Jamnagar News: જામનગરની G.G. હોસ્પિટલમાં (G.G. Hospital) ચાંદીપુરા વાયરસના (Chandipura Virus)શંકાસ્પદ લક્ષણો સાથે સારવાર લઈ રહેલા રોજીયા ગામના 1 વર્ષના બાળકનું મોત (Child Death) થયું છે. ગંભીર હાલતમાં હોસ્પિટલમાં દાખલ કરાયેલા બાળકને બચાવવા તબીબોની ટીમે પ્રયાસો કર્યા હતા, પરંતુ સારવાર દરમિયાન જ બાળકે અંતિમ શ્વાસ લીધા હતા.
Chandipura Virus : લેબ રિપોર્ટ બાદ મૃત્યુનું કારણ થશે સ્પષ્ટ
બાળકના બ્લડ સેમ્પલ આરોગ્ય વિભાગ દ્વારા તપાસ માટે મોકલવામાં આવ્યા છે. લેબોરેટરી રિપોર્ટ આવ્યા બાદ જ બાળકનું મોત (Child Death) ચાંદીપુરા વાયરસને (Chandipura Virus )કારણે થયું છે કે અન્ય કોઈ કારણસર તે અંગે ચોક્કસ માહિતી મળી શકશે.
G.G. હોસ્પિટલમાં શંકાસ્પદ ચાંદીપુરાથી મૃત્યુઆંક 5 પર પહોંચ્યો
જામનગરની G.G. હોસ્પિટલમાં અત્યાર સુધી ચાંદીપુરાના શંકાસ્પદ લક્ષણો ધરાવતા પાંચ બાળકોના મોત થયા છે. જેમાં જામનગરની 2 વર્ષની બાળકી, લાંભા ગામના 2 વર્ષના બાળક, આમરા ગામના બાળક, દેવભૂમિ દ્વારકાની 1 વર્ષની બાળકી અને હવે રોજીયા ગામના 1 વર્ષના બાળકનો સમાવેશ થાય છે.
બે બાળકો હાલ હોસ્પિટલમાં સારવાર હેઠળ
હાલ G.G. હોસ્પિટલમાં ચાંદીપુરા વાયરસના શંકાસ્પદ લક્ષણો ધરાવતા બે બાળકો સારવાર હેઠળ છે. નિષ્ણાત તબીબોની ટીમ દ્વારા બંને બાળકોની સતત દેખરેખ રાખવામાં આવી રહી છે. તબીબોના જણાવ્યા મુજબ બંને બાળકોની તબિયતમાં ધીમે-ધીમે સુધારો જોવા મળી રહ્યો છે.
પૂણેની NIV લેબમાં મોકલાયા સેમ્પલ
આરોગ્ય વિભાગ દ્વારા તમામ શંકાસ્પદ કેસોના સેમ્પલ પુષ્ટિ માટે પૂણે સ્થિત નેશનલ ઇન્સ્ટિટ્યૂટ ઓફ વાયરોલોજી (NIV) ખાતે મોકલવામાં આવ્યા છે. રિપોર્ટ આવ્યા બાદ જ કેસોની સ્થિતિ અંગે અંતિમ માહિતી સામે આવશે.
અસરગ્રસ્ત વિસ્તારોમાં આરોગ્ય વિભાગનું સર્વેલન્સ તેજ
ચાંદીપુરા વાયરસનો ફેલાવો અટકાવવા આરોગ્ય વિભાગ દ્વારા સાવચેતીના પગલાં વધુ સઘન કરવામાં આવ્યા છે. ગ્રામ્ય અને શહેરી વિસ્તારોમાં આરોગ્ય ટીમો દ્વારા ઘરે-ઘરે સર્વે, તાવગ્રસ્ત બાળકોની તપાસ અને શંકાસ્પદ લક્ષણો ધરાવતા દર્દીઓનું સ્ક્રીનિંગ કરવામાં આવી રહ્યું છે.
આ પણ વાંચો: ચાંદીપુરાના શંકાસ્પદ કેસોએ વધારી ચિંતા: જામનગરમાં વધુ બે બાળ દર્દીનાં મોત
આ પણ વાંચો: સાબરકાંઠામાં ચાંદીપુરા વાયરસના 3 પોઝિટિવ દર્દી સારવાર હેઠળ, 27 દિવસમાં 5 બાળકોનાં મોત
