ગુજરાતભરમાં ચકચાર મચાવનારા કરજણના સ્વીટી પટેલ મર્ડર કેસમાં આરોપી અજય દેસાઈ સામે સજ્જડ પુરાવા એકત્ર કરવાની કવાયત રુપે હવે અમેરિકાથી ખાસ કિટ મગાવાઈ હોવાનુ જાણવા મળી રહ્યું છે. આ કિટ દ્વારા અટાલી ગામ નજીકની એક અવાવરું બિલ્ડિંગમાંથી મળેલા બળેલાં હાડકાંનો ડીએનએ ટેસ્ટ કરવામાં આવશે. ઉલ્લેખનીય છે કે, આ જ સ્થળ પર અજય દેસાઈએ સ્વીટીની લાશને સળગાવી હોવાની કબૂલાત કરી હતી.
સ્વીટી પટેલ મર્ડર કેસનો મુખ્ય આરોપી સસ્પેન્ડેડ પોલીસ ઈન્સ્પેક્ટર અજય દેસાઈ હાલ જેલમાં બંધ છે. તેની સાથે તેનો મિત્ર અને કોંગ્રેસનો અગ્રણી કિરીટસિંહ પણ જેલમાં છે. કિરીટસિંહે અજયને સ્વીટીના મૃતદેહનો નિકાલ કરવામાં મદદ કરી હોવાનો આરોપ છે. જે જગ્યાએ સ્વીટીનો મૃતદેહ સળગાવાયો તે કિરીટસિંહની માલિકીની હતી.
આ પણ વાંચો ;ભાવ વધારો / દશેરાનાં દિવસે પેટ્રોલ-ડીઝલનાં ભાવે લગાવી છલાંગ, જાણો તમારા શહેરમાં શું છે નવા રેટ
કોઈ થ્રિલર ફિલ્મી સ્ટોરીને પણ ટક્કર મારે તેવી આ ઘટનામાં વડોદરા SOGમાં ફરજ બજાવતા ઈન્સ્પેક્ટર અજય દેસાઈએ જૂન મહિનામાં સ્વીટીની રાતના સમયે ગળું દબાવીને હત્યા કરી નાખી હતી. બંને લીવ-ઈનમાં રહેતાં હતાં, અને તેમને એક દીકરો પણ છે. સ્વીટીનું મર્ડર કર્યા બાદ બીજા દિવસે અજય તેની લાશને પોતાની ગાડીમાં લઈને અટાલી ગામે જવા નીકળ્યો હતો, જ્યાં તેણે લાશને સળગાવી દીધી હતી. બીજી તરફ, સ્વીટીના પરિવારજનોને તેણે એવું કહ્યું હતું કે તે ઘરેથી ક્યાંક ચાલી ગઈ છે.
આ હાડકાં સ્વીટીના જ છે કે કેમ તેની વૈજ્ઞાનિક રીતે ખરાઈ કરવા માટે તેમજ તેનો મજબૂત પુરાવા તરીકે ઉપયોગ કરવા માટે પોલીસે FSLમાં તેનો ડીએનએ ટેસ્ટ કરવા માટે મોકલ્યા હતા. જોકે, હાડકાં ખૂબ જ બળી ચૂક્યા હોવાથી તેમાંથી ડીએનએ ટેસ્ટ માટેનું સેમ્પલ લેવામાં સફળતા ના મળતા આ હાડકાં સ્વીટીના જ છે કે કેમ તેની હજુ સુધી નક્કર રીતે પુષ્ટિ નથી થઈ શકી.
આ પણ વાંચો ;તાલિબાની કહેર / 100 અફઘાન મહિલા ફૂટબોલ ખેલાડીઓએ તાલિબાનથી બચવા છોડ્યો દેશ
આ કેસની તપાસ અમદાવાદ ક્રાઈમ બ્રાંચ દ્વારા કરવામાં આવી છે. પોલીસ કેસમાં ચાર્જશીટ રજૂ કરવાની તૈયારીમાં છે, તેવામાં હાડકાંના ડીએનએ ટેસ્ટ માટે હવે અમેરિકાથી મગાવાયેલી કિટ દ્વારા તેમાં સફળતા મળે તેવી પોલીસને આશા છે. અજય દેસાઈ પોતે કાયદાનો જાણકાર હોવાથી બળેલા હાડકાં સ્વીટીના જ છે કે કેમ તેની પુષ્ટિ ના થઈ હોવાની બાબતનો ફાયદો ના ઉઠાવે તે માટે પોલીસે તેની વિરુદ્ધ અન્ય પુરાવા પણ એકત્ર કર્યા છે.
