સાઉદી અરેબિયાએ એક જ દિવસમાં 81 લોકોને આતંકવાદ સંબંધિત ગુનામાં ફાંસી આપી છે. ખાસ વાત એ છે કે આ આંકડો આ ખાડી દેશમાં 2021માં આખા વર્ષમાં આપવામાં આવેલી ફાંસીની સજા કરતા વધુ છે. એવું કહેવામાં આવી રહ્યું છે કે આ લોકો ઘણા જઘન્ય અપરાધો કરવા માટે દોષી સાબિત થયા હતા. સાઉદી પ્રેસ એજન્સીના જણાવ્યા અનુસાર, ફાંસી આપવામાં આવેલા લોકોમાં ઇસ્લામિક સ્ટેટ જૂથ, અલ-કાયદા, યમનના હુથી બળવાખોર દળો અથવા અન્ય આતંકવાદી સંગઠનો સાથે જોડાયેલા ગુનેગારોનો સમાવેશ થાય છે.

81 માંથી 73 સાઉદી નાગરિકો
સાઉદી પ્રેસ એજન્સી (SPA) અનુસાર, ફાંસી આપવામાં આવેલા 81 લોકોમાંથી 73 સાઉદી નાગરિક હતા. તેમાં 7 યમન અને એક સીરિયન નાગરિક છે. એસપીએ અનુસાર, તેઓ મોટા આર્થિક કેન્દ્રો પર હુમલાનું કાવતરું ઘડી રહ્યા હતા. તેમાંથી કેટલાકે સુરક્ષા દળોના સભ્યોની હત્યા કરી હતી અથવા દેશમાં શસ્ત્રોની દાણચોરીમાં સામેલ હતા.

અગાઉ વર્ષ 1979માં મક્કાની ગ્રાન્ડ મસ્જિદ પર કબજો કરવા માટે દોષિત 63 આતંકવાદીઓને જાન્યુઆરી 1980માં ફાંસી આપવામાં આવી હતી. અત્યારે તેની પાછળનું કારણ જાણી શકાયું નથી કે શા માટે સાઉદીએ મૃત્યુદંડ માટે શનિવારનો દિવસ પસંદ કર્યો છે.

સાઉદી અરેબિયા યમનમાં હુથીઓ સાથે લડી રહ્યું છે
સાઉદીની આગેવાની હેઠળનું લશ્કરી ગઠબંધન 2015 થી યમનમાં ઈરાન સમર્થિત હુથી બળવાખોરો સામે યુદ્ધ લડી રહ્યું છે. જેથી આંતરરાષ્ટ્રીય સ્તરે માન્યતા પ્રાપ્ત સરકાર અહીં પુનઃસ્થાપિત કરી શકાય. મૃત્યુદંડની સજા પામેલા લોકો વિશે વધુ માહિતી આપવામાં આવી નથી કે તેમને ક્યાં ફાંસી આપવામાં આવી તે પણ જણાવવામાં આવ્યું નથી. સાઉદી પ્રેસ એજન્સીએ જણાવ્યું હતું કે દોષિતોને સાઉદી કાયદા હેઠળ વકીલાત અને તેમના તમામ અધિકારોનો ઉપયોગ કરવાની છૂટ છે.

કોર્ટ સુનાવણી બાદ ફાંસી
જેમને ફાંસી આપવામાં આવી હતી તેમના પર સાઉદી અરેબિયાની કોર્ટમાં કેસ ચલાવવામાં આવ્યો હતો. SPA અનુસાર, દરેક દોષિતના કેસની સુનાવણી 13 જજો દ્વારા ત્રણ અલગ-અલગ તબક્કામાં કરવામાં આવી હતી. ખાડીનો આ સમૃદ્ધ દેશ દુનિયાના તે દેશોમાં સામેલ છે જ્યાં સૌથી વધુ ફાંસીની સજા આપવામાં આવે છે. 2021માં સમગ્ર વર્ષ દરમિયાન સાઉદી અરેબિયામાં કુલ 69 લોકોને ફાંસી આપવામાં આવી હતી.

સાઉદીનો અવાજ – આતંકવાદ વિરુદ્ધ કાર્યવાહી ચાલુ રહેશે
સાઉદી અરેબિયાના ગૃહ મંત્રાલયે કહ્યું કે તેનો દેશ આતંકવાદ અને ઉગ્રવાદી વિચારધારાઓ સામે સખત અને અડીખમ વલણ અપનાવવાનું ચાલુ રાખશે. મંત્રાલયે આતંકવાદને સમગ્ર વિશ્વની સ્થિરતા માટે ખતરો ગણાવ્યો છે. સાઉદી અરેબિયા છેલ્લા ઘણા સમયથી પડોશી દેશ યમનમાં કટ્ટરપંથી આતંકવાદ અને ચાલી રહેલી હિંસા સામે લડી રહ્યું છે. યમનમાં કાર્યરત હુથી વિદ્રોહીઓ દ્વારા સાઉદી અરેબિયાને વારંવાર નિશાન બનાવવામાં આવે છે.

રાજકીય/ પાંચ રાજ્યોમાં ચૂંટણી હારની અસરઃ સોનિયા ગાંધી, રાહુલ ગાંધી અને પ્રિયંકા ગાંધી આપી શકે છે રાજીનામું

ઉત્તરપ્રદેશ/ યુપીમાં ફ્રી રાશન યોજના બંધ થઈ શકે છે, 15 કરોડ લોકોને લાગી શકે છે ઝટકો