સૂવાની પદ્ધતિ વાળની તંદુરસ્તી પર અસર કરે છે. ઊંઘતી વખતે ફક્ત શરીર જ આરામ પામતું નથી, પરંતુ વાળ અને માથાની ત્વચા પણ પોતાને સુધારવાની પ્રક્રિયામાંથી પસાર થાય છે.
યોગ્ય રીતે ઊંઘ લેવાથી વાળ વધુ મજબૂત અને સ્વસ્થ બની શકે છે.
આ સમયે વાળ પર વજન, ખેંચાણ, ઘર્ષણ અને ભેજની ઉણપ સીધી તેમના સ્વાસ્થ્યને અસર કરે છે. તેથી સૂવાની રીત, ઓશીકાનું કાપડ અને વાળની પોઝિશન બધું જ મહત્ત્વ રાખે છે.
જો તમારા વાળ ટૂંકા છે અથવા બહુ ગૂંચવાતા નથી, તો વાળ ખુલ્લા રાખીને સૂવું ફાયદાકારક હોઈ શકે છે.
વાળ ખુલ્લા રાખીને સૂવાથી સ્કેલ્પ પર કોઈ ખેંચાણ પડતું નથી, તેથી બ્લડ સર્ક્યુલેશન સારું રહે છે. માથાનો દુખાવો કે હેરલાઇન સ્ટ્રેસનું જોખમ ઓછું રહે છે.
પરંતુ તેનો એક ગેરફાયદો પણ છે. ખુલ્લા વાળ રાત્રે ઓશીકા સાથે ઘસાય છે, જેનાથી વાળ વધુ તૂટી શકે છે.
ફ્રિઝ અને બે મોઢાવાળા વાળની સમસ્યા વધી શકે છે. સાથે જ સવારે જ્યારે ઉઠીએ ત્યારે વાળ ગૂંચવાયેલા જોવા મળે છે.
લાંબા કે વાંકડિયા વાળ ધરાવતા લોકો માટે હળવા હાથે વાળ બાંધવા એ સાચો ઉકેલ છે. તે વાળને ગૂંચવાતા અટકાવે છે અને ઘર્ષણ ઘટાડે છે.
જો તમે હાઈ પોનીટેલ કે ચુસ્ત અંબોડો વાળીને સૂતા હોવ, તો વાળના મૂળ નબળા પડે છે.
આને ‘ટ્રેક્શન એલોપેસીયા’ કહેવામાં આવે છે, જેમાં વાળના મૂળ પર સતત ખેંચાણ આવવાને કારણે ત્યાંથી વાળ ઊતરવા લાગે છે.
નિષ્ણાતોની સલાહ અનુસાર, સુતરાઉ કાપડ કરતા સિલ્ક કે સાટિનના ઓશીકા પર વાળ ઓછા ઘસાય છે. વાળને એકદમ ઢીલી રીતે ચોટલો વાળીને સૂવું એ સૌથી સુરક્ષિત રસ્તો છે.
ભીના વાળે ન સૂવું જોઈએ, કારણ કે ભીના વાળ અત્યંત નબળા હોય છે, તેથી તે તૂટવાની શક્યતા વધી જાય છે.