Mantavya Vishesh: પાલનપુરમાં આજે રસ્તા પર માત્ર ખેડૂતો નહોતા ઉતર્યા… પરંતુ વર્ષોથી પડતર રહેલા પ્રશ્નોનો રોષ પણ રસ્તા પર (Palanpur Farmers Protest) આવ્યો હતો!
Palanpur Farmers Protest: ખેડૂતોનો હલ્લાબોલ, હજારો ખેડૂતો રસ્તા પર; નેશનલ હાઈવે પર ચક્કાજામ
બનાસકાંઠાના ખૂણે-ખૂણેથી હજારો ખેડૂતો પાલનપુરમાં (Banaskantha Farmers Protest) એકત્ર થયા… પહેલા જોડનાપુરા નજીક વિશાળ મહાસભા યોજાઈ, અને ત્યારબાદ ખેડૂતોની મહારેલી શરૂ થઈ. હાથમાં માંગણીઓના મુદ્દા અને મનમાં વર્ષોથી ચાલી રહેલી ફરિયાદો સાથે ખેડૂતો કલેક્ટર કચેરી તરફ આગળ વધ્યા. પરંતુ રેલી જ્યારે પાલનપુરના અતિ વ્યસ્ત એરોમા સર્કલ પાસે પહોંચી, ત્યારે સ્થિતિ અચાનક ઉગ્ર બની ગઈ. રોષે ભરાયેલા ખેડૂતો નેશનલ હાઈવે પર જ બેસી ગયા અને ચક્કાજામ (Palanpur Chakka Jam) કરી દીધો. જેના કારણે થોડા સમય માટે વાહનવ્યવહાર પર ભારે અસર પડી અને પોલીસ તંત્રમાં પણ દોડધામ મચી ગઈ.
પણ સવાલ એ છે કે આખરે ખેડૂતોને રસ્તા પર ઉતરવાની ફરજ કેમ પડી?
ખેડૂતોના આંદોલન પાછળ પાણી, પાકના પૂરતા અને પોષણક્ષમ ભાવ સહિતના વિવિધ પડતર પ્રશ્નો છે. ખેડૂતોનો આક્ષેપ છે કે આ પ્રશ્નોને લઈને લાંબા સમયથી રજૂઆતો કરવામાં આવી રહી છે, પરંતુ યોગ્ય ઉકેલ મળ્યો નથી. પરિણામે હવે મહાસભાથી લઈને મહારેલી (Kisan Andolan) અને મહારેલીથી સીધા હાઈવે પર ચક્કાજામ સુધી વિરોધ પહોંચ્યો છે. બનાસકાંઠાના અલગ-અલગ વિસ્તારોમાંથી ખેડૂતો મોટી સંખ્યામાં પાલનપુર પહોંચ્યા હોવાથી આંદોલનની વ્યાપકતા પણ જોવા મળી હતી.
આ દરમિયાન ખેડૂત મહાસભામાં ખેડૂત નેતા જગમલ આર્યએ સરકારના મંત્રીઓ સામે ગંભીર આક્ષેપો કર્યા હતા. તેમણે મુખ્યમંત્રીને લઈને અલગ વાત કરતા તેમની પાછળની વ્યવસ્થા અને મંત્રીઓની કામગીરી સામે સવાલો ઉઠાવ્યા હતા. ખેડૂતોને હેરાન કરવામાં આવતા હોવાના તેમજ પૈસા લેવાતા હોવાના પણ તેમણે આક્ષેપો કર્યા હતા. જોકે, આ આક્ષેપો ખેડૂત નેતા દ્વારા કરવામાં આવ્યા છે અને તેની સ્વતંત્ર પુષ્ટિ થયેલી નથી. પોતાના સંબોધનમાં તેમણે મંત્રીઓને આકરી ચીમકી પણ આપી હતી અને ધાર્મિક સંદર્ભ આપીને નિવેદન કર્યું હતું. તેમના આ નિવેદનથી પણ ખેડૂત મહાસભામાં સરકાર સામેનો રોષ સ્પષ્ટ જોવા મળ્યો.
હવે આંદોલન અહીં અટકવાનું છે કે આગળ વધુ ઉગ્ર બનવાનું છે?
ખેડૂતોએ સ્પષ્ટ ચીમકી આપી છે કે તેમની માંગણીઓનો વહેલી તકે ઉકેલ નહીં આવે તો આગામી દિવસોમાં આંદોલનને વધુ ઉગ્ર બનાવવામાં આવશે. એટલે પાલનપુરનો આજનો ચક્કાજામ માત્ર એક દિવસના વિરોધ પૂરતો છે કે પછી બનાસકાંઠામાં ખેડૂતોની આ લડત વધુ મોટું સ્વરૂપ ધારણ કરશે, તેના પર હવે સૌની નજર છે. એક તરફ ખેડૂતો પોતાના પ્રશ્નોના નિરાકરણની માંગ સાથે રસ્તા પર છે, તો બીજી તરફ સરકાર અને તંત્ર સામે હવે સૌથી મોટો સવાલ છે..ખેડૂતોની આ માંગણીઓનો ઉકેલ ક્યારે આવશે?
આ પણ વાંચો: ભરૂચમાં પોલ્ટ્રી ખેડૂતોનો વિરોધ, કોન્ટ્રાક્ટ ફાર્મિંગ કંપનીઓ સામે યોગ્ય વળતરની માંગ
આ પણ વાંચો: રાજકોટના ચોરડી ગામે ગૌચર બચાવવા ખેડૂતોનું અનોખું આંદોલન: JETCOનું ‘બેસણું’ યોજી વિરોધ
આ પણ વાંચો: પાટણમાં NH-68 જમીન સંપાદનનો વિરોધ, ખેડૂતોની 4થી 6 ગણું વળતરની માગ
