લોક જનશક્તિ પાર્ટી (લોજપા)માં ભંગાણ બાદ ચિરાગ પાસવાને પહેલી વખત વડાપ્રધાન નરેન્દ્ર મોદી પાસે મદદ માગી છે. ચિરાગ પાસવાને કહ્યું હતું કે, જો ‘હનુમાન’નો વધ થઈ રહ્યો હોય તો રામ ચૂપ રહે તે યોગ્ય નથી. ચિરાગ પાસવાનને લોજપાના આંતરિક ભંગાણ મુદ્દે વડાપ્રધાન નરેન્દ્ર મોદી મધ્યસ્થતા કરે તેવી આશા છે. ઉલ્લેખનીય છે કે, તાજેતરમાં જ બિહાર વિધાનસભાની ચૂંટણી વખતે ચિરાગે પોતાને વડાપ્રધાન મોદીનો ‘હનુમાન’ ગણાવ્યો હતો.
ચિરાગે કહ્યું, ‘હનુમાન દરેક પગલે ભગવાન રામની સાથે ચાલતા હતા અને તે જ રીતે તેમની પાર્ટી એલજેપી દરેક નાના-નાના નિર્ણય પર નરેન્દ્ર મોદીજીની સાથે ઉભી છે. હનુમાનની એલજેપી, જે દરેક નિર્ણય પર ભાજપ સાથે અડગ રહી હતી, જ્યારે આજે સંકટનો સમય આવી ગયો છે ત્યારે અપેક્ષા રાખવામાં આવી રહી છે કે રામ હસ્તક્ષેપ કરશે અને કોઈક રીતે આ વિવાદને હલ કરવાનો પ્રયાસ કરશે. પરંતુ ભાજપના મૌનથી ચોક્કસપણે દુખી થઈ ગઈ છે, તેમ છતાં હું કહીશ કે મને વડા પ્રધાન ઉપર પૂરો વિશ્વાસ છે કે તેઓ પરિસ્થિતિને નિયંત્રણમાં લઈ આ રાજકીય મુદ્દાને હલ કરવા ચોક્કસપણે હસ્તક્ષેપ કરશે.
આ દરમિયાન તેમણે કહ્યું હતું કે, કાકા પશુપતિ પારસ પર વિશ્વાસ મુકવો તે સૌથી મોટી ભૂલ છે. મેં મારા પરિવારજનો ઉપર પિતાની જેમ વિશ્વાસ મુક્યો જેની કિંમત ચુકવવી પડી રહી છે. ઉલ્લેખનીય છે કે, લોજપામાં પશુપતિ કુમાર પારસ અને ચિરાગ વચ્ચે પાર્ટી પર કબજાની લડાઈમાં પાર્ટીના સાંસદોએ પણ પશુપતિનો સાથ આપ્યો છે.
ચિરાગે કહ્યું કે તેમને આશા છે કે એલજેપી પર નિયંત્રણ જાળવવા માટે ભાજપ તેના કાકા પશુપતિ કુમાર પારસ સાથે દખલ કરશે અને ચાલુ લડાઇને સમાધાન કરશે. રવિવારે સૂત્રોએ કહ્યું હતું કે એલજેપી નેતાએ ચૂંટણીપંચને પક્ષના ચિન્હ પર અધિકારની માંગ કરી છે. પશુપતિ કુમાર પારસની આગેવાની હેઠળ એલજેપી જૂથે રાષ્ટ્રીય, રાજ્ય કારોબારી અને વિવિધ કોષોની સમિતિઓને વિસર્જન કર્યા પછી આ પગલું લેવામાં આવ્યું હતું.
ચિરાગે પણ બિહારના મુખ્ય પ્રધાન નીતીશ કુમાર સામે એલજેપીની અંદર ચાલી રહેલી તકરારમાં કોઈ ભૂમિકા નહીં ભજવવા બદલ ટકોર પણ કરી હતી. તેણે કહ્યું, ‘બધાને ખબર છે. આ એક ખુલ્લું રહસ્ય છે. તેની પાછળના લોકો જાણે છે. આ પહેલીવાર નથી જ્યારે મુખ્યમંત્રીએ અમારી પાર્ટીમાં ભાગલા પાડવાનો પ્રયાસ કર્યો હોય. આ તેમની કામ કરવાની શૈલી રહી છે. 2005 માં, જ્યારે અમારા 29 ધારાસભ્યો જીત્યા ત્યારે નીતીશ કુમારે અમારો પક્ષ તોડ્યો. તેમણે 2020 માં વિધાનસભાની ચૂંટણીમાં જીતનારા અમારા એકમાત્ર ધારાસભ્યને પણ તોડવાનું કામ કર્યું હતું. તોડવાની તેની પરંપરા રહી છે, તો પછી તે કયા મોં થી કહી રહ્યો છે કે તેની કોઈ ભૂમિકા નથી?
