સુપ્રીમ કોર્ટે આજે અનામતને લઈને મોટો નિર્ણય આપ્યો છે. સુપ્રીમ કોર્ટે કહ્યું છે કે, સરકારી નોકરીઓમાં અનામતની માંગણી મૂળભૂત અધિકાર હેઠળ આવતી નથી અને કોઈ પણ કોર્ટ રાજ્ય સરકારને એસસી કે એસટીને અનામત આપવા આદેશ આપી શકે નહીં. અનામતને લઈને સુપ્રીમ કોર્ટનો આ મોટો નિર્ણય છે. કોર્ટે કહ્યું કે, તે રાજ્ય સરકારનો નિર્ણય લેવાનો અધિકાર છે કે તે નોકરીમાં અનામત આપવા માંગે છે કે બઢતીમાં અનામત આપે છે. અનામત આપવા માટે રાજ્ય સરકાર પર કોઇ પણ પ્રકારની બાધ્યતા નથી અને તે ફરજિયાત પણ નથી.
કોર્ટે સ્પષ્ટ કર્યું છે કે, જો અનામત આપવી હોય તો રાજ્ય સરકારે સરકારી નોકરીઓમાં એસસી અને એસટીની રજૂઆત અંગેનો ડેટા એકત્રિત કરવો જોઇએ. રાજ્ય સરકાર કોઈ પણ રીતે અનામત આપવા માટે બંધાયેલી નથી. એવો કોઈ મૂળભૂત અધિકાર નથી કે જેના હેઠળ દાવો કરી શકાય. આ સંદર્ભે, કોર્ટ દ્વારા કોઈ હુકમ જારી કરી શકાતો નથી જેમાં રાજ્ય સરકારને અનામત આપવાનું કહેવામાં આવે. સુપ્રીમ કોર્ટનાં ન્યાયાધીશ જસ્ટિસ એલ નાગેશ્વર રાવ અને હેમંત ગુપ્તાની ખંડપીઠે આ નિર્ણય આપ્યો છે.
કોર્ટે કહ્યું કે, આર્ટિકલ 16 માં એસસી, એસટીને અનામત આપવાની જોગવાઈ છે, પરંતુ તે રાજ્ય સરકારનાં વિવેક પર નિર્ભર કરે છે. કોર્ટ તરફથી રાજ્ય સરકારને આ અંગે નિર્દેશ આપી શકાતો નથી કે તે સરકારી પોસ્ટ્સમાં ભરતી માટે અનામત આપે. રાજ્ય સરકાર બઢતીમાં અનામત આપવા પણ બંધાયેલ નથી. પરંતુ જો રાજ્ય સરકાર અનામત આપવા માંગે છે, તો આ માટે તેણે ડેટા એકત્રિત કરવો પડશે જેથી અનામત સમાનરૂપે આપવામાં આવે. જો અનામતને કોર્ટમાં પડકારવામાં આવે તો, આ આંકડા આપવાનું ફરજિયાત રહેશે.
ઉત્તરાખંડ સરકાર દ્વારા જાહેર બાંધકામ વિભાગમાં સહાયક ઇજનેરની ભરતીમાં એસસી, એસટી અનામત વિરુદ્ધ દાખલ કેસની સુનાવણી દરમિયાન સુપ્રીમ કોર્ટે આ નિર્ણય આપ્યો છે. જણાવી દઇએ કે ઉત્તરાખંડ સરકારે અનામત નહીં આપવાનો નિર્ણય લીધો હતો, ત્યારબાદ હાઇકોર્ટે નિર્દેશ આપ્યો હતો કે રાજ્ય સરકારે પહેલા એસસી, એસટીની રજૂઆત પર ડેટા એકત્રિત કરવા જોઈએ.
નીચે આપેલી લીંક પર ક્લિક કરીને જોડાવ મંતવ્ય ન્યૂઝ સાથે…
તમે અમને ફેસબુક, ટ્વીટર, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.
લેટેસ્ટ ન્યૂઝ અપડેટ્સ આપના ફોન પર સૌથી ઝડપી મેળવવા માટે આજે જ ડાઉનલોડ કરો “મંતવ્ય ન્યૂઝ” ની નવી મોબાઇલ એપ્લિકેશન.
