ઓસ્ટ્રેલિયા ક્રિકેટ ટીમે રવિવારે 24 વર્ષ બાદ પાકિસ્તાનની ધરતી પર પગ મૂક્યો હતો. ત્રણ મેચની ટેસ્ટ શ્રેણી માટે કાંગારૂ ટીમ ચાર્ટર્ડ ફ્લાઈટમાં ઈસ્લામાબાદ પહોંચી ગઈ છે. આ પ્રવાસની શરૂઆત 4 માર્ચથી રાવલપિંડીમાં રમાનાર પ્રથમ ટેસ્ટ મેચથી થશે. ઓસ્ટ્રેલિયા ક્રિકેટ ટીમ માટે કડક સુરક્ષા વ્યવસ્થા કરવામાં આવી છે.

બે દાયકા બાદ ઓસ્ટ્રેલિયાની પાકિસ્તાનની આ પ્રથમ મુલાકાત છે. ઓસ્ટ્રેલિયન ક્રિકેટ ટીમે છેલ્લી વખત પાકિસ્તાનની ધરતી પર 1998માં સીરિઝ રમી હતી. તે સમયે, ત્રણ ટેસ્ટ મેચની શ્રેણી કાંગારૂઓએ 1-0થી જીતી હતી અને વનડે શ્રેણીમાં પણ પાકિસ્તાને 3-0થી ક્લીન સ્વીપ કર્યું હતું.

મેલબોર્નથી ચાર્ટર્ડ ફ્લાઇટમાં પહોંચેલા ઓસ્ટ્રેલિયન ખેલાડીઓમાં ટેસ્ટ કેપ્ટન પેટ કમિન્સ, વાઇસ-કેપ્ટન સ્ટીવ સ્મિથ, પાકિસ્તાનમાં જન્મેલા ઉસ્માન ખ્વાજા, સ્પિનર્સ એલ્ગર અને મિશેલ સ્વેપ્સન અગ્રણી હતા. ક્રિકેટ ઓસ્ટ્રેલિયાના ચીફ એક્ઝિક્યુટિવ ઓફિસર નિક હોકલી પણ ટીમની સાથે છે. તમામ ઓસ્ટ્રેલિયન ખેલાડીઓએ પ્રારંભિક ટેસ્ટ માટે તેમની પ્રેક્ટિસ ફરી શરૂ કરતા પહેલા કોવિડ પ્રોટોકોલ હેઠળ 24 કલાક માટે ક્વોરેન્ટાઇનમાં રહેવું પડશે.

ઓસ્ટ્રેલિયામાં વિશ્વના સૌથી કડક કોરોના નિયમો છે

ઓસ્ટ્રેલિયામાં કોરોનાના નિયમો વિશ્વમાં સૌથી કડક છે અને તેનું કડકપણે પાલન પણ કરવામાં આવી રહ્યું છે. કોરોના નિયમોની સખ્તાઈનો અંદાજ એ વાત પરથી લગાવી શકાય છે કે ઓસ્ટ્રેલિયાની ટેસ્ટ ટીમ ઈંગ્લેન્ડમાં 2019ની એશિઝ શ્રેણી બાદથી જ પોતાના ઘરેલું મેદાન પર રમી રહી છે. આ દરમિયાન ક્રિકેટ ઓસ્ટ્રેલિયાએ બાંગ્લાદેશ (મધ્ય 2020) અને દક્ષિણ આફ્રિકા (2021ની શરૂઆતમાં)નો નિર્ધારિત પ્રવાસ સ્થગિત કર્યો હતો.

ટેસ્ટ કેપ્ટન તરીકે પેટ કમિન્સનો આ પ્રથમ વિદેશી ટેસ્ટ પ્રવાસ છે. તે જ સમયે, ભૂતપૂર્વ મુખ્ય કોચ જસ્ટિન લેંગરની વિદાય પછી પણ આ ટીમનો પ્રથમ વિદેશ પ્રવાસ છે. લેંગરે આ મહિનાની શરૂઆતમાં મુખ્ય કોચ પદેથી રાજીનામું આપી દીધું હતું, ક્રિકેટ ઓસ્ટ્રેલિયા દ્વારા જારી કરાયેલી નવી કરારની શરતોથી નારાજ. વચગાળાના કોચ એન્ડ્રુ મેકડોનાલ્ડ હવે લેંગરની ગેરહાજરીમાં ટીમનું નેતૃત્વ કરી રહ્યા છે.

ઓસ્ટ્રેલિયાની સુરક્ષામાં 4,000 સુરક્ષાકર્મીઓ તૈનાત

લાંબા સમયથી પાકિસ્તાનમાં વિદેશી ટીમો સુરક્ષા કારણોસર પ્રવાસ કરવાથી દૂર રહી રહી છે. તાજેતરના વર્ષોમાં ન્યૂઝીલેન્ડ અને ઈંગ્લેન્ડના પાકિસ્તાન પ્રવાસ પણ રદ કરવામાં આવ્યા હતા. આવી સ્થિતિમાં પાકિસ્તાન આ પ્રવાસને લઈને કોઈ ભૂલ કરવાનું પસંદ નહીં કરે. મીડિયા રિપોર્ટ્સ અનુસાર, ઓસ્ટ્રેલિયાને તેમના પ્રવાસ માટે ‘હેડ ઓફ સ્ટેટ’ સ્તરની સુરક્ષા આપવામાં આવી છે. આ સુરક્ષા હેઠળ ઈસ્લામાબાદની હોટલ અને રાવલપિંડીના ક્રિકેટ સ્ટેડિયમની સુરક્ષા માટે લગભગ 4,000 પોલીસ અને સૈન્ય કર્મચારીઓને તૈનાત કરવામાં આવ્યા છે.

/ અમે સુરક્ષિત છીએ, લડતા શીખી રહ્યા છીએ : બોમ્બ બ્લાસ્ટ વચ્ચે ભારતીય વિદ્યાર્થીઓએ બતાવી હિંમત

/ યુક્રેનના 233 ટેન્ક, સશસ્ત્ર વાહનો, 28 એરક્રાફ્ટ સહિત મોટી સંખ્યામાં શસ્ત્રોનો કર્યો નાશ : રશિયન સંરક્ષણ મંત્રાલયનો દાવો