હિમાચલ પ્રદેશમાં 5.0 તીવ્રતાનો ભૂકંપ, ચંબા કેન્દ્રબિંદુ; અનેક જિલ્લાઓમાં અનુભવાયા આંચકા
Shimla News : શુક્રવારે રાત્રે હિમાચલ પ્રદેશમાં ભૂકંપ (Earthquake)ના જોરદાર આંચકા અનુભવાતા લોકોમાં ભયનો માહોલ સર્જાયો હતો. રાત્રે લગભગ 10:04 વાગ્યે આવેલા આ ભૂકંપની તીવ્રતા રિક્ટર સ્કેલ પર 5.0 નોંધાઈ હતી. ભૂકંપના આંચકા બે થી ત્રણ સેકન્ડ સુધી અનુભવાયા હતા.
મળતી માહિતી મુજબ, ભૂકંપનું કેન્દ્ર હિમાચલ પ્રદેશના ચંબા જિલ્લામાં હતું. ચંબા ઉપરાંત કાંગડા, મંડી, સોલન, હમીરપુર અને બિલાસપુર સહિતના વિસ્તારોમાં પણ ધરતી ધ્રુજતા લોકો ઘરની બહાર દોડી આવ્યા હતા. જોકે, હાલ સુધી કોઈ જાનહાનિ કે સંપત્તિને નુકસાન થયાના અહેવાલ પ્રાપ્ત થયા નથી.
લોકોમાં ભયનો માહોલ
રાત્રિના સમયે આવેલા ભૂકંપ (Earthquake)ના કારણે ઘણા વિસ્તારોમાં લોકો ઊંઘમાંથી જાગી ગયા હતા. કેટલાક સ્થળોએ રહેવાસીઓ સાવચેતીના ભાગરૂપે ઘરની બહાર ખુલ્લા મેદાનમાં એકત્રિત થયા હતા. સ્થાનિક પ્રશાસન પરિસ્થિતિ પર સતત નજર રાખી રહ્યું છે.
હિમાચલ કેમ છે ભૂકંપ માટે સંવેદનશીલ?
હિમાચલ પ્રદેશ દેશના સૌથી વધુ ભૂકંપ (Earthquake) સંવેદનશીલ વિસ્તારોમાંનો એક ગણાય છે. રાજ્યનો મોટો ભાગ સિસ્મિક ઝોન-5 હેઠળ આવે છે, જે અત્યંત જોખમી શ્રેણી માનવામાં આવે છે. આ કારણે રાજ્યમાં સમયાંતરે નાના અને મધ્યમ તીવ્રતાના ભૂકંપ નોંધાતા રહે છે.
ભૂકંપ કેમ આવે છે?
વિજ્ઞાનીઓના જણાવ્યા અનુસાર પૃથ્વીની સપાટી અનેક ટેક્ટોનિક પ્લેટોથી બનેલી છે. આ પ્લેટો સતત ગતિશીલ રહે છે. જ્યારે બે પ્લેટો એકબીજા સાથે અથડાય છે અથવા સરકે છે ત્યારે ભારે દબાણ સર્જાય છે. આ દબાણ અચાનક મુક્ત થતાં ઊર્જા બહાર આવે છે અને ધરતી ધ્રુજે છે, જેને આપણે ભૂકંપ તરીકે અનુભવીએ છીએ.
ભૂકંપ સમયે સતર્ક રહેવું અને સુરક્ષા માર્ગદર્શિકાનું પાલન કરવું ખૂબ જ જરૂરી છે. નિષ્ણાતો લોકોને ગભરાવાની જગ્યાએ સાવચેતી રાખવાની સલાહ આપે છે.
