Jaipur News: એર ઇન્ડિયાની ફ્લાઇટમાં હાઇજેક એલર્ટ મળતાં સુરક્ષા એજન્સીઓ સતર્ક થઈ ગઈ હતી. ફ્રેન્કફર્ટથી દિલ્હી જઈ રહેલી એર ઇન્ડિયાની ફ્લાઇટ AI-2030નું બુધવારે સવારે જયપુરમાં ઇમરજન્સી લેન્ડિંગ કરાવવામાં (Jaipur Emergency Landing) આવ્યું હતું. મળતી માહિતી મુજબ, વિમાનના પાઇલટ તરફથી અમદાવાદ એર ટ્રાફિક કંટ્રોલ (ATC)ને હાઇજેકનો સિગ્નલ મોકલવામાં આવ્યો હતો. ત્યારબાદ આ માહિતી જયપુર ATC સાથે શેર કરવામાં આવી હતી.
Jaipur Emergency Landing: 45 મિનિટ બાદ જયપુરમાં લેન્ડિંગ
માહિતી અનુસાર, એલર્ટ મળ્યા બાદ આશરે 45 મિનિટમાં વિમાનને જયપુર એરપોર્ટ પર ઉતારવામાં આવ્યું હતું. લેન્ડિંગ બાદ સુરક્ષા એજન્સીઓના અધિકારીઓ વિમાનની અંદર પહોંચ્યા અને તપાસ હાથ ધરી હતી. જોકે, શરૂઆતમાં તપાસના પરિણામો અંગે સત્તાવાર પુષ્ટિ કરવામાં આવી નહોતી.
ફ્રેન્કફર્ટથી દિલ્હી જતી ફ્લાઇટનું રૂટ બદલાયું
ફ્લાઇટ ટ્રેકિંગ પ્લેટફોર્મ ફ્લાઇટરડાર24ના જણાવ્યા અનુસાર, વિમાને 13 ઑક્ટોબરની રાત્રે 9:45 વાગ્યે ફ્રેન્કફર્ટથી ઉડાન ભરી હતી. ફ્લાઇટનું દિલ્હી પહોંચવાનું નિર્ધારિત સમય 14 ઑક્ટોબરની સવારે 10:40 વાગ્યે હતું. જોકે, હાઇજેક એલર્ટ મળ્યા બાદ વિમાનને તેના નિર્ધારિત રૂટ પરથી ડાયવર્ટ કરીને જયપુર લઈ જવામાં આવ્યું હતું.
પ્રાથમિક તપાસમાં ટેક્નિકલ ખામીની આશંકા
આ સમગ્ર મામલે પ્રાથમિક તપાસમાં એલર્ટ મેસેજ ભૂલથી જનરેટ થયો હોવાની આશંકા વ્યક્ત કરવામાં આવી છે. સૂત્રોના જણાવ્યા અનુસાર, સિસ્ટમમાં ટેક્નિકલ ખામીને કારણે આવો મેસેજ મોકલાયો હોઈ શકે છે. જોકે, આ અંગે હજુ સુધી સત્તાવાર પુષ્ટિ થઈ નથી. તપાસ પૂર્ણ થયા બાદ જ એલર્ટ પાછળનું ચોક્કસ કારણ સ્પષ્ટ થઈ શકશે.
કેપ્ટન સ્મિત મચ્છર સાથે જોડાયેલી ઘટના ફરી ચર્ચામાં
આ ઘટનાને કારણે 30 સપ્ટેમ્બરે સામે આવેલી બીજી એક ઘટના પણ ચર્ચામાં આવી છે. તે સમયે ઇઝરાયલ જઈ રહેલી ફ્લાયદુબઈની ફ્લાઇટમાંથી હાઇજેક સિગ્નલ કોડ 7500 મોકલવામાં આવ્યો હોવાનો અહેવાલ સામે આવ્યો હતો. આ ઘટનામાં ભારતીય કો-પાઇલટ કેપ્ટન સ્મિત મચ્છરે વિમાનને હાઇજેક કરીને ક્રેશ કરવાનો પ્રયાસ નિષ્ફળ બનાવ્યો હોવાનો દાવો કરવામાં આવ્યો હતો.
જોકે, એર ઇન્ડિયાની ફ્લાઇટ AI-2030ના કિસ્સામાં પ્રાથમિક માહિતી ટેક્નિકલ ખામી તરફ સંકેત આપે છે. બંને ઘટનાઓ વચ્ચે સીધો સંબંધ હોવાની કોઈ પુષ્ટિ સામે આવી નથી.
