Gujarat News : ગુજરાતમાં છેલ્લા કેટલાક દિવસોથી વરસાદે (Rain)વિરામ લીધો હતો, પરંતુ હવે બંગાળની ખાડીમાં સક્રિય બનેલા મજબૂત લો પ્રેશર એરિયા અને રાજસ્થાન ઉપર સર્જાયેલા સાયક્લોનિક સર્ક્યુલેશન (Cyclonic Circulation)ની અસર રાજ્યમાં ફરી જોવા મળી રહી છે. શુક્રવારે રાજ્યના અનેક વિસ્તારોમાં વાતાવરણમાં અચાનક પલટો આવ્યો અને સુરત તેમજ ભાવનગર સહિત ઘણા શહેરોમાં મેઘરાજાએ જોરદાર એન્ટ્રી કરી.
હવામાન વિભાગના જણાવ્યા અનુસાર હાલમાં રાજ્યમાં ભારે વરસાદ (Rain)જેવી કોઈ ચેતવણી નથી, પરંતુ આગામી 23 જુલાઈ સુધી મોટાભાગના જિલ્લાઓમાં હળવાથી મધ્યમ વરસાદ અને ગાજવીજ સાથે છૂટાછવાયા ઝાપટાં ચાલુ રહેવાની શક્યતા છે.
સુરતમાં ધોધમાર વરસાદથી ફરી પાણી ભરાવાની આશંકા
સુરત શહેરમાં લગભગ એક સપ્તાહથી વધુ સમય બાદ ફરી મેઘરાજાએ ધમાકેદાર બેટિંગ શરૂ કરી. વેસુ સહિત શહેરના અનેક વિસ્તારોમાં વીજળીના કડાકા સાથે ભારે વરસાદ (Rain)વરસતા રસ્તાઓ પર પાણી ભરાવા લાગ્યા હતા.
અગાઉ સુરતમાં ભારે વરસાદ (Surat Heavy Rain)દરમિયાન શહેરના અનેક નીચાણવાળા વિસ્તારો જળબંબાકાર બન્યા હતા. તેથી આજે શરૂ થયેલા વરસાદને લઈને નાગરિકોમાં રાહત સાથે ચિંતા પણ જોવા મળી રહી છે કે ફરી અગાઉ જેવી સ્થિતિ સર્જાઈ શકે છે.
બીજી તરફ લાંબા સમયથી ચાલી રહેલી અસહ્ય ગરમી અને બફારાથી લોકોને મોટી રાહત મળી છે. ખેડૂતોમાં પણ વરસાદને કારણે પાક માટે આશાનું કિરણ જોવા મળી રહ્યું છે.
ભાવનગરમાં બે કલાકમાં દોઢ ઈંચ વરસાદ
ભાવનગર શહેરમાં પણ લાંબા વિરામ બાદ વરસાદે (Bhavnagar Rain)ધમાકેદાર હાજરી નોંધાવી. બપોરે માત્ર બે કલાકના સમયગાળામાં અંદાજે 35 મિમી (દોઢ ઈંચ) વરસાદ નોંધાતા અનેક રસ્તાઓ પર પાણી ફરી વળ્યા હતા.
જિલ્લાના તમામ તાલુકાઓમાં વરસાદ થયો ન હતો. શહેર ઉપરાંત માત્ર ઘોઘા અને જેસરમાં વરસાદ નોંધાયો, જ્યારે વલ્લભીપુર, ઉમરાળા, સિહોર, ગારીયાધાર, પાલીતાણા, તળાજા અને મહુવા સહિતના વિસ્તારો કોરાધાક રહ્યા.
રાજ્યમાં હજુ પણ સામાન્ય કરતાં 31 ટકા ઓછો વરસાદ
રાજ્યમાં ચોમાસાની શરૂઆતથી અત્યાર સુધી સરેરાશ વરસાદની સ્થિતિ હજુ સંતોષકારક કહી શકાય તેવી નથી.
