દમાસ્કસઃ સીરિયા પર હવે બંદૂકધારી બળવાખોરોએ નિયંત્રણ મેળવી લીધું છે. રવિવારે ચોંકાવનારા સમાચાર સામે આવ્યા છે. વિદ્રોહીઓએ રાજધાની દમાસ્કસ અને સરકારી ટીવી નેટવર્ક પર કબજો કરી લીધો છે. રોઇટર્સ અનુસાર, રાષ્ટ્રપતિ બશર અલ-અસદ દેશ છોડી ગયા છે. તેઓ પ્લેનમાં બેસીને અજાણ્યા સ્થળે જવા રવાના થયા. આ સાથે જ વિદ્રોહીઓએ સેનાને આત્મસમર્પણ કરવાની ચેતવણી પણ આપી છે.
હયાત તહરિર અલ શામ (HTS) નામના જૂથ દ્વારા બળવાખોરોને એક કરવામાં આવ્યા હતા. આ જૂથના વડા અબુ મોહમ્મદ અલ જોલાની છે, જેમણે રાષ્ટ્રપતિ બશર અલ-અસદને દેશ છોડવા માટે દબાણ કર્યું હતું. તમામ બંદૂકધારી બળવાખોર જોલાનીના નિર્દેશ પર કામ કરી રહ્યા છે.
સીરિયામાં આ જૂથ લાંબા સમયથી સરકાર સામે લડી રહ્યું છે, જેના કારણે હવે રાષ્ટ્રપતિ બશરને ઘૂંટણિયે પડવાની ફરજ પડી છે. આ આતંકવાદી જૂથ અગાઉ અલકાયદા સાથે સંકળાયેલું હતું. 2016માં આ સંગઠને તેનાથી પોતાને અલગ કરી લીધા હતા. એચટીએસના વડા હાલમાં જોલાની છે, જેમને અત્યંત કટ્ટરવાદી માનવામાં આવે છે. પશ્ચિમી દેશોએ HTSને આતંકવાદી સંગઠન જાહેર કર્યું છે.
બાળપણ દમાસ્કસમાં વીતાવ્યું
ઇસ્લામિક નેતા જોલાનીએ પોતાને આધુનિક હોવાનો દાવો કર્યો છે. જોલાનીએ ઘણી વખત કહ્યું છે કે અલકાયદાથી અલગ થવાનો હેતુ સીરિયામાંથી બશર સરકારને ખતમ કરવાનો હતો. જોલાનીનો જન્મ 1982માં થયો હતો. તેમનું પ્રારંભિક જીવન રાજધાની દમાસ્કસના માજેહ વિસ્તારમાં વિત્યું હતું. તેમનો પરિવાર મૂળ ગોલ્ડન હાઇટ્સ વિસ્તારનો છે. જોલાનીના કેટલાક ઇન્ટરવ્યુ સામે આવ્યા છે, જેમાં તેણે દાવો કર્યો છે કે તેના દાદા ગોલ્ડન હાઇટ્સથી ભાગી ગયા હતા અને 1967માં માજેહ આવ્યા હતા. તે સમયે આ જગ્યા ઈઝરાયેલના કબજા હેઠળ હતી.
જોલાનીએ 6 ડિસેમ્બરે સીએનએનને એક ઈન્ટરવ્યુ આપ્યો હતો. જેમાં તેણે દાવો કર્યો હતો કે તેના સંગઠનનો એકમાત્ર ઉદ્દેશ્ય સીરિયામાંથી બશાદ શાસનને ઉથલાવી દેવાનો છે. તે ધ્યેય હાંસલ કરવા માટે તેઓ તેમની શક્તિમાં બધું જ કરશે. 2016 પછી, જોલાનીએ પોતાને એક ઉદારવાદી નેતા તરીકે વિશ્વ સમક્ષ રજૂ કર્યા. પરંતુ અમેરિકાએ તેને વોન્ટેડ આતંકવાદી જાહેર કર્યો છે. ઘણા પશ્ચિમી દેશો તેની વિરુદ્ધ છે.
આ પણ વાંચો: સીરિયા: દમાસ્કસમાં બળવાખોરોની તોપો ગર્જના કરી રહી છે, કબજા માટે લોહિયાળ યુદ્ધ ચાલી રહ્યું છે
આ પણ વાંચો: સીરિયામાં હાહાકાર મચાવનાર તહરિર અલ-શામ છે શું?
