Mahakumbh 2025: ઉત્તર પ્રદેશના ગાઝીપુરમાં એક મોટી દુર્ઘટના થઈ છે. મહાકુંભના યાત્રાળુઓને લઈ જઈ રહેલા પીકઅપ વાહનને અકસ્માત નડ્યો હતો. તે દરમિયાન પાછળથી આવતા ડમ્પર લોકો પર દોડી ગયું હતું. આ અકસ્માતમાં 6 લોકોના મોત થયા હતા. 13 લોકો ગંભીર રીતે ઘાયલ છે જેમાંથી 5 લોકોને સામાન્ય ઈજાઓ છે.
મળતી માહિતી મુજબ, પીકઅપ ડ્રાઈવર મહાકુંભમાં સ્નાન કરીને પરત ગોરખપુર જઈ રહ્યો હતો. આ દરમિયાન વારાણસી-ગોરખપુર હાઈવે પર પીકઅપ ટ્રોલી તૂટી પડી હતી. જેના કારણે ટ્રોલી પર બેઠેલા 24 લોકો રસ્તા પર વેરવિખેર થઈ ગયા હતા. પાછળથી આવી રહેલા ડમ્પરે તેઓને કચડી નાંખતા તેમનું મોત નિપજ્યું હતું. મૃતકોમાં 2 મહિલા, 2 પુરૂષ અને 2 બાળકોનો સમાવેશ થાય છે. આ અકસ્માત નંદગંજ પોલીસ સ્ટેશન વિસ્તારના કુસામ્હી કલાન પાસે થયો હતો. પોલીસ ઘટનાસ્થળે પહોંચી ગઈ છે. ઘાયલોને હોસ્પિટલમાં લઈ જવામાં આવ્યા છે.
પોલીસે જણાવ્યું કે, પીકઅપમાં લગભગ 24 લોકો મુસાફરી કરી રહ્યા હતા. આ તમામ લોકો ગોરખપુરના બાંસગાંવ વિસ્તારના હલ્દીચક અને બલોચક ગામોના છે. ગુરુવારે બધા મહાકુંભમાં સ્નાન કરવા પ્રયાગરાજ ગયા હતા. શુક્રવારે પોતાના ગામ પરત ફરી રહ્યા હતા. વારાણસી-ગાઝીપુર ફોર લેન પર અચાનક પીકઅપ ટ્રોલી તૂટી ગઈ, જેના કારણે તેના પર સવાર લોકો નીચે પડી ગયા. પાછળથી એક ડમ્પર પૂરપાટ ઝડપે આવી રહ્યું હતું. તેણે હાઈવે પર પડેલા લોકોને કચડી નાખ્યા.
આ પણ વાંચો:વારાણસીમાં ગંગા નદીમાં બોટ પલટી, 60 શ્રદ્ધાળુઓ સવાર હતા
આ પણ વાંચો:કિન્નર અખાડામાં બળવો થતાં મમતા કુલકર્ણી મહામંડલેશ્વરના પદ પરથી બરખાસ્ત
