મધ્યપ્રદેશના કૃષિ મંત્રી અને ભાજપના નેતા કમલ પટેલે કહ્યું કે, કોંગ્રેસના અત્યાચાર, ભ્રષ્ટાચાર અને દેશની સંસ્કૃતિના વિનાશથી સર્જાયેલા નિરાશાના વાતાવરણને ખતમ કરવા માટે વડાપ્રધાન નરેન્દ્ર મોદી ભગવાન રામ અને કૃષ્ણ જેવા ‘ભગવાનના અવતાર’ તરીકે જન્મ્યા હતા. સોમવારે હરદામાં પત્રકારો સાથે વાતચીત કરતા પટેલે જણાવ્યું હતું કે, વડાપ્રધાન મોદી દ્વારા ભારતને વિશ્વગુરુ બનવાના માર્ગ પર લઈ જવા, દેશને ભ્રષ્ટાચારથી મુક્ત કરવા અને જન કલ્યાણ સુનિશ્ચિત કરવા જેવા કાર્યો સામાન્ય માણસ દ્વારા પૂર્ણ થઈ શકે તેમ નથી.તે ભગવાન જ કરી શકે તેમ છે.
પટેલે કહ્યું, “આપણા ધર્મ અને સંસ્કૃતિમાં કહેવામાં આવ્યું છે કે જ્યારે પણ ભારતમાં સંકટ આવે છે અને અત્યાચાર વધે છે ત્યારે ભગવાન મનુષ્યના રૂપમાં અવતરે છે. તેમણે કહ્યું કે ભગવાન રામે મનુષ્ય તરીકે અવતાર લીધો હતો અને રાક્ષસ રાવણનો વધ કરીને અને અન્ય દુષ્ટ શક્તિઓને હરાવીને લોકોનું રક્ષણ કરીને “રામ રાજ્ય” ની સ્થાપના કરી હતી. મંત્રીએ કહ્યું કે જ્યારે કંસનો અત્યાચાર વધ્યો ત્યારે ભગવાન કૃષ્ણએ જન્મ લીધો અને કંસના ક્રૂરતાનો અંત લાવ્યો અને સામાન્ય લોકોને રાહત આપી.
પટેલે કહ્યું, “તેમજ જ્યારે કોંગ્રેસનો અત્યાચાર વધ્યો… ભ્રષ્ટાચાર વધ્યો, જ્ઞાતિવાદ વધ્યો, દેશની સંસ્કૃતિ ખતમ થઈ ગઈ અને ચારે બાજુ નિરાશાનું વાતાવરણ છવાઈ ગયું, ત્યારે તેનો અંત લાવવા માટે નરેન્દ્ર મોદીનો જન્મ થયો.” તેમણે કહ્યું કે, વડાપ્રધાન મોદીના નેતૃત્વમાં ભારત વિશ્વ ગુરુ બની રહ્યું છે, જેમણે ભ્રષ્ટાચાર મુક્ત સરકાર આપી અને સામાન્ય લોકોનું કલ્યાણ સુનિશ્ચિત કર્યું.
પટેલે કહ્યું, “આ અશક્ય કાર્યો છે જે સામાન્ય માણસ પૂર્ણ કરી શકતો નથી. જો શક્ય હોય તો, તે 60 વર્ષમાં થઈ શક્યું હોત. એટલા માટે વડાપ્રધાન નરેન્દ્ર મોદીજી એક અવતારી માણસ છે અને તેમણે અશક્ય કામ કરી બતાવ્યું છે. તે ભગવાનનો અવતાર છે.” નોંધનીય છે કે ગત નવેમ્બર મહિનામાં પટેલે કહ્યું હતું કે મધ્યપ્રદેશના મુખ્યમંત્રી શિવરાજ સિંહ ચૌહાણ આદિવાસી નાયક તાંત્યા ભીલનો અવતાર છે. તાંત્યા ભીલ આદિવાસી દંતકથાઓમાં ભારતીય “રોબિન હૂડ” તરીકે ઓળખાય છે.
