શેરબજારમાં નવા વર્ષના આરંભમાં ઘટાડા બાદ બજારમાં ફરી રીકવરી જોવા મળી રહી છે. આજે સેન્સેક્સ ખુલતાની સાથે જ 72 હજાર પોઈન્ટને અને નિફ્ટી 21,700 પાર કરી ગયો છે. અગાઉ, વર્ષની શરૂઆત બજાર માટે સારી રહી ન હતી અને પ્રથમ દિવસથી જ બજાર સતત નુકસાન સહન કરી રહ્યું હતું. જો કે ગુરુવારથી બજાર પુનરાગમન કરવામાં સફળ રહ્યું. ગુરુવારના દિવસથી બજાર ફરી ગ્રીન નિશાન સાથે ટ્રેડ થઈ રહ્યું છે જે આજે સપ્તાહના છેલ્લા દિવસે પણ ચાલુ છે. શુક્રવારના ટ્રેડિંગમાં બંને મુખ્ય સૂચકાંકો BSE સેન્સેક્સ અને NSE નિફ્ટીએ મજબૂત શરૂઆત કરી છે.
સેન્સેક્સ અને નિફ્ટીમાં તેજી
સેન્સેક્સ અને નિફ્ટીએ આજે લગભગ 0.40 ટકાના વધારા સાથે ટ્રેડિંગ શરૂ કર્યું. બજાર ખુલતાની સાથે જ સેન્સેક્સ ફરી એકવાર 72 હજારના આંકને પાર કરી ગયો. સવારે 9.20 વાગ્યે સેન્સેક્સ 250 પોઈન્ટના વધારા સાથે 72,100 પોઈન્ટની નજીક ટ્રેડ થઈ રહ્યો હતો. નિફ્ટી 50 ઈન્ડેક્સ લગભગ 70 પોઈન્ટના વધારા સાથે 21,725 પોઈન્ટને પાર કરી ગયો હતો.
પ્રી-ઓપન સેશનમાં સ્થાનિક બજારો ગ્રીન ઝોનમાં ટ્રેડ થઈ રહ્યા હતા. BSE સેન્સેક્સ લગભગ 170 પોઈન્ટના વધારા સાથે 72 હજાર પોઈન્ટને પાર કરી ગયો હતો. જ્યારે NSEનો નિફ્ટી 50 પ્રી-ઓપન ટ્રેડમાં લગભગ 50 પોઈન્ટ મજબૂત હતો અને 21,700 પોઈન્ટને પાર કરી ગયો હતો. સવારે ગિફ્ટ સિટીમાં નિફ્ટી ફ્યુચર લગભગ ફ્લેટ હતું.
બજારમાં તેજીનું પુનરાગમન
આ પહેલા ગુરુવારે બજારમાં હરિયાળી પાછી આવી હતી. ગુરુવારના ટ્રેડિંગના અંતે સેન્સેક્સ 490.97 પોઈન્ટ મજબૂત થઈને 71,847.57 પર હતો. નિફ્ટી 50 પણ 141.25 પોઈન્ટ અથવા 0.66 ટકા વધીને 21,658.60 પોઈન્ટ પર બંધ થયો હતો. તે પહેલા નવા વર્ષમાં બજારમાં સતત ઘટાડો જોવા મળી રહ્યો હતો. આ વર્ષના પ્રથમ સપ્તાહમાં બજાર અત્યાર સુધી લગભગ સ્થિર છે.
આ વર્ષની શરૂઆતથી વૈશ્વિક બજાર પર દેખાતું દબાણ હજુ પણ યથાવત છે. ગુરુવારે પણ અમેરિકન બજારો ખોટમાં હતા. વોલ સ્ટ્રીટ પર, ડાઉ જોન્સ ઈન્ડસ્ટ્રીયલ એવરેજ લગભગ સ્થિર રહી અને 37,440 પોઈન્ટ પર બંધ થયો. જ્યારે ટેક ફોકસ્ડ ઈન્ડેક્સ નાસ્ડેક કમ્પોઝીટ ઈન્ડેક્સ 0.56 ટકા અને S&P 500 0.34 ટકા ઘટ્યો હતો. સવારે સેન્સેક્સના 5 શેર સિવાય બાકીના તમામ શેર ગ્રીન ઝોનમાં હતા. વિપ્રો, SBI, મહિન્દ્રા એન્ડ મહિન્દ્રા જેવા શેર લગભગ 1% જેટલા વધ્યા હતા. બીજી તરફ નેસ્લે ઈન્ડિયા દોઢ ટકા તૂટ્યો હતો. સન ફાર્માના શેર પણ એક ટકાથી વધુ તૂટયા હતા.
