જમ્મુ અને કાશ્મીરના રાજૌરી જિલ્લામાં અંકુશ રેખા (એલઓસી) પર શુક્રવારે તાલીમ સત્ર દરમિયાન વિસ્ફોટ થયો હતો. આ અકસ્માતમાં ચાર જવાનો ઘાયલ થયા હોવાના અહેવાલ છે. સંરક્ષણ અધિકારીઓએ માહિતી આપી કે ઘાયલોને હોસ્પિટલમાં દાખલ કરવામાં આવ્યા છે. એકની હાલત નાજુક હોવાનું કહેવાય છે.
જમ્મુના રાજૌરી જિલ્લાના નૌશેરામાં શુક્રવારે નિયમિત તાલીમ દરમિયાન થયેલા વિસ્ફોટમાં ઓછામાં ઓછા ચાર જવાન ઘાયલ થયા હતા. પોલીસ સૂત્રોએ જણાવ્યું કે નૌશેરાના કલસિયન વિસ્તારમાં એક ટ્રેનિંગ સેશન દરમિયાન આજે સાંજે થયેલા વિસ્ફોટમાં સેનાના ચાર જવાન ઘાયલ થયા હતા.
તેમણે કહ્યું કે ઘાયલોને ઘટનાસ્થળેથી બહાર કાઢીને આર્મી હોસ્પિટલ રાજૌરીમાં ખસેડવામાં આવ્યા છે. તેમાંથી એકને ઉધમપુરની કમાન્ડ હોસ્પિટલમાં રીફર કરવામાં આવ્યો છે. સૂત્રોએ જણાવ્યું હતું કે એવી આશંકા છે કે તે ગ્રેનેડ બ્લાસ્ટ હતો પરંતુ ચોક્કસ કારણની તપાસ ચાલી રહી છે.
