G20 : ભારત આજે ઔપચારિક રૂપે G20ની અધ્યક્ષતા ગ્રહણ કરશે, જેથી દેશના 100 ઐતિહાસિક સ્મારકો પર G20 લોગો સાથે રોશનીથી શણગારવામાં આવશે.આ લોગોને ભારતીય રાષ્ટ્ર ધ્વજના રંગ કેસરી, સફેદ અને લીલા રંગથી પ્રેરિત થઈને તૈયાર કરવામાં આવ્યો છે. આ લોગોમાં પૃથ્વીને કમળ સાથે જોડે છે, જે ભારતનું રાષ્ટ્રીય ફૂલ છે અને તે પડકારો વચ્ચે વૃદ્ધિને પ્રતિબિંબિત કરે છે.
પૃથ્વી પર જીવન અંગેના ભારતના અભિગમને પણ તેમાં પ્રતિબિંબિત કરવામાં આવ્યું છે. G20ના લોગોની નીચે દેવનાગરી લિપિમાં ભારત લખવામાં આવ્યું છે. G20ની ભારતની અધ્યક્ષતાને વસુધૈવ કુટુમ્બકમ્ એટલે કે એક પૃથ્વી એક પરિવાર એક ભવિષ્ય દર્શાવવામાં આવ્યું છે. વિષય વસ્તુમાં પૃથ્વી ગ્રહ પર અને વિશાળ બ્રહ્માંડમાં માનવ, પ્રાણી, છોડ અને સુક્ષ્મસજીવો તથા તેમના પરસ્પર સહજીવનની બાબત દર્શાવવામાં આવી છે. G20 પરિષદ ભારત માટે એક મોટી તક છે, તેનાથી દેશને વૈશ્વિક કેન્દ્રનું મંચ મળશે. ભારતના પ્રમુખપદ દરમિયાન, દેશભરમાં બહુવિધ સ્થળોએ વિવિધ 32 ક્ષેત્રોમાં લગભગ 200 બેઠકો યોજશે.
G20 ના અધ્યક્ષપદની જાહેરાત પછી, PM મોદીએ વીડિયો કોન્ફરન્સિંગ દ્વારા G20 ના નવા લોગો-થીમ અને વેબસાઇટનું અનાવરણ કર્યું. આ અવસરે સંબોધન કરતાં તેમણે કહ્યું હતું કે G-20 નો આ લોગો માત્ર એક પ્રતીક નથી પરંતુ તે એક સંદેશ છે. તે એક લાગણી છે જે આપણી નસોમાં દોડે છે. આ એક ઠરાવ છે, જે આપણા વિચારમાં સમાવિષ્ટ છે. PM એ પોતાના સંબોધનમાં કહ્યું કે 1 ડિસેમ્બરથી ભારત G20 ની અધ્યક્ષતા કરશે. ભારત માટે આ એક ઐતિહાસિક અવસર છે, તેથી આજે આ સમિટની વેબસાઈટ, થીમ અને લોગો લોન્ચ કરવામાં આવ્યો છે. તેમણે કહ્યું કે આ અવસર પર હું તમામ દેશવાસીઓને ખૂબ ખૂબ અભિનંદન આપું છું.
