National News : ભારત વિરુદ્ધ આતંકવાદી ગતિવિધિઓ ચલાવતા પાકિસ્તાન સ્થિત આતંકવાદી સંગઠનોમાં હાલ ભયનો માહોલ હોવાના અહેવાલો સામે આવ્યા છે. ગુપ્તચર સૂત્રોને ટાંકીને કરવામાં આવેલા અહેવાલો અનુસાર, લશ્કર-એ-તૈયબાનો વડો હાફિઝ સઈદ (Hafiz Saeed)અને જૈશ-એ-મોહમ્મદનો વડો મસૂદ અઝહર (Masood Azhar)પાકિસ્તાનમાં પોતાના જૂના ઠેકાણાઓ પરથી અન્ય સુરક્ષિત સ્થળોએ ખસેડાયા છે. બંને આતંકવાદીઓને પાકિસ્તાનની ગુપ્તચર એજન્સી ISIની દેખરેખ હેઠળ ભારે સુરક્ષાવાળા ઠેકાણાઓમાં રાખવામાં આવ્યા હોવાનો દાવો કરવામાં આવી રહ્યો છે.
ક્યાં ખસેડાયા હાફિઝ સઈદ અને મસૂદ અઝહર?
અહેવાલો અનુસાર, હાફિઝ સઈદ (Hafiz Saeed)ને લાહોરના જોહર ટાઉનમાંથી ખસેડીને રાવલપિંડીના ગેરીસન વિસ્તાર નજીક રાખવામાં આવ્યો છે. આ વિસ્તાર પાકિસ્તાન આર્મીના મુખ્યાલયની નજીક આવેલો હોવાથી તેની સુરક્ષાને લઈને વિશેષ વ્યવસ્થા કરવામાં આવી હોવાની ચર્ચા છે.
બીજી તરફ, જૈશ-એ-મોહમ્મદના વડા મસૂદ અઝહર (Masood Azhar)ને સિંધ પ્રાંતના નવાબશાહમાં આવેલા એક સુરક્ષિત ઠેકાણે ખસેડવામાં આવ્યો હોવાનો દાવો છે. જોકે, બંને આતંકવાદીઓના હાલના ચોક્કસ ઠેકાણાં અંગે સ્વતંત્ર રીતે સત્તાવાર પુષ્ટિ થઈ નથી.
ઓપરેશન સિંદૂર બાદ આતંકીઓમાં ભય?
સૂત્રોને ટાંકીને કરવામાં આવેલા અહેવાલોમાં જણાવાયું છે કે ઓપરેશન સિંદૂર દરમિયાન પાકિસ્તાનમાં આતંકવાદી માળખાંને થયેલા નુકસાન બાદ બંને આતંકવાદીઓ પોતાની સુરક્ષાને લઈને ચિંતિત છે. ભારત તરફથી સંભવિત કાર્યવાહીનો ડર અને પાકિસ્તાનમાં છેલ્લા કેટલાક સમયથી ભારત વિરોધી આતંકવાદીઓ પર થયેલા અજાણ્યા હુમલાઓને પણ આ પાછળનું કારણ માનવામાં આવી રહ્યું છે.
પાકિસ્તાનમાં છેલ્લા કેટલાક મહિનાઓ દરમિયાન અનેક ભારત વિરોધી આતંકવાદીઓની (Pakistan Terrorists)અજાણ્યા હુમલાખોરો દ્વારા હત્યા કરવામાં આવી હોવાના અહેવાલો સામે આવ્યા છે. આ ઘટનાઓ બાદ આતંકવાદી સંગઠનોના નેતાઓ પોતાની સુરક્ષા વ્યવસ્થા વધુ મજબૂત કરી રહ્યા હોવાની ચર્ચા છે.
હાફિઝ સઈદે સભ્યો સાથે મુલાકાતો બંધ કરી?
અહેવાલો મુજબ, હાફિઝ સઈદે લશ્કર-એ-તૈયબાના સભ્યો સાથે રૂબરૂ મુલાકાતો ઘટાડીને ઓડિયો સંદેશાઓ મારફતે સંપર્ક કરવાનું શરૂ કર્યું છે. તેની અવરજવર પર પણ નિયંત્રણો લાદવામાં આવ્યા હોવાનો દાવો કરવામાં આવ્યો છે.
પાકિસ્તાનના સત્તાવાર દાવા અનુસાર, હાફિઝ સઈદ (Hafiz Saeed)આતંકવાદી ભંડોળના કેસમાં લાહોરની કોટ લખપત જેલમાં સજા ભોગવી રહ્યો છે. જોકે, ગુપ્તચર સૂત્રોને ટાંકતા અહેવાલોમાં આ દાવા સામે સવાલો ઉઠાવવામાં આવ્યા છે. અહેવાલો અનુસાર, તે જેલને બદલે કોઈ સુરક્ષિત સ્થળે હોવાની શક્યતા વ્યક્ત કરવામાં આવી રહી છે.
મસૂદ અઝહર પણ સંગઠનથી દૂર?
બીજી તરફ, જૈશ-એ-મોહમ્મદના વડા મસૂદ અઝહર (Masood Azhar)ની ગતિવિધિઓ પણ મર્યાદિત થઈ હોવાનો દાવો કરવામાં આવ્યો છે. ઓપરેશન સિંદૂર (Operation Sindoor)દરમિયાન બહાવલપુરમાં આવેલા જૈશના મુખ્ય ઠેકાણા મરકઝને નુકસાન થયું હોવાના અહેવાલો સામે આવ્યા હતા.
ત્યારથી સંગઠનને ફરીથી સક્રિય થવામાં મુશ્કેલીઓ પડી રહી હોવાનું કહેવાય છે. મસૂદ અઝહર પણ સંગઠનના તમામ સભ્યો સાથે સીધો સંપર્ક રાખવાને બદલે માત્ર પસંદગીના ટોચના કમાન્ડરો સાથે જ સંપર્કમાં હોવાની માહિતી અહેવાલોમાં આપવામાં આવી છે.
બંને આતંકવાદીઓ ભારત માટે વોન્ટેડ
ઉલ્લેખનીય છે કે સંયુક્ત રાષ્ટ્ર દ્વારા હાફિઝ સઈદ અને મસૂદ અઝહર (Masood Azhar)બંનેને વૈશ્વિક આતંકવાદી જાહેર કરવામાં આવ્યા છે. હાફિઝ સઈદ 26/11 મુંબઈ આતંકી હુમલાના મુખ્ય કાવતરાખોરોમાંનો એક છે અને ભારતને અનેક આતંકવાદી હુમલાઓના મામલે તેની શોધ છે.
જ્યારે મસૂદ અઝહરનું નામ પુલવામા, પઠાણકોટ અને સંસદ પરના આતંકી હુમલા સાથે જોડાયેલું છે. બંને આતંકવાદીઓ હાલમાં જેલમાં હોવાને બદલે સુરક્ષિત સ્થળોએ રાખવામાં આવ્યા હોવાનો ગુપ્તચર સૂત્રોને ટાંકીને દાવો કરવામાં આવી રહ્યો છે. જોકે, આ અંગે પાકિસ્તાન તરફથી કોઈ નવી સત્તાવાર પુષ્ટિ સામે આવી નથી.
