Ahmedabad News: અમદાવાદ મેટ્રો (Ahmedabad Metro) ઓથોરિટીએ અમદાવાદ અને ગાંધીનગરની વચ્ચે 83 કિમીના નવા રૂટની યોજના બનાવી છે. આ નવી યોજના હેઠળ, 9.5 કિમીના નવા રૂટ માટે ડીપીઆર તૈયાર કરવામાં આવી રહ્યો છે, જે હાલના પાલડી મેટ્રો સ્ટેશનને દાણીલીમડા, ગીતા મંદિર અને કાંકરિયા થઈને એપેરલ પાર્ક સાથે જોડશે. આ નવો રૂટ આગામી ચાર વર્ષમાં ₹2,850 કરોડના ખર્ચે બનાવવામાં આવશે.
આયોજન
આ ઉપરાંત 35.74 કિમી લાંબો ગોળાકાર મેટ્રો રૂટ ₹10,675 કરોડના ખર્ચે બનાવવામાં આવશે. અમદાવાદ મેટ્રો આ રૂટ વાસણા એપીએમસી સ્ટેશનથી શરૂ થશે, પીપલ્સ, નારોલ, સીટીએમ, બાપુનગર અને નરોડા થઈને જશે, અને પછી સિવિલ હોસ્પિટલ અને શાહીબાગ થઈને આરટીઓ સર્કલ પર હાલના સ્ટેશન સાથે જોડાશે. આ રૂટ માટે ડીપીઆર સરકારને સુપરત કરવામાં આવ્યો છે. શહેરને ધોલેરા એક્સપ્રેસવે, ગોધાવી સ્પોર્ટ્સ કોમ્પ્લેક્સ અને સાણંદ સાથે જોડતો એક નવો મેટ્રો રૂટ પણ આયોજન હેઠળ છે.
કનેક્ટીવિટી
હવે ગિફ્ટ સિટી (GIFT) એક્સ્ટેન્શનમાં જોઈએ તો તેને 3.33 કિ.મી.નું એકસ્ટેન્શન કરવામાં આવનાર છે. તેનો ખર્ચ રૂ. 1,067 કરોડ આવશે. તેના પછી એરપોર્ટને પણ મેટ્રો કનેક્ટિવિટી પૂરી પાડવામાં આવશે. તેમા 6.03 કિ.મી.નો રૂટ છે. તેનો ખર્ચ 2,194 કરોડ રૂપિયા આવશે. થલતેજ ગામથી ગોધાવી 7.7 કિ.મી.નો રૂટ છે અને તેનો ખર્ચ રૂ. 2,825 કરોડ આવશે.
ગોધાવી-સાણંદનો રૂટ આઠ કિ.મી.નો છે અને તેનો ખર્ચ 2,400 કરોડ આવશે તેમ મનાય છે. તેના પછી જીવરાજપાર્ક, નારોલ, નરોડા, સિવિલ, શાહીબાગ, આરટીઓનો સરક્યુલર રૂટ કરવામાં આવનાર છે. તેનું અંતર 35.74 કિ.મી.નું છે. તેનો ખર્ચ રૂ. 10,675 કરોડ આવશે. પાલડી-દાણીલીમડા-કાંકરિયામાં 9.5 કિ.મી.નો રૂટ વિકસાવવામાં આવનાર છે અને તેનો ખર્ચ રૂ. 2,850 કરોડ અંદાજાયો છે. આમ મેટ્રોના કુલ 82.75 કિ.મી.ના કામકાજનો ખર્ચ રૂ. 25,746 કરોડ અંદાજવામાં આવ્યો છે.
પ્રોજેક્ટ આગળ કઈ રીતે ધપશે ?
ગુજરાત સરકાર સરકારને સુપરત કરાયેલ ડીપીઆરને તેની મંજૂરી માટે કેન્દ્રીય શહેરી વિકાસ મંત્રાલયને મોકલાશે. શહેરી વિકાસ મંત્રાલય આ ડીપીઆરને તેના બજેટ ફાળવણી સાથે મંજૂરી આપે પછી, રૂટ પર કામ તાત્કાલિક શરૂ થશે. પાલડીથી એસટી સ્ટોપ અને એપેરલ પાર્કને જોડતા રૂટ માટેનો ડીપીઆર બે મહિનામાં તૈયાર થઈને ગુજરાત સરકારને સુપરત કરવામાં આવશે, ત્યારબાદ ઉપરોક્ત પ્રક્રિયા પછી આગામી છ મહિનામાં કામ શરૂ થવાની ધારણા છે.
