શહેરના પોશ વિસ્તારોમાં મોટા ભાગે સોસાયટી અને બંગ્લોઝની સુરક્ષા માટે ખાનગી સિક્યુરિટી ગાર્ડને તૈનાત કરવામાં આવે છે જેથી કરીને દિવસ અને રાત્રીના સમયગાળા દરમિયાન કોઈ અણબનાવ ન બને. આવા સિક્યુરિટી ગાર્ડ સાથે તેમના માલિકો કેવી રીતના વ્યવહારો કરે છે તે દર્શાવતો એક બનાવ અમદાવાદના આનંદ નગર વિસ્તારમાં ગઈ કાલે બન્યો હતો.

આનંદ નગરમાં સિક્યુરિટી ગાર્ડની નોકરી કરતા વ્યક્તિને તેની જ કંપનીના માલિકે ઢોર માર મારીને મોબાઈલ તોડી નાખવાની ફરિયાદ દાખલ થઇ છે. કેસની વિગત એવી છે કે આનંદ નગરમાં ઈશ્વર ચરણ એપાર્ટમેન્ટમાં સિક્યુરિટી ગાર્ડ તરીકે ફરજ બજાવતા રાજકુમાર મિશ્રા ગઈ કાલે રાત્રે 9 વાગે પોતાની ડયુટી ઉપર હાજર હતા. તે દરમિયાન તેમની શુભમ સિક્યુરિટી કંપનીના માલિક શ્રવણ દુબે તેમની પાસે આવ્યા હતા. નજીવી બાબતમાં માલિકે સિક્યુરિટી ગાર્ડ સાથે માથાકૂટ કરીને સિક્યુરિટી ગાર્ડને બેરહમી પૂર્વક માર મારીને તેમનો મોબાઈલ ફોન પણ તોડી નાખ્યો હતો. માલિકની દાદાગીરીથી ગભરાઈ ગયેલા સિક્યુરિટી ગાર્ડએ 100 નંબર ડાયલ કરીને પોલીસની ગાડી બોલાવી હતી. આનંદ નગર પોલીસે આરોપી શ્રવણ દુબેની સામે આઈપીસીની કલમ 323,294 (ખ), 506(2), 427 મુજબની ફરિયાદ નોંધીને કાયદેસરની કાર્યવાહી હાથ ધરી હતી.