Silver Van Accident Palghar: મુંબઈ-અમદાવાદ નેશનલ હાઈવે પર આજે એક અજીબ અને મોટી દુર્ઘટના સર્જાઈ હતી. મુંબઈથી ગુજરાત તરફ આવી રહેલી ચાંદીની ઈંટોથી ભરેલી એક વેન અચાનક પલટી ગઈ હતી. આ વેનમાં અંદાજે 600 કિલો ચાંદી લદાયેલી હતી, જેની બજાર કિંમત ₹17.66 કરોડથી વધુ હોવાનું કહેવાય છે. કરોડોની ચાંદી રસ્તા પર હોવાના સમાચાર મળતા જ હાઈવે પર ભારે અફરાતફરી મચી ગઈ હતી.

Palghar: જાણો કેવી રીતે સર્જાઈ ઘટના?

આ ઘટના પાલઘર જિલ્લાના ચારોટી ફ્લાયઓવર પર બની હતી. પોલીસના જણાવ્યા અનુસાર, ચાંદીની ખેપ મુંબઈની ‘નાકોડા બુલિયન કંપની’ થી ગુજરાતના વાપી GIDC સ્થિત એક કંપનીમાં જઈ રહી હતી. જ્યારે વેન ફ્લાયઓવર પર પહોંચી ત્યારે ડ્રાઈવરે કાબૂ ગુમાવતા વેન જોરદાર રીતે પલટી ગઈ હતી. સદનસીબે ડ્રાઈવરને સામાન્ય ઈજાઓ પહોંચી છે, પરંતુ રસ્તા વચ્ચે વેન પલટતા ટ્રાફિક જામ થયો હતો.

પોલીસે સ્થળ પર કિલ્લેબંધી કરી

વેનમાં કરોડોની ચાંદી હોવાથી લૂંટ કે કોઈ અનિચ્છનીય ઘટના ન બને તે માટે પોલીસે તાત્કાલિક ઘટનાસ્થળને ઘેરી લીધું હતું. લોકોની ભીડ ચાંદીની ઈંટો જોવા માટે ઉમટી પડી હતી, જેને કાબૂમાં કરવા માટે પોલીસે વધારાનો બંદોબસ્ત ગોઠવવો પડ્યો હતો. તમામ ચાંદીની ઈંટો સુરક્ષિત પેકિંગમાં હોવાથી તેને કોઈ નુકસાન થયું નથી અને ત્યારબાદ પોલીસની હાજરીમાં જ તમામ માલને બીજી સુરક્ષિત ગાડીમાં શિફ્ટ કરવામાં આવ્યો હતો.

ટ્રાફિક જામ અને તપાસ

દુર્ઘટનાને કારણે હાઈવે પર વાહનોની લાંબી કતારો લાગી ગઈ હતી. પોલીસે ક્રેનની મદદથી પલટી ગયેલી વેનને હટાવીને થોડા કલાકો બાદ વાહનવ્યવહાર સામાન્ય કરાવ્યો હતો. હાલ પોલીસ એ તપાસ કરી રહી છે કે આ અકસ્માત ડ્રાઈવરની બેદરકારીને કારણે થયો કે વાહનમાં કોઈ ટેકનિકલ ખામી સર્જાઈ હતી.

આ પણ વાંચો: અમદાવાદ-મુંબઈ હાઈવે પર બે લકઝરી બસ ટકરાતા બેના મોત, 15થી વધુ ઘાયલ

આ પણ વાંચો: મુંબઈ-અમદાવાદ હાઈવે પર જ્યાં સાયરસ મિસ્ત્રીની કાર ટકરાઈ એ જ જગ્યાએ આ વર્ષે 62 લોકોના મોત

આ પણ વાંચો: નવસારીમાં નેશનલ હાઇવે નંબર 56 નો એક ભાગ બેસી જતા વાહન વ્યવહાર પ્રભાવિત,