નાગરિકતા સંશોધન કાયદો: કેન્દ્રીય ગૃહ પ્રધાન અમિત શાહે કહ્યું છે કે કોવિડની લહેર સમાપ્ત થતાંની સાથે જ નાગરિકતા સંશોધન કાયદો (CAA) લાગુ કરવામાં આવશે. ગૃહમંત્રી અમિત શાહે પશ્ચિમ બંગાળના સિલીગુડીમાં એક રેલીને સંબોધિત કરતા આ વાત કહી. પશ્ચિમ બંગાળના મુખ્યમંત્રી પર પ્રહાર કરતા અમિત શાહે કહ્યું કે TMC CAA વિશે અફવા ફેલાવી રહી છે કે તેને લાગુ કરવામાં આવશે નહીં.
અમિત શાહે કહ્યું, ‘ટીએમસી CAA વિશે અફવા ફેલાવી રહી છે કે તેને જમીન પર લાગુ કરવામાં આવશે નહીં, પરંતુ હું કહેવા માંગુ છું કે કોવિડની લહેર સમાપ્ત થતાં જ અમે જમીન પર CAA લાગુ કરીશું. મમતા દીદી ઘૂસણખોરી ઈચ્છે છે. CAA વાસ્તવિકતા હતી, વાસ્તવિકતા છે અને વાસ્તવિકતા બનવા જઈ રહી છે.’
અમિત શાહે વધુમાં કહ્યું કે પશ્ચિમ બંગાળના મુખ્યમંત્રીએ હંમેશા ગોરખા લોકોને ગેરમાર્ગે દોર્યા છે. માત્ર ભાજપે તેમના હિતોનું ધ્યાન રાખ્યું છે. તેમણે કહ્યું કે હું બંગાળના લોકોનો આભાર માનું છું કે તેઓએ વિધાનસભામાં ભાજપના ધારાસભ્યોની સંખ્યા ત્રણથી વધારીને 77 કરવામાં મદદ કરી.
કેન્દ્રીય ગૃહ પ્રધાન અમિત શાહ ગુરુવારે તેમની બે દિવસીય મુલાકાતે પશ્ચિમ બંગાળ પહોંચ્યા હતા. 2021માં રાજ્યમાં યોજાયેલી વિધાનસભાની ચૂંટણી બાદ કેન્દ્રીય ગૃહમંત્રીની પશ્ચિમ બંગાળની આ પ્રથમ મુલાકાત છે. અમિત શાહ ગુરુવારે સવારે કોલકાતા એરપોર્ટ પહોંચ્યા હતા, જ્યાં બીજેપીના વરિષ્ઠ નેતા શુભેંદુ અધિકારી અને કેન્દ્રીય ગૃહ રાજ્ય મંત્રી નિશીથ પ્રામાણિક અને બીજેપી રાજ્ય એકમના વડા સુકાંત મજમુદારે તેમનું સ્વાગત કર્યું હતું.
આ પણ વાંચો: Weather / IMDની ચેતવણી: ગરમીમાં ઘટાડા બાદ ફરી હીટ વેવનો નવો રાઉન્ડ શરૂ થશે
