ટીવી શો તારક મહેતા કા ઉલટા ચશ્મા (Taarak Mehta Ka Ooltah Chashmah) ઘણા વર્ષોથી લોકોના ચહેરા પર હાસ્ય લાવી રહ્યો છે. દરેક ઘરમાં આ શો સહકુટુંબ જોવાય છે. હવે આ શોને એનિમેટેડ સીરીઝમાં ફેરવવામાં આવી રહ્યો છે. એપ્રિલમાં સોની સબ એનિમેટેડ સીરીઝ બતાવશે.જેમાં લોકપ્રિય પાત્રો જેઠાલાલ, દયા, બાપૂજી અને ટપુ એન્ડ કંપનીને પાછા એક શાનદાર અવતારમાં બતાવાશે. સોનીએ તાજેતરમાં જ આ ખુલાસો કર્યો છે.
શોનો પ્રોમો વીડિયો સોનીએ ઇન્સ્ટાગ્રામ પર શેર કર્યો હતો, જેમાં ટપુ, જેઠાલાલ, દયાબેન, બાબુજી અને શોના બીજા કેરેકટર્સને એનિમેટેડ અવતારમાં બતાવાયા હતા. આ શો 2008માં પહેલીવાર પ્રસારિત થયો હતો અને ત્યારથી તે ટેલીવિઝન પર સફળતાપૂર્વક ચાલી રહ્યો છે.
આ શોમાં ગોકુલધામ સોસાયટીમાં રહેનારા પરિવારો દર્શાવાયા છે જ્યાં બધા ધર્મો તેમજ સંપ્રદાય એક સાથે રહે છે. પોતાની દિન-પ્રતિદિનની સમસ્યાઓ સાથે મળીને હાસ્ય સાથે હલ કરે છે.
આ સીરિયલમાં દિલીપ જોશી, દિશા વાકાણી, શૈલેષ લોઢા અને મુનમુન દત્તા જેવા કલાકારો કામ કરે છે.
