દિલ્હીમાં મંકીપોક્સના વધુ એક કેસની પુષ્ટિ થઈ છે. સત્તાવાર સૂત્રોએ જણાવ્યું કે રાષ્ટ્રીય રાજધાનીમાં રહેતો 35 વર્ષીય નાઈજિરિયન વ્યક્તિ મંકીપોક્સથી સંક્રમિત જોવા મળ્યો છે. તેણે તાજેતરમાં વિદેશ પ્રવાસ કર્યો નથી. દેશમાં મંકીપોક્સના અત્યાર સુધીમાં છ કેસ નોંધાયા છે. તેમાંથી દિલ્હીમાં બે કેસ અને કેરળમાં ચાર કેસની પુષ્ટિ થઈ છે.સૂત્રોએ જણાવ્યું કે મંકીપોક્સથી સંક્રમિત જોવા મળેલા નાઈજીરિયન વ્યક્તિને સરકારી એલએનજેપી હોસ્પિટલમાં દાખલ કરવામાં આવ્યો છે. LNJP આ ચેપની સારવાર માટે નોડલ હોસ્પિટલ છે.
સૂત્રોના જણાવ્યા અનુસાર, નાઈજિરિયન વ્યક્તિ છેલ્લા પાંચ દિવસથી તાવ સામે ઝઝૂમી રહ્યો છે અને તેના શરીર પર ફોલ્લીઓ છે. તેમણે કહ્યું કે આફ્રિકન મૂળના વધુ બે શંકાસ્પદ દર્દીઓને પણ એલએનજેપી હોસ્પિટલમાં દાખલ કરવામાં આવ્યા છે.આજે રાજસ્થાનમાં મંકીપોક્સ રોગનો પ્રથમ શંકાસ્પદ કેસ સામે આવ્યો છે. રાજસ્થાન યુનિવર્સિટી ઓફ હેલ્થ સાયન્સના સુપરિન્ટેન્ડેન્ટ ડૉ. અજીત સિંહે જણાવ્યું હતું કે મંકીપોક્સના શંકાસ્પદ લક્ષણો ધરાવતા યુવકને જયપુરની સરકારી હોસ્પિટલમાં દાખલ કરવામાં આવ્યો છે અને તેના નમૂનાઓ તપાસ માટે મોકલવામાં આવ્યા છે.
તેમણે જણાવ્યું કે મંકીપોક્સના શંકાસ્પદ લક્ષણોવાળા 20 વર્ષના યુવકને રવિવારે રાત્રે કિશનગઢથી અહીં મોકલવામાં આવ્યો હતો. તેમના જણાવ્યા અનુસાર, તેમને સંસ્થાના મંકીપોક્સની સારવાર માટે બનાવવામાં આવેલા વિશેષ વોર્ડમાં નિરીક્ષણ હેઠળ રાખવામાં આવ્યા છે અને તેમના નમૂનાઓ જયપુરની સવાઈ માનસિંહ હોસ્પિટલ અને પુણેની નેશનલ ઈન્સ્ટિટ્યૂટ ઓફ વાયરોલોજીમાં મોકલવામાં આવ્યા છે.કેરળ સરકારે આજે જાહેરાત કરી હતી કે 30 જુલાઈના રોજ મૃત્યુ પામનાર 22 વર્ષીય વ્યક્તિ મંકીપોક્સથી સંક્રમિત હતો.
