મહાનગર ગેસ લિમિટેડ (MGL)એ CNGની છૂટક કિંમતમાં પ્રતિ કિલો રૂ. 4નો વધારો કર્યો છે. જોકે, કંપનીએ પાઇપ રાંધણ ગેસ (PNG)ની છૂટક કિંમતમાં વધારો કર્યો નથી. કંપનીએ કહ્યું છે કે નેચરલ ગેસ સપ્લાયની કિંમતમાં 110 ટકાના જંગી વધારા બાદ કિંમતમાં વધારો કરવામાં આવ્યો છે.
MGLએ 6 એપ્રિલ, 2022થી ત્રીજી વખત CNGના ભાવમાં વધારો કર્યો છે. MGLએ શુક્રવારે જણાવ્યું હતું કે મુંબઈ અને તેની આસપાસના વિસ્તારોમાં CNGની કિંમત શુક્રવારની મધ્યરાત્રિથી 76 રૂપિયા પ્રતિ કિલો હશે અને સ્થાનિક PNGની કિંમતોમાં કોઈ વધારો કરવામાં આવ્યો નથી.
નોંધનીય છે કે મહારાષ્ટ્રના પુણે શહેરમાં પણ આજે એટલે કે 29 એપ્રિલની સવારે CNGની કિંમતમાં પ્રતિ કિલો 2.20 રૂપિયાનો વધારો કરવામાં આવ્યો હતો. હવે પુણેમાં સીએનજીનો નવો દર 77.20 રૂપિયા પ્રતિ કિલો થઈ ગયો છે. પુણેમાં CNGની કિંમતમાં આ સતત ચોથો વધારો છે અને આ પહેલા 6 એપ્રિલ, 13 એપ્રિલ અને 18 એપ્રિલે અહીં CNGની કિંમતમાં વધારો થયો છે.
6ઠ્ઠી એપ્રિલે પુણેમાં CNG 7 રૂપિયા મોંઘો થયો હતો. આ પછી 13 એપ્રિલે CNGની કિંમતમાં 5 રૂપિયા અને 18 એપ્રિલે 2 રૂપિયાનો વધારો કરવામાં આવ્યો હતો. આ રીતે જો આજના વધારા પર નજર કરીએ તો આ સતત ચોથો વધારો છે.
નોંધનીય છે કે તાજેતરના વધારા પહેલા, 1 થી 5 એપ્રિલની વચ્ચે સીએનજીના ભાવમાં પ્રતિ કિલો 6 રૂપિયાનો ઘટાડો કરવામાં આવ્યો હતો. ત્યારથી તેમાં પ્રતિ કિલો રૂ. 16નો વધારો થયો છે. રાજ્ય સરકારે CNG પરનો વેટ 13.5 ટકાથી ઘટાડીને ત્રણ ટકા કર્યો હતો, ત્યારબાદ તેની કિંમતોમાં ઘટાડો કરવામાં આવ્યો હતો.
