જમ્મુ-કાશ્મીરમાંથી કેન્દ્ર સરકારે બે વર્ષ પહેલા 370ની કલમ હટાવીને ઐતિહાસિક પગલું ઉઠાવ્યું હતું ,કલમ હટાવીને કાશ્મીરનો વિશેષ દરજ્જો રદ કરી દીધો હતો ,હવે 370 કલમના નામ પર સ્પોર્ટસ લીગ શરૂ કરવામાં આવશે.આ લીગનું આયોજન ગૃહમંત્રી અમિત શાહના સંસદીય ક્ષેત્ર ગાંધીનગરમાં કરવામાં આવશે અને તેમાં ક્રિકેટ અને કબડ્ડી જેવી મેચો યોજાશે.
અહેવાલો અનુસાર, આ લીગનું પૂરું નામ ગાંધીનગર લોકસભા પ્રીમિયર લીગ 370 (GLPL 370) હશે. આના માધ્યમથી વધુને વધુ યુવાનોને તેની સાથે જોડવાનું ભાજપનું લક્ષ્ય રહેશે. અમદાવાદ શહેરના બીજેપી યુનિટના જનરલ સેક્રેટરી જીતુભાઈ પટેલના જણાવ્યા અનુસાર, આ લીગનું નામ કલમ 370 પર રાખવામાં આવ્યું છે, જે અમિત શાહના નેતૃત્વમાં 2019માં રદ કરવામાં આવ્યું હતું. આ ટુર્નામેન્ટ ડિસેમ્બરના મધ્યમાં શરૂ કરવાનું આયોજન છે.
અહેવાલ છે કે ભાજપે લીગમાં ક્રિકેટ અને કબડ્ડી માટે દરેક વોર્ડમાંથી બે ટીમો (એક ક્રિકેટ અને એક કબડ્ડી ટીમ) સામેલ કરવાનો લક્ષ્યાંક નક્કી કર્યો છે. સાત વિધાનસભા બેઠકો જ્યાંથી આ ટીમો ચૂંટાશે તેમાં વેજલપુર, ઘાટલોડિયા, નારણપુરા, સાબરમતી, કલોલ, ગાંધીનગર (ઉત્તર) અને સાણંદનો સમાવેશ થાય છે. હાલમાં આ લીગ માત્ર પુરુષો માટે નક્કી કરવામાં આવી છે. જેમાં ક્રિકેટ મેચોને ટેનિસ બોલથી રમાડવામાં આવશે. વોટ્સએપ જૂથોનો ઉપયોગ તેની જાહેરાતો માટે કરવામાં આવશે, જે તેને પ્રમોટ કરશે.
કેન્દ્રીય ગૃહ પ્રધાન અમિત શાહ 2007 થી ગુજરાત ક્રિકેટ એસોસિએશન (GCA) સાથે જોડાયેલા છે. રાજ્ય સ્પોર્ટ્સ ફેડરેશનમાં કોંગ્રેસના નેતાઓના 16 વર્ષના વર્ચસ્વને ખતમ કરવામાં તેમણે ખૂબ જ મહત્વપૂર્ણ ભૂમિકા ભજવી છે. નરેન્દ્ર મોદી જ્યારે ગુજરાતના મુખ્યમંત્રી હતા ત્યારે અમિત શાહ જીસીએના ઉપપ્રમુખ પદે હતા. તેમના પુત્ર જય શાહ હાલમાં બીસીસીઆઈના સચિવ છે.
