New Delhi News : દિવાળી પહેલા જ દિલ્હીમાં પ્રદૂષણ (Delhi Pollution) વધતાં હવાની ગુણવત્તા ચિંતાજનક બની છે. રાજધાનીમાં એર ક્વોલિટી ઇન્ડેક્સ (AQI) 233 (Delhi AQI 233)નોંધાતાં હવા ‘ખરાબ’ શ્રેણીમાં પહોંચી ગઈ છે. પ્રદૂષણને કાબૂમાં લેવા માટે તંત્રએ ગ્રેડેડ રિસ્પોન્સ એક્શન પ્લાન (GRAP-1) હેઠળના નિયંત્રણો (GRAP-1 Restrictions)લાગુ કર્યા છે. આ પગલાં અંતર્ગત ધૂળ અને ધુમાડાથી થતા પ્રદૂષણને ઘટાડવા માટે વિવિધ નિયમોનું પાલન કરાવાશે.
GRAP-1 લાગુ થતાં કયા નિયંત્રણો લાગુ થયા?
દિલ્હીમાં હવાની ગુણવત્તા સુધારવા માટે વહીવટીતંત્ર દ્વારા અનેક પગલાં લેવામાં આવી રહ્યાં છે. હોટેલ અને રેસ્ટોરન્ટમાં કોલસા તથા લાકડાના ઉપયોગ પર નિયંત્રણો લાગુ કરવામાં આવ્યા છે. ડીઝલ જનરેટરના ઉપયોગ પર પણ નિયંત્રણો મૂકવામાં આવ્યા છે, જોકે આવશ્યક અને ઇમરજન્સી સેવાઓને નિયમો મુજબ છૂટ મળી શકે છે.
રસ્તાઓ પર ઉડતી ધૂળને નિયંત્રિત કરવા માટે નિયમિત સફાઈ અને પાણીનો છંટકાવ કરવામાં આવશે. બાંધકામ સ્થળોએથી ધૂળ ન ફેલાય તે માટે દેખરેખ વધારવામાં આવશે. આ ઉપરાંત કચરાના યોગ્ય નિકાલ અને ખુલ્લામાં કચરો બાળવાની પ્રવૃત્તિ અટકાવવા પર પણ ભાર મૂકવામાં આવશે.
દિલ્હીમાં તાપમાન ઘટતાં વહેલી સવારે ઠંડક
દિલ્હીમાં પ્રદૂષણ (Delhi Pollution)ની સાથે હવામાનમાં પણ ફેરફાર જોવા મળી રહ્યો છે. હવામાન વિભાગના આંકડા મુજબ, સફદરજંગમાં લઘુતમ તાપમાન 18 ડિગ્રી સેલ્સિયસ નોંધાયું હતું. પાલમમાં 17.8 ડિગ્રી, લોધી રોડ અને આયાનગરમાં 17.7 ડિગ્રી, જ્યારે રિજ વિસ્તારમાં 19.1 ડિગ્રી સેલ્સિયસ તાપમાન નોંધાયું હતું.
સવારે તાપમાનમાં ઘટાડાને કારણે ઠંડકનો અનુભવ થઈ રહ્યો છે. હવાની ગુણવત્તા ખરાબ શ્રેણીમાં પહોંચતાં ખાસ કરીને બાળકો, વૃદ્ધો અને શ્વાસ સંબંધિત સમસ્યાઓ ધરાવતા લોકોએ સાવચેતી રાખવી જરૂરી છે.
AQI 233નો અર્થ શું? જાણો પ્રદૂષણનું જોખમ
સેન્ટ્રલ પોલ્યુશન કંટ્રોલ બોર્ડ (CPCB)ના માપદંડ મુજબ, AQIના આંકડાથી હવાની ગુણવત્તાનું સ્તર નક્કી કરવામાં આવે છે.
0થી 50: સારી હવા
51થી 100: સંતોષકારક
101થી 200: મધ્યમ
201થી 300: ખરાબ
301થી 400: ખૂબ ખરાબ
401થી 500: ગંભીર
દિલ્હીમાં AQI 233 નોંધાતાં હવાની ગુણવત્તા ખરાબ શ્રેણીમાં છે. દિવાળીના તહેવાર દરમિયાન ફટાકડા, વાહનોનો ધુમાડો અને અન્ય પ્રદૂષણકારક પ્રવૃત્તિઓથી સ્થિતિ વધુ બગડવાની શક્યતા રહે છે. તેથી નાગરિકોએ પ્રદૂષણ નિયંત્રણના નિયમોનું પાલન કરવું અને જરૂરિયાત મુજબ બહારની પ્રવૃત્તિઓ મર્યાદિત રાખવી જોઈએ.
