Ahmedabad News:આજે (12 જાન્યુઆરી) અમદાવાદમાં એક ઐતિહાસિક અને પ્રેરણાદાયી ક્ષણ જોવા મળી, જ્યારે વડાપ્રધાન નરેન્દ્ર મોદીએ જર્મનીના નવા ચાન્સેલર ફ્રેડરિક મર્ઝનું ભારતની પ્રથમ અધિકૃત મુલાકાત દરમિયાન ઉષ્માભર્યું સ્વાગત કર્યું. બંને નેતાઓએ સાબરમતી આશ્રમ (Sabarmati Ashram)ની મુલાકાત લીધી અને મહાત્મા ગાંધીને શ્રદ્ધાંજલિ અર્પણ કરી.
સવારે વહેલી તકે વડાપ્રધાન નરેન્દ્ર મોદી અમદાવાદના સાબરમતી આશ્રમ (Sabarmati Ashram)પહોંચ્યા હતા. અહીં તેમણે અધિકારીઓ સાથે મહત્વની બેઠક યોજી હતી, જેમાં મુખ્યમંત્રી ભૂપેન્દ્ર પટેલ પણ હાજર રહ્યા હતા. આ બેઠકમાં આશ્રમના રી-ડેવલપમેન્ટ પ્રોજેક્ટની વિગતવાર સમીક્ષા કરવામાં આવી. વડાપ્રધાને આશ્રમને વધુ આકર્ષક, આધુનિક અને વૈશ્વિક સ્તરે પ્રેરણાસ્ત્રોત બનાવવા માટેની યોજનાઓ પર ચર્ચા કરી અને જરૂરી માર્ગદર્શન આપ્યું. આ પ્રોજેક્ટ મહાત્મા ગાંધીના વારસાને જાળવી રાખીને નવી પેઢીને તેમના આદર્શો સુધી પહોંચાડવાના ઉદ્દેશ્ય સાથે આગળ વધી રહ્યો છે.
આ પછી જર્મન ચાન્સેલર ફ્રેડરિક મર્ઝ આશ્રમ (Sabarmati Ashram)પહોંચ્યા, જ્યાં વડાપ્રધાન મોદીએ તેમનું વ્યક્તિગત રીતે સ્વાગત કર્યું. બંને નેતાઓએ મહાત્મા ગાંધીની પ્રતિમા પર પુષ્પાંજલિ અર્પણ કરી. ખાસ રીતે, તેમણે ગાંધીજીની તસવીર પર સુતરની આંટી પહેરાવી અને પરંપરાગત રીતે રેંટિયો કાંત્યો, જે ગાંધીજીના સ્વાવલંબન અને અહિંસાના સંદેશને પ્રતીકાત્મક રીતે દર્શાવે છે.
સાબરમતી આશ્રમ (Sabarmati Ashram) નવીનીકરણ કામગીરીની સમીક્ષા
ચાન્સેલર મર્ઝે આશ્રમ (Sabarmati Ashram)ના વિઝિટર્સ બુકમાં એક પ્રેરણાદાયી સંદેશ લખ્યો, જેમાં તેમણે જણાવ્યું કે “સ્વતંત્રતાની શક્તિ અને દરેક વ્યક્તિના મનમાં મહાત્મા ગાંધીનો અડગ વિશ્વાસ આજે પણ આપણને પ્રેરણા આપે છે. આ માનવીય વારસો ભારત અને જર્મનીના લોકોને મિત્રતા દ્વારા એકસાથે જોડે છે. દુનિયામાં આજે પણ ગાંધીજીના ઉપદેશો એટલા જ પ્રસ્તુત છે.”આ સંદેશ આશ્રમની ડાયરીમાં નોંધાયો, જે વૈશ્વિક સ્તરે ગાંધીજીના વિચારોની પ્રસ્તુતતા દર્શાવે છે. બંને નેતાઓએ આશ્રમમાં ગાંધીજીના જીવન અને કાર્ય વિશે વિગતવાર માહિતી મેળવી અને તેમના આદર્શોથી પ્રભાવિત થયા.
આ મુલાકાત ભારત-જર્મની વ્યૂહાત્મક ભાગીદારીના 25 વર્ષ પૂર્ણ થવાના અવસરે થઈ છે. ચાન્સેલર મર્ઝની આ પ્રથમ અધિકૃત ભારત મુલાકાત દ્વિપક્ષીય સંબંધોને વધુ મજબૂત બનાવવાની દિશામાં મહત્વનું પગલું છે. આશ્રમની મુલાકાત પછી બંને નેતાઓએ આંતરરાષ્ટ્રીય પતંગ મહોત્સવમાં ભાગ લીધો અને પછી મહાત્મા મંદિર ખાતે ઔપચારિક બેઠક યોજી, જેમાં વેપાર, સંરક્ષણ, ટેક્નોલોજી અને સંયુક્ત પ્રોજેક્ટ્સ પર ચર્ચા થઈ.
આ પણ વાંચો:મહાત્મા ગાંધીએ સાબરમતી આશ્રમ કેમ કર્યો હતો ત્યાગ? જાણો આ ઘરનો ઈતિહાસ
