National News : લાંબી રાહ જોયા બાદ આખરે પર્વતો સફેદ ચાદરથી ઢંકાઈ ગયા છે. હિમાચલ પ્રદેશની ખીણો બરફથી ઢંકાયેલી છે. મનાલી, કુલ્લુ, રોહતાંગ અને અન્ય ઘણા વિસ્તારોમાં ભારે હિમવર્ષાથી સંકટ વધ્યું, સાથોસાથ પ્રવાસીઓની ભીડ પણ વધી છે. ગઈકાલે આ હિમવર્ષાને કારણે મનાલી(Manali) – કેલોંગ (Keylong) રોડ પર વાહનોની અવરજવર અસ્થાયી રૂપે બંધ કરવી પડી હતી. અટલ ટનલ(Atal Tannal)ના માર્ગ પર લગભગ 1000 વાહનો ફસાઈ ગયા. જોકે વહીવટી તંત્રએ તત્પરતા દાખવી બચાવ કામગીરી હાથ ધરી હતી.
હિમાચલ પ્રદેશ(HP)માં હિમવર્ષાને કારણે 174 રાજ્ય અને 3 રાષ્ટ્રીય ધોરીમાર્ગો (NH 03, NH 305, NH 505) છેલ્લા 24 કલાકમાં બંધ કરવામાં આવ્યા છે. જ્યારે કેટલાક જિલ્લાઓમાં વીજળી અને પાણીના વિભાગીય જોડાણો પણ કાપી નાખવામાં આવ્યા છે, બદલાતા હવામાન અને હિમવર્ષાના કારણે 683 સ્થળોએ વીજળી ખોરવાઈ ગઈ છે. ડિઝાસ્ટર ઇન્ફોર્મેશન ડિપાર્ટમેન્ટે(DED) જિલ્લા પ્રમાણે રિપોર્ટ જાહેર કર્યો છે. સાથે જ પ્રવાસીઓ માટે એડવાઈઝરી પણ જારી કરવામાં આવી છે.
હિમાચલ પ્રદેશ(HP) જેવી સ્થિતિ ઉત્તરાખંડ(Uttarakhand)માં પણ બનવા લાગી છે. રાજ્યના ઘણા ઊંચાઈવાળા વિસ્તારોમાં હિમવર્ષા થઈ છે. જો કે હિમાચલની સરખામણીએ અહીં ઓછી હિમવર્ષા થાય છે. હજુ પણ ઔલી, ઉત્તરકાશી, ચક્રતા, બદ્રીનાથ, કેદારનાથ જેવા ઊંચાઈવાળા વિસ્તારો સફેદ ચાદરથી ઢંકાઈ ગયા છે. કેદારનાથ ધામમાં આ સિઝનની આ બીજી હિમવર્ષા છે. હિમવર્ષાના કારણે ત્યાં ચાલી રહેલા પુનઃનિર્માણ કાર્યને પણ અસર થઈ છે. કેદારનાથ ધામ(Kedarnath Dham)માં ગઈકાલથી સતત હિમવર્ષા ચાલુ છે. ધામમાં અત્યાર સુધીમાં 1 ફૂટથી વધુ બરફ પડ્યો છે. હવામાન વિભાગે એલર્ટ જાહેર કર્યું છે કે ક્રિસમસ અને નવા વર્ષ પર વધૂ ઠંડી પડી શકે છે.
ઉત્તરાખંડ(Uttarakhand)નું પ્રખ્યાત પર્યટન સ્થળ અને સ્કી રિસોર્ટ ઓલી ફરી એકવાર ભારે બરફની ઝપેટમાં આવી ગયું છે. ઔલીની ખીણોની તસવીરોમાં તમે જોઈ શકો છો કે કેવી રીતે અહીં બરફની ગોદમાં વૃક્ષો, છોડ, ઘર, રસ્તા, બધું જ દેખાઈ રહ્યું છે, જેના પછી ઔલીનો નજારો ખૂબ જ સુંદર લાગે છે. પ્રવાસીઓ અને સ્થાનિક હોટેલો લાંબા સમયથી જેની રાહ જોઈ રહ્યા હતા તે હવે અહીં જોવા મળી રહ્યું છે.
અડધા ફૂટ બરફના જાડા ધાબળાની નીચે ઓલીની ખીણો બધે સફેદ દેખાય છે. આવતીકાલે ક્રિસમસ છે અને વીકએન્ડને કારણે ઉત્તરાખંડના ઔલીમાં મોટી સંખ્યામાં પ્રવાસીઓ આવી રહ્યા છે. આવી સ્થિતિમાં આ હિમવર્ષા તેમના માટે કોઈ ભેટથી ઓછી નથી કારણ કે હવે ઔલીની ખીણો બરફથી ઢંકાયેલી છે. આવી સ્થિતિમાં અહીં પહોંચેલા પ્રવાસીઓની ઈચ્છા પૂરી થઈ ગઈ છે.
જમ્મુ-કાશ્મીર(JK)માં હવામાનનો ટ્રેન્ડ પણ ઘણો બદલાયો છે. ઊંચાઈવાળા વિસ્તારોમાં પણ ભારે હિમવર્ષા થઈ રહી છે. ગઈકાલે પીર પંજાલ અને સોનમર્ગમાં હિમવર્ષા થઈ હતી. અન્ય ઘણા વિસ્તારોમાં પણ હવામાન વિભાગ તરફથી એલર્ટ છે. આ દિવસોમાં કાશ્મીરનું તાપમાન સતત ઘટી રહ્યું છે. હાલમાં રવિવારે રાત્રે શ્રીનગર(Shrinagar)માં – 3.6 ડિગ્રી તાપમાન નોંધાયું હતું. પારો ગગડવાને કારણે પ્રખ્યાત દાલ સરોવર ઠંડું થવા લાગ્યું છે. જ્યારે પહેલગામ(Pahelgam)માં તાપમાન માઈનસ 5 ડિગ્રી રહ્યું હતું. હવામાન વિભાગના જણાવ્યા અનુસાર બુધવાર સુધી તાપમાનમાં વધુ આંચકો આવશે.
