New Delhi News: દિલ્હીના જંતર-મંતર ખાતે પ્રદર્શનકારીઓ પર થયેલા કથિત લાઠીચાર્જ (Jantar Mantar Lathicharge) અને પોલીસ કાર્યવાહીના મામલે દિલ્હી હાઇકોર્ટે (Delhi High Court) કેન્દ્ર સરકાર અને દિલ્હી પોલીસને નોટિસ પાઠવી ચાર અઠવાડિયામાં જવાબ રજૂ કરવા આદેશ આપ્યો છે. સાથે જ કોર્ટે ઘટનાસ્થળના CCTV, બોડી કેમેરા ફૂટેજ અને સંબંધિત તમામ પુરાવા સુરક્ષિત રાખવાના નિર્દેશ આપ્યા છે.
ચીફ જસ્ટિસ દેવેન્દ્ર ઉપાધ્યાય અને જસ્ટિસ તેજસ કારિયાની ખંડપીઠ સમક્ષ સુનાવણી દરમિયાન અરજીકર્તાઓ તરફથી રજૂઆત કરવામાં આવી હતી કે પર્યાવરણવિદ્ સોનમ વાંગચુક સહિતના પ્રદર્શનકારીઓને જંતર-મંતર પરથી બળજબરીપૂર્વક હટાવી તેમની પર લાઠીચાર્જ કરવામાં આવ્યો હતો, જે બંધારણીય અધિકારોનું ઉલ્લંઘન છે.
Jantar Mantar Lathicharge: ‘શાંતિપૂર્ણ વિરોધ પર અતિશય બળપ્રયોગ’
અરજીકર્તાઓના વકીલ એન. હરિહરને દલીલ કરી હતી કે વિદ્યાર્થીઓ અને અન્ય પ્રદર્શનકારીઓ શાંતિપૂર્ણ રીતે પોતાનો વિરોધ નોંધાવી રહ્યા હતા. તેમ છતાં પોલીસ દ્વારા અતિશય બળપ્રયોગ (Delhi Police Lathicharge) કરવામાં આવ્યો, જે લોકશાહી મૂલ્યો અને નાગરિકોના મૂળભૂત અધિકારો વિરુદ્ધ છે.
હાઇકોર્ટના પોલીસને સવાલ
સુનાવણી દરમિયાન હાઇકોર્ટે પોલીસની કાર્યવાહીને (High Court Notice) લઈને સવાલો પણ ઉઠાવ્યા હતા. કોર્ટે પૂછ્યું કે જો પોલીસના મતે ભીડ ગેરકાયદેસર હતી, તો કાયદા મુજબ જે પ્રક્રિયા નક્કી કરવામાં આવી છે તેનું પાલન કેમ ન થયું? કોર્ટે એ પણ નોંધ્યું કે મોટી સંખ્યામાં લોકો સામેલ હોય ત્યારે દરેક વ્યક્તિને અલગથી FIR નોંધાવવાનું કહેવું વ્યવહારુ નથી.
કેન્દ્ર સરકારે અરજીનો કર્યો વિરોધ
કેન્દ્ર સરકાર તરફથી હાજર રહેલા એડિશનલ સોલિસિટર જનરલ (ASG) એ અરજીનો વિરોધ કરતાં જણાવ્યું કે આ અરજી માત્ર પ્રસિદ્ધિ મેળવવાનો પ્રયાસ છે. સરકારના વકીલે દલીલ કરી કે પ્રદર્શન દરમિયાન પોલીસકર્મીઓ ઘાયલ થયા હતા, સરકારી વાહનોને નુકસાન પહોંચાડવામાં આવ્યું હતું અને કાયદો-વ્યવસ્થા જાળવવા પોલીસે જરૂરી કાર્યવાહી કરી હતી.
ચાર અઠવાડિયામાં જવાબ રજૂ કરવાનો આદેશ
દિલ્હી હાઇકોર્ટે કેન્દ્ર સરકાર અને દિલ્હી પોલીસને ચાર અઠવાડિયામાં વિગતવાર જવાબ દાખલ કરવાનો આદેશ આપ્યો છે. સાથે જ કેસ સંબંધિત તમામ CCTV ફૂટેજ, બોડી કેમેરા રેકોર્ડિંગ અને અન્ય ડિજિટલ પુરાવાઓ સુરક્ષિત રાખવાના નિર્દેશ આપતાં આગામી સુનાવણીમાં આ મામલે વધુ ચર્ચા હાથ ધરાશે.
આ પણ વાંચો: સોનમ વાંગચુક પર લાઠીચાર્જ અને રાહુલ ગાંધીની અટકાયતના વિરોધમાં માંગરોળમાં પ્રદર્શન
આ પણ વાંચો: વિદ્યાર્થીઓ પર લાઠીચાર્જ કેસમાં સુપ્રીમ કોર્ટે તાત્કાલિક સુનાવણી ટાળી, CJIએ કહ્યું- વીડિયો જોવા સમય નથી
આ પણ વાંચો: શરદ પવાર અને સુપ્રિયા સુલેની PM મોદી સાથે મુલાકાત બાદ NDAમાં જોડાવાની અટકળો તેજ, NCP(SP)એ આપી સ્પષ્ટતા
