ગુજરાતી કલાકાર માનસી પારેખને મળ્યો શ્રેષ્ઠ અભિનેત્રીનો રાષ્ટ્રીય પુરસ્કાર, જાણો વિગત

National Award/ ગુજરાતી કલાકાર માનસી પારેખને મળ્યો શ્રેષ્ઠ અભિનેત્રીનો રાષ્ટ્રીય પુરસ્કાર, જાણો વિગત

આજે શુક્રવારે 70મા રાષ્ટ્રીય ફિલ્મ પુરસ્કારોની જાહેરાત કરવામાં આવી. ગુજરાતી કલાકાર માનસી પારેખને શ્રેષ્ઠ અભિનેત્રીનો રાષ્ટ્રીય પુરસ્કાર મળ્યો.

National Award: આજે શુક્રવારે 70મા રાષ્ટ્રીય ફિલ્મ પુરસ્કારોની જાહેરાત કરવામાં આવી. ગુજરાતી કલાકાર માનસી પારેખને શ્રેષ્ઠ અભિનેત્રીનો રાષ્ટ્રીય પુરસ્કાર મળ્યો. રાષ્ટ્રીય પુરસ્કારમાં શ્રેષ્ઠ અભિનેત્રીની કેટેગરીમાં નિત્યા મેનને પણ શ્રેષ્ઠ અભિનેત્રીનો એવોર્ડ મળ્યો. માનસી પારેખને ગુજરાતી ફિલ્મ કચ્છ એક્સપ્રેસ’ માટે અને નિત્યા મેનને ‘તિરુચિત્રમ્બલમ’ ફિલ્મ માટે આ પુરસ્કાર મળ્યો. મહત્વનું છે કે આ વર્ષે માનસી પારેખ અભિનીત કચ્છ એક્સપ્રેસને ત્રણ એવોર્ડ મળ્યા છે. કહી શકાય કે આ પ્રથમ ગુજરાતી ફિલ્મ હશે જેને એક જ વર્ષમાં ત્રણ રાષ્ટ્રીય પુરસ્કાર પ્રાપ્ત થયા હશે. કચ્છ એક્સપ્રેમાં શ્રેષ્ઠ અભિનેત્રી તરીકે માનસી પારેખ, શ્રેષ્ઠ ફિચર ફિલ્મ નેશનલ, સોશિયલ એન્વાયર્નમેન્ટલ ઇશ્યૂઝ તેમજ બેસ્ટ કોસ્ચ્યુમ ડિઝાઈનર તરીકે નિકી જોશીને એવોર્ડ મળ્યો છે.

જ્યારે શ્રેષ્ઠ અભિનેતાનો રાષ્ટ્રીય પુરસ્કાર ‘કંતારા’ ફિલ્મમાં શાનદાર પ્રદર્શન કરનાર રિષભ શેટ્ટીને આપવામાં આવ્યો. સૂરજ બડજાત્યાને ફિલ્મ ‘ઊંચાઈ’ માટે શ્રેષ્ઠ દિગ્દર્શકનો રાષ્ટ્રીય પુરસ્કાર મળ્યો છે.

આનંદ એકરશી દ્વારા દિગ્દર્શિત મલયાલમ ફિલ્મ ‘આત્તમ’ એ 70માં રાષ્ટ્રીય ફિલ્મ પુરસ્કારોમાં શ્રેષ્ઠ ફીચર ફિલ્મનો એવોર્ડ જીત્યો છે. આ સિવાય બેસ્ટ હિન્દી ફિલ્મ કેટેગરીમાં ‘ગુલમોહર’, પંજાબી ફિલ્મ કેટેગરીમાં ‘બાગી દી ધી’, કન્નડ ફિલ્મ કેટેગરીમાં ‘KGF ચેપ્ટર 2’ અને બેસ્ટ તમિલ ફિલ્મ કેટેગરીમાં ‘પોનીયિન સેલ્વન: 1’ જીતી છે.

મહત્વનું છે કે રાષ્ટ્રી ફિલ્મ પુરસ્કારને ભારતીય સિનેમાના સૌથી પ્રતિષ્ઠિત સન્માનોમાંનું એક માનવામાં આવે છે. 70માં રાષ્ટ્રીય પુરસ્કારોમાં આ વર્ષે અભિનેત્રીની કેટેગરીમાં ગુજરાતીએ બાજી મારી. રાષ્ટ્રીય ફિલ્મ પુરસ્કારો દેશભરમાં શ્રેષ્ઠ ફીચર ફિલ્મ, શ્રેષ્ઠ અભિનેતા, શ્રેષ્ઠ અભિનેત્રી, શ્રેષ્ઠ દિગ્દર્શક અને અન્ય તકનીકી શ્રેણીઓ સહિત વિવિધ શ્રેણીઓમાં આપવામાં આવે છે.

જાણો આ વર્ષના રાષ્ટ્રીય પુરસ્કારના વિજેતાઓની યાદી.