અત્યાર સુધીના આંકડા મુજબ
- રાજ્યમાં કુલ 170 મિમી વરસાદ નોંધાયો
- સામાન્ય વરસાદ 245 મિમી હોવો જોઈએ
- એટલે કે રાજ્યમાં હજુ પણ લગભગ 31 ટકા વરસાદની ઘટ છે.
વિસ્તારવાર સ્થિતિ પણ ચિંતાજનક છે.
- ગુજરાત રીજનમાં લગભગ 25 ટકા વરસાદ ઓછો નોંધાયો છે.
- સૌરાષ્ટ્ર અને કચ્છ વિસ્તારમાં વરસાદની ઘટ લગભગ 38 ટકા સુધી પહોંચી છે.
આગામી દિવસોમાં ક્યાં પડશે વરસાદ?
હવામાન વિભાગે આગામી દિવસો માટે વરસાદ અંગે નીચે મુજબની આગાહી કરી છે.
17 જુલાઈ
દક્ષિણ ગુજરાતના સુરત, નવસારી, વલસાડ અને વડોદરા સહિતના વિસ્તારો તેમજ સૌરાષ્ટ્રના કેટલાક જિલ્લાઓમાં હળવાથી મધ્યમ વરસાદની શક્યતા છે. ઉત્તર ગુજરાત, અમદાવાદ, ગાંધીનગર અને કચ્છમાં છૂટાછવાયા વરસાદી ઝાપટાં પડી શકે છે.
18 થી 20 જુલાઈ
સમગ્ર ઉત્તર ગુજરાત, દક્ષિણ ગુજરાત, સૌરાષ્ટ્ર અને કચ્છમાં ગાજવીજ સાથે હળવાથી મધ્યમ વરસાદ (Rain)ની સંભાવના રહેશે.
21 થી 23 જુલાઈ
દક્ષિણ ગુજરાતમાં વરસાદનું પ્રમાણ થોડું વધવાની શક્યતા છે. જ્યારે ઉત્તર ગુજરાત, સૌરાષ્ટ્ર અને કચ્છમાં હાલ જેવી સ્થિતિ યથાવત રહેવાની સંભાવના છે.
ભારે વરસાદ (Rain)નું કોઈ એલર્ટ નથી
હાલની સ્થિતિ મુજબ રાજ્યમાં આગામી દિવસોમાં ભારે વરસાદ અથવા પૂર જેવી સ્થિતિ સર્જાય તેવી શક્યતા નથી. હવામાન વિભાગે માછીમારો કે સામાન્ય જનતા માટે કોઈ રેડ અથવા ઓરેન્જ એલર્ટ જાહેર કર્યું નથી.
લો પ્રેશર એરિયા એટલે શું?
લો પ્રેશર (Low Pressure Area)એરિયા એટલે જમીન નજીક હવાનું દબાણ ઘટી જવું. ગરમ હવા ઉપર જતાં નીચે ખાલી જગ્યા બને છે, જેને ભરવા માટે ભેજવાળી હવા ઝડપથી પહોંચે છે. આ ભેજવાળી હવા વાદળો બનાવે છે અને વરસાદની તીવ્રતા વધે છે. જો આ સિસ્ટમ વધુ મજબૂત બને તો આગળ જઈને વાવાઝોડાનું સ્વરૂપ પણ ધારણ કરી શકે છે.
સાયક્લોનિક સર્ક્યુલેશન શું છે?
સાયક્લોનિક સર્ક્યુલેશન (Cyclonic Circulation)વાતાવરણના ઉપરના સ્તરે સર્જાતું ગોળાકાર પવનચક્ર છે. આ ચક્ર આસપાસની ભેજને એકત્રિત કરે છે અને વરસાદી સિસ્ટમને મજબૂત બનાવે છે. ઘણીવાર આ જ પ્રક્રિયા આગળ વધીને લો પ્રેશર એરિયામાં પરિવર્તિત થાય છે અને ત્યારબાદ વરસાદનું પ્રમાણ વધી જાય છે.
