New Delhi News : ભારતમાં સુરક્ષા સંબંધિત ચિંતાઓ વચ્ચે Bluetooth આધારિત મેસેજિંગ એપ BitChat ફરી ચર્ચામાં આવી છે. ભૂતપૂર્વ ટ્વિટર (હવે X)ના CEO જેક ડોર્સી (Jack Dorsey)એ દાવો કર્યો છે કે ભારત સરકારે Microsoftની માલિકીની GitHubને BitChat એપ્લિકેશન દૂર કરવાનો આદેશ આપ્યો છે.
ડોર્સીએ સોશિયલ મીડિયા પ્લેટફોર્મ X પર એક નોટિસ શેર કરી હતી, જેમાં ગૃહ મંત્રાલય હેઠળ કાર્યરત Indian Cyber Crime Coordination Centre (I4C) દ્વારા GitHubને એપ હટાવવાનો નિર્દેશ આપવામાં આવ્યો હોવાનું દર્શાવવામાં આવ્યું છે.
શું છે સરકારની ચિંતા?
I4Cના જણાવ્યા મુજબ BitChat જેવી એપ્લિકેશનો Bluetooth Mesh Network દ્વારા કાર્ય કરે છે. આ એપ્લિકેશન ઇન્ટરનેટ, મોબાઇલ નેટવર્ક અથવા સેન્ટ્રલ સર્વર વગર નજીકના ડિવાઇસ વચ્ચે સીધો સંદેશાવ્યવહાર શક્ય બનાવે છે.
સરકારનું માનવું છે કે આવી ટેક્નોલોજીનો ઉપયોગ જાહેર અશાંતિ, રમખાણો, આતંકવાદ, સંગઠિત ગુના, ખોટી માહિતીના પ્રસાર તેમજ ઇન્ટરનેટ બંધ દરમિયાન પણ ગુપ્ત સંચાર માટે થઈ શકે છે.
તપાસમાં મુશ્કેલી
નોટિસમાં જણાવાયું છે કે BitChatમાં ફરજિયાત યુઝર રજિસ્ટ્રેશન, મોબાઇલ નંબર વેરિફિકેશન અથવા કેન્દ્રીય મેસેજ લોગિંગ જેવી વ્યવસ્થા નથી. તેના કારણે કાયદા અમલવારી એજન્સીઓને સંદેશાવ્યવહારની તપાસ, ઓળખ અને જરૂરી માહિતી મેળવવામાં મુશ્કેલી પડી શકે છે.
I4Cએ દાવો કર્યો છે કે આવી એપ્લિકેશન કાયદેસર રીતે લાગુ કરાયેલા નેટવર્ક પ્રતિબંધો દરમિયાન પણ સંદેશાવ્યવહાર ચાલુ રાખવાની સુવિધા આપે છે, જે સુરક્ષા એજન્સીઓ માટે પડકારરૂપ બની શકે છે.
જેક ડોર્સીનું નિવેદન
જેક ડોર્સીએ X પર પોસ્ટ કરીને જણાવ્યું કે, “ભારત સરકારને BitChat જેવી ટેક્નોલોજી પસંદ નથી અને તેને દૂર કરવા માંગે છે.” તેમણે 23 જુલાઈની તારીખ ધરાવતી નોટિસ પણ શેર કરી હતી.
જોકે, આ મુદ્દે I4C તરફથી સત્તાવાર જાહેર નિવેદન તાત્કાલિક ઉપલબ્ધ થયું નહોતું.
કયા કાયદાનો ઉલ્લેખ?
નોટિસ અનુસાર BitChat એપ સામે માહિતી પ્રૌદ્યોગિકી અધિનિયમ (IT Act)ની કેટલીક જોગવાઈઓ તેમજ ભારતીય ન્યાય સંહિતાની સંબંધિત કલમોના ઉલ્લંઘનનો ઉલ્લેખ કરવામાં આવ્યો છે. GitHubને એપ્લિકેશન સામે જરૂરી કાર્યવાહી કરવા સૂચના આપવામાં આવી હોવાનું જણાવાયું છે.
