પીએમ નરેન્દ્ર મોદી સાથે શી જિનપિંગની બીજી અનૌપચારિક શિખર બેઠકને મહત્વપૂર્ણ ગણાવતા, ચીની મીડિયાએ કહ્યું છે કે, આનાથી સંબંધોને એક નવો આયામ મળશે. અખબાર ગ્લોબલ ટાઇમ્સે ભારત સાથેના આર્થિક સહયોગનો ઉલ્લેખ કરતાં કહ્યું છે કે, ચીની કંપનીઓએ મેક ઇન ઈન્ડિયા અને ડિજિટલ ઈન્ડિયા જેવા અભિયાનોમાં ભાગ લઈને છેલ્લા કેટલાક વર્ષોમાં રોકાણ વધાર્યું છે. આ સાથે ભારતીય કંપનીઓએ પણ ચીનમાં રોકાણ વધાર્યું છે.

PM મોદી સાથે શી જિનપિંગની બીજી અનૌપચારિક શિખર બેઠક સમયે પણ હજી  પ્રશ્ન ઉઠી રહ્યો છે કે, કાશ્મીર વિશે વાત કરવામાં આવશે કે કેમ? જોકે અખબારે ભારત પર ચીન મામલે અવિશ્વાસ વ્યક્ત કરવાનો આરોપ લગાવ્યો છે. ચીની મીડિયા અનુસાર, ભારત તરફથી શંકાને કારણે બંને દેશો એક સાથે આર્થિક પ્રગતિ કરી શકતા નથી. અખબારે કહ્યું કે આ તે સમયગાળો છે જ્યારે ભારત અને ચીન સાથે મળીને કામ કરવું સૌથી મહત્ત્વપૂર્ણ બન્યું છે.

બંને દેશો વચ્ચેના સરહદ વિવાદનો ઉલ્લેખ કરતાં ચીનના સત્તાવાર અખબારે કહ્યું કે, જો આ મામલે સાથે શાંતિપૂર્ણ રીતે કાર્યવાહી કરવામાં આવે તો તે વિશ્વની સામે એક મોડેલ હશે. આ વિશ્વને સંદેશ આપશે કે કેવી રીતે બે દેશ એક સાથે થઈ શકે છે. એટલું જ નહીં, અખબારે ભારત સાથેની મિત્રતાને મહત્વપૂર્ણ ગણાવી હતી અને કહ્યું છે કે, જો ચીન-ભારત સંબંધો સારા નહીં હોય તો એશિયાનો ઉદય અશક્ય છે. ગ્લોબલ ટાઇમ્સે લખ્યું છે કે, “જો બંને દેશો દ્વિપક્ષીય મુદ્દાઓને તાર્કિક રૂપે ધ્યાનમાં નહીં લે તો એશિયાની બહારના દળો તેનો લાભ લેશે.”