Pakistan Coal Mine Blast: પાકિસ્તાનના બલુચિસ્તાન પ્રાંતની રાજધાની ક્વેટા નજીક આવેલી કોલસાની ખાણમાં ગુરુવારે થયેલા ભયાનક વિસ્ફોટમાં ઓછામાં ઓછા 32 ખાણિયોના મોત થયા છે, જ્યારે 10 જેટલા ખાણિયો હજુ પણ ખાણની અંદર ફસાયેલા હોવાની આશંકા છે.
બલુચિસ્તાનના ખાણ અને ખનિજ વિકાસ મંત્રી શોએબ નોશેરવાનીએ જણાવ્યું કે, વિસ્ફોટ સમયે ખાણના ધસી પડેલા ભાગમાં કુલ 36 લોકો હાજર હતા. સરકારી ખાણ નિરીક્ષક ગની બલોચના જણાવ્યા અનુસાર, ખાણમાં મિથેન ગેસના જમા થવાના કારણે આ વિસ્ફોટ થયો હતો.
અધિકારીઓના જણાવ્યા પ્રમાણે, વિસ્ફોટ બાદ બચાવ ટીમોને ખાણમાંથી પ્રથમ તબક્કામાં 7 મૃતદેહ મળ્યા હતા, ત્યારબાદ વધુ 25 મૃતદેહો બહાર કાઢવામાં આવ્યા હતા. હાલ પણ બચાવ કામગીરી ચાલુ છે.
મિથેન ગેસના વિસ્ફોટ બાદ ખાણની અંદર ઓક્સિજનનું પ્રમાણ લગભગ શૂન્ય થઈ ગયું હોવાનું અધિકારીઓએ જણાવ્યું છે. જેના કારણે અંદર ફસાયેલા ખાણિયોને જીવતા બહાર કાઢવાની શક્યતા ખૂબ ઓછી હોવાનું કહેવાઈ રહ્યું છે.
પ્રાંતીય ખાણ નિરીક્ષકે જણાવ્યું કે, લગભગ 4,000 ફૂટ (1,219 મીટર) ઊંડાઈએ બચાવ અભિયાન ચાલી રહ્યું છે. તેમણે કહ્યું કે, “અમને આશા છે કે કેટલાક ખાણિયો જીવિત મળી શકે છે, પરંતુ તેની શક્યતા ઓછી છે.”
વરિષ્ઠ સરકારી ખાણકામ અધિકારી અબ્દુલ ગની બલોચે જણાવ્યું કે, મિથેન ગેસના શક્તિશાળી વિસ્ફોટથી એકબીજાની નજીક આવેલી બે કોલસાની ખાણોને નુકસાન થયું છે. હાલ બચાવ ટીમો ફસાયેલા ખાણિયોને શોધવા માટે સતત પ્રયાસ કરી રહી છે.
