Breaking News: જયપુર(Jaipur)માં નેશનલ હાઇવે પર એક મોટો અકસ્માત થયો છે. આ અકસ્માત(Accident)માં એક જ પરિવારના 5 લોકોના ઘટનાસ્થળે જ મોત થયા હતા. પ્રાપ્ત માહિતી અનુસાર, જયપુરના મનોહરપુર-દૌસા રાષ્ટ્રીય ધોરીમાર્ગ પર કાર અને ટ્રેલર વચ્ચે થયેલી સામસામે ટક્કરમાં 12 મહિનાના બાળક અને બે મહિલાઓ સહિત પાંચ લોકોના મોત થયા છે. એવું કહેવામાં આવી રહ્યું છે કે કારમાં સવાર બધા લોકો ખાટુ શ્યામ મંદિરના દર્શન કરવા જઈ રહ્યા હતા. બધા મૃતકો એક જ પરિવારના હોવાનું કહેવાય છે અને તેઓ જે વાહનમાં મુસાફરી કરી રહ્યા હતા તે વાહનની નંબર પ્લેટ ઉત્તર પ્રદેશની હતી.
કારના ટુકડા થઈ ગયા
પ્રત્યક્ષદર્શીઓના જણાવ્યા અનુસાર, કાર અને ટ્રેલર વચ્ચેની ટક્કર એટલી જોરદાર હતી કે ટ્રેલર રસ્તા પરથી ઉતરી ગયું અને પલટી ગયું. કારમાંથી મૃતદેહો કાઢવા માટે પોલીસને ખૂબ જ મહેનત કરવી પડી. આ માર્ગ અકસ્માત બાદ હાઇવે પર લાંબો જામ થઈ ગયો હતો.
યુપીથી એક પરિવાર મળવા આવ્યો હતો
રાયસર પોલીસ સ્ટેશનના અધિકારી રઘુવીર સિંહે જણાવ્યું કે આ માર્ગ અકસ્માત રવિવારે સવારે લગભગ 8 વાગ્યે મનોહરપુર-દૌસા વચ્ચે રાષ્ટ્રીય ધોરીમાર્ગ પર થયો હતો. તેમણે જણાવ્યું કે લખનૌ, યુપીથી એક પરિવાર રાજસ્થાન ફરવા આવ્યો હતો. પરિવારમાં બે પુરુષો, બે સ્ત્રીઓ અને એક બાળક હતું. પરિવારના પાંચેય સભ્યો સવારે કાર દ્વારા દૌસાથી ખાટુશ્યામજી જઈ રહ્યા હતા. આ દરમિયાન, નેકાવાલા ટોલ નજીક, તેમની કાર એક ટ્રેલર સાથે અથડાઈ અને આ અકસ્માત થયો.
અકસ્માત પછી લોકોમાં બૂમો પડી ગઈ
કાર અને ટ્રેલર વચ્ચેની ટક્કર એટલી જોરદાર હતી કે કારનો આગળનો ભાગ સંપૂર્ણપણે ક્ષતિગ્રસ્ત થઈ ગયો હતો અને કારમાં બેઠેલા પાંચેય લોકો કારમાં ખરાબ રીતે ફસાઈ ગયા હતા. અકસ્માત બાદ બૂમો અને ચીસો પડી હતી અને ઘટનાની માહિતી મળતાં રાયસર પોલીસ ઘટનાસ્થળે પહોંચી હતી. શક્ય છે કે ઓવરટેકિંગને કારણે આ અકસ્માત થયો હોય. હાલમાં અકસ્માતના કારણોની તપાસ ચાલી રહી છે.
આ પણ વાંચો:રાજસ્થાન હાઈકોર્ટનો નિર્ણય, 13 વર્ષની બળાત્કાર પીડિતાને ગર્ભપાતનો અધિકાર મળ્યો
