આગામી વર્ષ 2023માં વિશ્વના ઘણા દેશોએ મંદીની સ્થિતિનો સામનો કરવો પડી શકે છે. ઇન્ટરનેશનલ મોનેટરી ફંડના ચીફ ક્રિસ્ટાલિના જ્યોર્જીએવાએ આ ચેતવણી આપી છે. તેમણે કહ્યું કે આવતા વર્ષે ત્રીજા ભાગના દેશોએ બે ત્રિમાસિક ગાળા માટે મંદીની સ્થિતિ સમાન પડકારોનો સામનો કરવો પડી શકે છે. તેમણે કહ્યું કે IMF આવી સ્થિતિમાં તેના આર્થિક અંદાજોને ઘટાડવાની તૈયારી કરી રહ્યું છે.
IMF અને વિશ્વ બેંકની વાર્ષિક બેઠક પહેલા ક્રિસ્ટાલિના જ્યોર્જિવાએ કહ્યું હતું કે લોકોની આવકમાં ઘટાડો અને મોંઘવારી વધવાનો અર્થ એ છે કે ઘણા દેશો મંદીનો સામનો કરશે. IMF ચીફના આ નિવેદનો પરથી અનુમાન લગાવવામાં આવી રહ્યું છે કે તેઓ ચોથા ક્વાર્ટર માટે આર્થિક અંદાજમાં ઘટાડો કરી શકે છે.
યુક્રેન પર રશિયાના હુમલા, ઊર્જાના ઊંચા ભાવ અને ખાદ્યપદાર્થોના ઊંચા ભાવને કારણે ફુગાવાનું દબાણ વધી રહ્યું છે. તેમણે કહ્યું કે વિશ્વની તમામ મોટી અર્થવ્યવસ્થાઓના વિકાસની ગતિ ધીમી પડી રહી છે. તેમણે કહ્યું હતું કે ટૂંકા ગાળામાં પરિસ્થિતિ ખરાબથી ખરાબ થઈ જશે. ચીનના પ્રોપર્ટી માર્કેટમાં સર્જાઈ રહેલા નાણાકીય જોખમ અંગે પણ ચિંતા વ્યક્ત કરી છે.
IMF માને છે કે ફુગાવાને પહોંચી વળવા માટે વિશ્વભરની કેન્દ્રીય બેંકોએ કડક નાણાકીય નીતિનું પગલું ચાલુ રાખવું જોઈએ. તેમણે કહ્યું કે મોંઘી ખાદ્ય ચીજોની મોટી અસર ઉભરતી અર્થવ્યવસ્થાઓ પર જોવા મળી રહી છે, જેના કારણે આ દેશો પર દેવાનું સંકટ વધી રહ્યું છે. ક્રિસ્ટાલિના જ્યોર્જીએવાએ કહ્યું કે વૈશ્વિક અર્થવ્યવસ્થા પર જે આ સંકટ આવ્યું છે તે કાયમ રહેવાનું નથી.
