New Delhi News : દેશની રાજનીતિ અને શિક્ષણ ક્ષેત્રે એક જ દિવસે બે મોટા નિર્ણયો સામે આવ્યા છે. એક તરફ કેન્દ્રીય રેલવે રાજ્યમંત્રી રવનીત સિંહ બિટ્ટુ (Ravneet Singh Bittu)એ પોતાના પદ પરથી રાજીનામું આપ્યું છે, જ્યારે બીજી તરફ નેશનલ ટેસ્ટિંગ એજન્સી (NTA)એ પરીક્ષા વ્યવસ્થામાં પારદર્શિતા લાવવા માટે 47 અધિકારીઓને તાત્કાલિક અસરથી બરતરફ કરી દીધા છે. બંને નિર્ણયો દેશભરમાં ચર્ચાનો વિષય બન્યા છે.
રવનીત સિંહ બિટ્ટુ (Ravneet Singh Bittu)નું રાજીનામું સ્વીકારાયું
રાષ્ટ્રપતિ દ્રૌપદી મુર્મુએ વડાપ્રધાન નરેન્દ્ર મોદીની સલાહ પર ભારતીય બંધારણની કલમ 75(2) હેઠળ કેન્દ્રીય મંત્રીપરિષદમાંથી રવનીત સિંહ બિટ્ટુનું રાજીનામું તાત્કાલિક અસરથી સ્વીકારી લીધું છે. રાષ્ટ્રપતિ ભવન દ્વારા જાહેર કરવામાં આવેલી સત્તાવાર માહિતી અનુસાર હવે તેઓ કેન્દ્રીય મંત્રી તરીકેની જવાબદારીમાં રહેશે નહીં.
પંજાબમાં મળશે નવી જવાબદારી?
રાજકીય સૂત્રોના જણાવ્યા મુજબ રવનીત સિંહ બિટ્ટુને આગામી પંજાબ વિધાનસભા ચૂંટણીને ધ્યાનમાં રાખીને મહત્વની જવાબદારી સોંપવામાં આવી શકે છે. તેઓ ચૂંટણીમાં મહત્વની બેઠક પરથી ઉમેદવારી નોંધાવે તેવી પણ ચર્ચા ચાલી રહી છે.
NTAનો કડક નિર્ણય
શિક્ષણ મંત્રાલયના સૂત્રોના જણાવ્યા મુજબ NTAએ પોતાની કાર્યપદ્ધતિમાં સુધારા લાવવા માટે 47 અધિકારીઓને નોકરીમાંથી બરતરફ કરી દીધા છે. કેટલાક અધિકારીઓ સામે કાનૂની તેમજ ફોજદારી કાર્યવાહી કરવાની પ્રક્રિયા પણ શરૂ કરવામાં આવી છે.
પેપર લીક બાદ સુધારાની શરૂઆત
તાજેતરના સમયગાળા દરમિયાન NEET સહિતની વિવિધ પરીક્ષાઓમાં પેપર લીક અને ગેરરીતિના આક્ષેપો બાદ NTA સતત વિવાદમાં રહી હતી. હવે એજન્સીની જવાબદારી વધુ મજબૂત બનાવવા માટે મોટા વહીવટી સુધારાઓ અમલમાં મૂકવાની પ્રક્રિયા શરૂ કરવામાં આવી છે.
CJPની માંગ યથાવત
‘કોકરોચ જનતા પાર્ટી’ (CJP)એ પેપર લીક કેસ માટે ફાસ્ટ-ટ્રેક કોર્ટ બનાવવાના નિર્ણયનું સ્વાગત કર્યું છે. જોકે પાર્ટીએ શિક્ષણ મંત્રી ધર્મેન્દ્ર પ્રધાનના રાજીનામાની માંગ ફરી દોહરાવી છે. ઉપરાંત NEET પેપર લીકના કારણે આત્મહત્યા કરનારા વિદ્યાર્થીઓના પરિવારોને એક-એક કરોડ રૂપિયાનું વળતર આપવા અને પ્રદર્શનકારીઓ સામેના કેસ પરત ખેંચવાની માંગ પણ કરી છે.
સરકાર સાથે બેઠક
CJPના પ્રતિનિધિમંડળે કેન્દ્રીય મંત્રી જે.પી. નડ્ડા અને જીતેન્દ્ર સિંહ સાથે મુલાકાત કરીને દિલ્હી પોલીસ દ્વારા વિદ્યાર્થીઓની અટકાયત અને વિરોધ પ્રદર્શન દરમિયાન થયેલી કાર્યવાહીની ફરિયાદ રજૂ કરી હતી. સરકારે જો આવી ઘટનાઓ બની રહી હોય તો તેને રોકવા માટે જરૂરી પગલાં ભરવાની ખાતરી આપી હોવાનું પ્રતિનિધિમંડળે જણાવ્યું છે.
