર્યો હતો કે તેણે આવું એટલા માટે કર્યું કારણ કે સંસ્થાની શિખામણો દેશ માટે યોગ્ય નથી.
આ દરમિયાન ધાર્મિક જૂથના સભ્ય હોવાનો દાવો કરનાર અન્ય એક વ્યક્તિએ એક ટીવી ચેનલને જણાવ્યું કે આવી કોઈ વ્યક્તિ હાલમાં તેમની સંસ્થાનો ભાગ નથી. વિસ્ફોટોની જવાબદારી લેનાર વ્યક્તિએ કહ્યું કે બોમ્બ વિસ્ફોટો અને તેના પછીના ગંભીર પરિણામો વિશે બધાને ખબર હશે. આ વીડિયો હવે સોશિયલ મીડિયા પર ઉપલબ્ધ નથી. તેણે કહ્યું, મને ખબર નથી કે ત્યાં શું થયું, પરંતુ હું જાણું છું કે યોજના સફળ થઈ છે. હું આની સંપૂર્ણ જવાબદારી લઉં છું. વિડિયો બનાવ્યો જેથી બધાને કારણ ખબર પડે. હું આ વિડીયો ખુબ જ સમજી વિચારીને બનાવી રહ્યો છું. આ વ્યક્તિએ કહ્યું કે તે 16 વર્ષથી ‘યહોવાહના સાક્ષીઓ’ ખ્રિસ્તી ધાર્મિક જૂથનો ભાગ છે.
આ સંપ્રદાયની સ્થાપના 19મી સદીમાં અમેરિકામાં થઈ હતી. શરૂઆતમાં મેં તેને ગંભીરતાથી ન લીધું. લગભગ છ વર્ષ પહેલાં મને લાગ્યું કે તેઓ સારું કામ નથી કરી રહ્યા. આ સંસ્થા સારી નથી. તેમના ઉપદેશો દેશ માટે સારા નથી. તેણે દાવો કર્યો હતો કે તેણે સંસ્થાને તેના ઉપદેશોમાં સુધારો કરવા માટે ઘણી વખત કહ્યું હતું, પરંતુ તે આમ કરવા તૈયાર ન હતી. આવી સ્થિતિમાં મારી પાસે બીજો કોઈ વિકલ્પ નહોતો. જેના કારણે મેં આ પગલું ભર્યું છે. સંગઠન અને તેની વિચારધારા દેશ માટે ખતરનાક છે, તેથી તેને ખતમ કરવી પડશે. હું પોલીસ સમક્ષ આત્મસમર્પણ કરવાનો છું, તેથી મને શોધવાની જરૂર નથી. અગાઉ, અધિક પોલીસ મહાનિર્દેશક (ADGP) કાયદો અને વ્યવસ્થા એમઆર અજીત કુમારે જણાવ્યું હતું કે વિસ્ફોટોમાં એક મહિલાનું મૃત્યુ થયું હતું અને 50 થી વધુ લોકો ઘાયલ થયા હતા. કેટલાકની હાલત નાજુક છે. ડોમિનિક માર્ટિન નામના વ્યક્તિએ થ્રિસુર જિલ્લાના કોડાકારા પોલીસ સ્ટેશનમાં આત્મસમર્પણ કર્યું છે અને દાવો કર્યો છે કે બ્લાસ્ટ તેણે જ કરાવ્યો હતો.
