આખરે, ચિલીની કોંગ્રેસ (સંસદ) એ મંગળવારે સમલૈંગિક લગ્નોને મંજૂરી આપવા માટે બહુપ્રતિક્ષિત બિલને મંજૂરી આપી.જેના કારણે સમલૈંગિક લગ્નોને કાયદાકીય મંજૂરીનો માર્ગ મોકળો થયો છે.
હવે ચિલી પણ એવા દેશોના સમૂહમાં સામેલ થઈ ગયું છે જ્યાં સમલૈંગિક લગ્નોને મંજૂરી આપવામાં આવી છે. આ દેશો મોટાભાગે કેથોલિક લેટિન અમેરિકન દેશો છે. તેમની પાસે સમાન કાયદાઓ પણ છે. આ બિલને રાષ્ટ્રપતિ સેબેસ્ટિયન પિનેરાનું સમર્થન છે. તેમણે અંતિમ મંજૂરી માટે બિલ પર સહી કરવી પડશે. ત્યાર બાદ આ કાયદો અમલમાં આવશે. ઉપરાંત આમાં પરિણીત સમલૈંગિક યુગલોને બાળકોને દત્તક લેવાનો અધિકાર મળશે.
મંગળવારે ચિલીની સંસદના ઉપલા ગૃહ અથવા સેનેટમાંથી બિલને લીલી ઝંડી મળી હતી. લોઅર ચેમ્બર ઓફ ડેપ્યુટીઝ દ્વારા તે ટૂંક સમયમાં 82 મતોથી પસાર કરવામાં આવ્યું હતું. વિરોધમાં 20 મત પડ્યા હતા.
લેટિન અમેરિકન દેશોમાં સમલૈંગિક યુગલો અત્યાર સુધી કોસ્ટા રિકા, એક્વાડોર, કોલંબિયા, બ્રાઝિલ, ઉરુગ્વે, આર્જેન્ટિના અને મેક્સિકોના 32 રાજ્યોમાંથી માત્ર 14 રાજ્યોમાં જ લગ્ન કરી શકતા હતા. હવે આ જ જૂથમાં ચિલી પણ જોડાઈ ગઈ છે.
ચિલીએ 2015 માં ગે સંગઠનોને કાયદેસર બનાવ્યા, ત્યારથી, તે સમલૈંગિક લગ્નને કાયદેસર બનાવવા માટે આતુરતાપૂર્વક રાહ જોઈ રહ્યું છે. તત્કાલિન પ્રમુખ મિશેલ બેચેલેટે 2017માં કોંગ્રેસને સંબંધિત બિલ મોકલ્યું હતું. એક આશ્ચર્યજનક ડગલુ ભરતા, તેમના રૂઢિચુસ્ત અનુગામી પિનેરાએ આ વર્ષે જૂનમાં જાહેરાત કરી હતી કે તેઓ બિલને તાત્કાલિક પસાર કરવા માંગશે.