Tech News : એલોન મસ્કની કંપની SpaceX એ અવકાશ ક્ષેત્રે વધુ એક ઐતિહાસિક સિદ્ધિ પોતાના નામે કરી છે. કંપનીએ પ્રથમ વખત પોતાના વિશાળ Starship અવકાશયાનને પૃથ્વી પર પરત ફરતી વખતે લોન્ચ ટાવરના વિશાળ મિકેનિકલ હાથની મદદથી હવામાં જ પકડી લીધું છે. આ અનોખી સફળતાને અંતરિક્ષ ટેક્નોલોજીના ક્ષેત્રમાં મહત્વપૂર્ણ પગલું માનવામાં આવી રહ્યું છે.
હવામાં જ પકડી લીધું Starship અવકાશયાન
SpaceX દ્વારા શેર કરવામાં આવેલા વીડિયોમાં જોવા મળે છે કે અવકાશમાં પોતાની સફર પૂર્ણ કર્યા બાદ Starship પૃથ્વી તરફ પરત ફરે છે. આ દરમિયાન લોન્ચ ટાવર પર લગાવવામાં આવેલા વિશાળ મિકેનિકલ હાથની મદદથી અવકાશયાનને સુરક્ષિત રીતે પકડી લેવામાં આવે છે.
આ ટેક્નોલોજીને Mechazilla (Mechazilla) નામ આપવામાં આવ્યું છે. આ સિસ્ટમમાં લોન્ચ ટાવર પર લગાવવામાં આવેલા બે વિશાળ મિકેનિકલ હાથનો ઉપયોગ કરવામાં આવે છે. જે રોકેટના પરત ફરતા ભાગને પકડીને તેને નિયંત્રિત રીતે રોકવામાં મદદ કરે છે.
SpaceXએ સોશિયલ મીડિયા પર શેર કર્યો વીડિયો
આ ઐતિહાસિક સફળતા બાદ SpaceXએ પોતાના સત્તાવાર X એકાઉન્ટ પર વીડિયો શેર કરીને ખુશી વ્યક્ત કરી હતી. કંપનીએ પોસ્ટમાં લખ્યું હતું કે, ‘મેકાઝિલાએ સ્ટારશિપને પકડી લીધું! આ શાનદાર સિદ્ધિ બદલ સમગ્ર SpaceX ટીમને અભિનંદન.’
કંપની દ્વારા શેર કરવામાં આવેલા આ વીડિયોએ અવકાશ સંશોધન અને ટેક્નોલોજીમાં રસ ધરાવતા લોકોનું ધ્યાન ખેંચ્યું છે. આ સફળતા દર્શાવે છે કે ભવિષ્યમાં અવકાશયાનને ફરીથી ઉપયોગમાં લેવા માટે નવી ટેક્નોલોજી કેટલી મહત્વપૂર્ણ સાબિત થઈ શકે છે.
એલોન મસ્કે ટીમને આપ્યું શ્રેય
આ સિદ્ધિ અંગે એલોન મસ્કે પણ પ્રતિક્રિયા આપી હતી. એક યુઝરની પોસ્ટના જવાબમાં તેમણે કહ્યું કે, ‘તે ઐતિહાસિક દિવસ આવી ગયો છે અને તેનો શ્રેય SpaceXની અત્યંત પ્રતિભાશાળી ટીમને જાય છે.’
વોલ્ટર આઇઝેકસને પણ આ સિદ્ધિને માનવતા માટે અત્યંત મહત્વપૂર્ણ ગણાવી હતી. તેમણે ડિસેમ્બર 2020માં સ્ટારબેઝ ખાતે યોજાયેલી એક બેઠકનો ઉલ્લેખ કર્યો હતો. તેમના જણાવ્યા અનુસાર, તે સમયે એલોન મસ્કે એન્જિનિયરો સમક્ષ એવો વિચાર રજૂ કર્યો હતો કે લોન્ચપેડના વિશાળ હાથની મદદથી પરત ફરતા રોકેટને પકડી શકાય છે.
અવકાશયાત્રાના ભવિષ્ય માટે કેમ મહત્વપૂર્ણ છે આ સિદ્ધિ?
SpaceXની આ ટેક્નોલોજીનો મુખ્ય હેતુ અવકાશયાનના પુનઃઉપયોગને વધુ સરળ અને ઝડપી બનાવવાનો છે. સામાન્ય રીતે રોકેટ લોન્ચ થયા બાદ તેના કેટલાક ભાગો ફરીથી ઉપયોગમાં લેવા માટે અલગ પ્રક્રિયા કરવી પડે છે.
પરંતુ Mechazilla જેવી સિસ્ટમથી રોકેટના ભાગને લોન્ચ ટાવર પર જ પકડી શકાય છે. તેનાથી લેન્ડિંગ માટે જરૂરી વધારાની વ્યવસ્થા અને સમય ઘટાડવાની સંભાવના ઊભી થાય છે.આ સિદ્ધિ ભવિષ્યમાં ચંદ્ર અને મંગળ સુધીના મિશન માટે પણ મહત્વપૂર્ણ બની શકે છે. જોકે, આ ટેક્નોલોજીનો વ્યાપક ઉપયોગ કેટલો સફળ રહેશે તે આગામી પરીક્ષણો અને મિશન પર આધારિત રહેશે.
