બ્રેડા (નેધરલેંડ)
નેધરલેંડમાં રમાઈ રહેલી ચેમ્પિયન ટ્રોફીની ટુર્નામેન્ટમાં ભારતીય હોકી ટીમે વિજય સાથે પોતાની શરૂઆત કરી છે. પ્રથમ મેચમાં ભારતે કટ્ટર હરીફ અને ત્રણવારની વર્લ્ડ ચેમ્પિયન ટીમ પાકિસ્તાનને ૪-૦થી હરાવ્યું છે.
ભારતીય ટીમ માટે રમનદીપ સિહે ૨૫મી મિનિટમાં, માત્ર ૧૭ વર્ષના દિલપ્રીત સિંહે ૫૪મી, મંદીપ સિંહે ૫૭મી અને લલિત ઉપાધ્યાયે ૫૯મી મિનિટમાં ૧-૧ ગોલ કર્યા હતા. પ્રથમ હાફમાં માત્ર ૧ જ ગોલ કર્યો હતો, પરંતુ ત્યારબાદ બીજા હાફમાં ભારતીય ખેલાડીઓએ આક્રમક રમત દાખવતા ૩ ગોલ કર્યા હતા.
રમનદીપ સિંહે ભારતને અપાવી લીડ
ભારત અને પાકિસ્તાન વચ્ચેના મુકાબલાના પ્રથમ હાફમાં બંને ટીમો કોઈ ગોલ કરી શકી ન હતી, જયારે મેચનો બીજો હાફ પણ ગોલ રહિત જ પસાર થઇ રહ્યો હતો પારંતુ અંતિમ મિનિટોમાં રમનદીપ સિંહે ભારતીય ટીમ માટે પ્રથમ ગોલ કર્યો હતો. રમનદીપ સિંહે ગોલ હાફ ટાઈમના થોડાક સમય અગાઉ જ ૨૫મી મિનિટમાં આ ગોલ કર્યો હતો.
અંતિમ ૬ મિનિટમાં ભારતીય ટીમે કર્યા ૩ ગોલ
૨૫મી મિનિટમાં રમનદીપ સિંહના એક ગોલ બાદ ભારતીય ખેલાડીઓએ અંતિમ મિનિટોમાં આક્રમક રમત દાખવતા માત્ર ૬ મિનિટમાં જ ૩ ગોલ કર્યા હતા. ૧૭ વર્ષના દિલપ્રીત સિંહે ૫૪મીએ એક જોરદાર હિટ લગાવતા પાકિસ્તાનના ગોલ કીપરને ચકમો આપતા શાનદાર ગોલ કર્યો હતો અને ભારતને ૨-૦ની લીડ અપાવી હતી.
ત્યારબાદ મંદીપ સિંહે ૫૭મી ત્રીજો અને લલિત ઉપાધ્યાયે ૫૯મી મિનિટમાં એક ગોલ કરતા ભારતને ૪-૦ની લીડ હાંસલ કરાવી હતી.
પાકિસ્તાનનો ગોલ કરાયો રદ્દ
જયારે બીજી બાજુ હાફ ટાઈમમાં ૧-૦થી પાછળ રહ્યા બાદ પાકિસ્તાન દ્વારા ગોલની બરાબરી કરવાની કોશિશ કરી પરંતુ ભારતે રેફરલ માંગ્યા બાદ રેફરી દ્વારા ભારતીય ટીમના પક્ષમાં નિર્ણય આપ્યા બાદ પાકિસ્તાનના આ ગોલને રદ્દ કરવામાં આવ્યો હતો.
હોકીની ચેમ્પિયન ટ્રોફીમાં આ ૬ ટીમો વચ્ચે થાય છે ટક્કર
ચેમ્પિયન ટ્રોફીમાં દુનિયાની હોકીની ટોચની ૬ ટીમો રમતી હોય છે. આ વર્ષે દુનિયાની નંબર ૧ ટીમ ઓસ્ટ્રેલિયા, ઓલમ્પિક ચેમ્પિયન ટીમ આર્જેન્ટીના, ભારત, બેલ્જિયમ, પાકિસ્તાન અને યજમાન ટીમ નેધરલેંડ છે.
આ ટીમો વચ્ચે ભારતની થશે ટક્કર
કટ્ટર હરીફ પાકિસ્તાનને ૪-૦થી હરાવ્યા બાદ ભારતીય ટીમ આગળના મુકાબલામાં ૨૪ જૂનના રોજ આર્જેન્ટીના, ૨૭ જૂને ઓસ્ટ્રેલિયા, ૨૮ જૂને બેલ્જિયમ અને ૩૦ જૂનના રોજ નેધરલેંડ સામે ટકરાશે.