અમદાવાદ,
મુખ્યમંત્રી વિજયભાઇ રૂપાણીએ શહેરી વિસ્તારના ઝડપી વિકાસને વધુ આયોજિત અને વેગવંતો બનાવવાના ધ્યેય સાથે અમદાવાદની આઠ ડ્રાફટ TP સાથે કુલ ૧૧ ટાઉન પ્લાનીંગ સ્કીમને મંજુરી આપી છે.
આ ડ્રાફટ સ્કીમની મંજુરી મળવાથી સંબંધિત વિસ્તારોમાં રસ્તાઓના ઝડપી અમલીકરણ સાથોસાથ આંતરમાળખાકીય સુવિધામાં વૃધ્ધિ થશે.
શહેરમાં જ ર૮થી વધુ ડ્રાફટ ટાઉન પ્લાનીંગ સ્કીમને મંજુરી…
છેલ્લા ૯ મહિનામાં અમદાવાદ શહેરમાં જ ર૮ થી વધુ ડ્રાફટ ટાઉન પ્લાનીંગ સ્કીમને મંજુરી આપતાં અંદાજે ૩ હજારથી પણ વધુ હેકટર્સ વિસ્તારમાં આયોજનને આખરી ઓપ મળ્યો છે.
મુખ્યમંત્રીએ મંજુર કરેલી આઠ ડ્રાફટ ટી.પી.ને કારણે ૧૦૦૦ હેકટર્સ ઉપરાંતની જમીનનો સુઆયોજિત વિકાસ થઇ શકશે. અંદાજિત રૂ. ૧૪પ૦ કરોડના કામો પણ આ ૮ ટી.પી. સ્કીમમાં કરવાનો નિર્ધાર કરવામાં આવ્યો છે.
૬૦ કિ.મી.ના રસ્તાઓનો લાભ…
આ ટી.પી. સ્કીમમાં મોટાભાગે ૧૮ મીટર કે તેથી વધુ પહોળાઇના માર્ગોનું પણ આયોજન કરવામાં આવ્યું છે. સમગ્રતયા ૬૦ કિ.મી.ના રસ્તાઓનો લાભ શહેરને મળવાનો છે.
એટલું જ નહિ, ૧૮૦ હેકટર્સ જેટલી જમીન રસ્તાઓ માટે, ૧૯પ હેકટર્સ જમીન અર્બન ડેવલપમેન્ટ ઓથોરિટીને બાગ-બગીચા, ખુલ્લી જમીન, સોશિયલ ઇન્ફ્રાસ્ટ્રકચર ફેસેલીટીઝ તેમજ આર્થિક-સામાજીક વર્ગના લોકોના રહેણાંક અને વાણિજ્ય –રહેણાંકના વેચાણ હેતુથી સંપ્રાપ્ત થવાની છે.
રૂપાણીએ જે ૧૧ સ્કીમને મંજુરી આપી છે તેમાં AUDAની ડ્રાફટ ટી.પી. સ્કીમ
(૧) ૧૦/બી (કાણેટી)
(ર) ૪૧૯ (અસલાલી)
(૩) ૪૧પ (કઠવાડા)
(૪) પ૧૭ (કણભા-કુંજાડ)
(પ) ૯૧ (સનાથલ-તેલાવ)
(૬) ૮ (ધાનજ-પલસાણા-સઇજ)
(૭) ૧૦ (બોરીસણા-કલોલ-ઓલા-પ્રતાપપુરા)
(૮) ૪૦૧/અ (બાકરોલ-બાદરાબાદ-કમોડ)
(૯) પ્રીલીમીનરી ટી.પી. સ્કીમ નં. ૮૪/બી (મકરબા)
(૧૦) રાજકોટની ફાયનલ ટી.પી. સ્કીમ નં. ૧૭ (મુંજકા)
(૧૧) GUDAની ટી.પી. સ્કીમ નં. ૮ (સરગાસણ)નો સમાવેશ થાય છે.
મુખ્યમંત્રીએ જે ઝડપથી ડ્રાફટ સ્કીમને મંજુરી આપવામાં આવે છે તે જ રીતે ઝડપી કાર્યવાહીથી આ ડ્રાફટ ટી.પી.માં રસ્તા તેમજ આંતરમાળખાકીય સુવિધાનું અમલીકરણ થવા માંડે તે અંગે પણ સત્તામંડળોને સ્પષ્ટ સૂચનાઓ આપી છે.
* અમદાવાદમાં ૯ માસમાં ર૮ થી વધુ ડ્રાફટ ટી.પી સ્કીમ મંજુર
* ૩ હજારથી વધુ હેકટરમાં આયોજનને આખરી ઓપ મળ્યો
* ડ્રાફટ ટી.પી.માં રસ્તા-આંતરમાળખાકીય સુવિધાઓના ઝડપી અમલીકરણ માટે મુખ્યમંત્રીશ્રીની સત્તામંડળોને સ્પષ્ટ સુચનાઓ
