આસામમાં સત્તારૂઢ ભાજપને નાગરિક ચૂંટણીમાં પણ બમ્પર જીત મળી છે. આસામ રાજ્ય ચૂંટણી પંચ (ASEC) અનુસાર, ભાજપે આસામમાં મ્યુનિસિપલ બોર્ડની ચૂંટણીમાં કુલ 80 મ્યુનિસિપલ સંસ્થાઓમાંથી 77 પર કબજો કરીને જીત મેળવી છે. રાજ્યની મુખ્ય વિપક્ષી પાર્ટી કોંગ્રેસને ચૂંટણીમાં મોટો ઝટકો લાગ્યો છે અને તે અત્યાર સુધી એક પણ નાગરિક સંસ્થા જીતી શકી નથી. પાલિકાની ચૂંટણીનું પરિણામ આવવાનું બાકી છે.
રસપ્રદ વાત એ છે કે, મારિયાણી મ્યુનિસિપલ બોર્ડની કુલ 10 બેઠકોમાંથી, અપક્ષ ઉમેદવારોએ સાત બેઠકો જીતી હતી, જ્યારે બાકીની ત્રણ બેઠકો ભાજપે જીતી હતી. ASECએ કહ્યું કે પાંચ મ્યુનિસિપલ બોર્ડમાં કોઈને સ્પષ્ટ બહુમતી મળી નથી. ASECએ કહ્યું કે ભાજપને 672 વોર્ડમાં જીત મળી છે, જ્યારે કોંગ્રેસને 71 વોર્ડ મળ્યા છે. અન્ય 149 વોર્ડમાં જીત્યા છે. પંચના જણાવ્યા અનુસાર 57 વોર્ડમાં ઉમેદવારો બિનહરીફ ચૂંટાયા હતા.
પરિણામો પર ટિપ્પણી કરતા, આસામના મુખ્ય પ્રધાન હિમંતા બિસ્વા સરમાએ કહ્યું કે વિશાળ જનાદેશ વૃદ્ધિ અને વિકાસ માટે છે અને તે પાર્ટીને નવી જોશ સાથે પ્રગતિના એજન્ડાને આગળ ધપાવવા માટે પ્રેરિત કરશે. એક પછી એક ટ્વીટમાં તેમણે કહ્યું, “હું ભાજપના આસામ એકમના કાર્યકરો અને નેતાઓને અભિનંદન આપું છું, જેમણે આદરણીય વડાપ્રધાન નરેન્દ્ર મોદીના વિકાસના વિચારોનો અથાક પ્રચાર કર્યો.”
તેમણે કહ્યું કે, “હું ભાજપની આસામ એકમ અને તેના સાથી પક્ષોને નાગરિક સંસ્થાની ચૂંટણીમાં શાનદાર જીત અપાવવા બદલ રાજ્યના લોકોનો આભાર વ્યક્ત કરું છું.” કોંગ્રેસની કારમી હાર બાદ પાર્ટીના પ્રદેશ પ્રમુખ ભૂપેન કુમાર બોરાએ કહ્યું કે રાજકારણમાં ઉતાર-ચઢાવ એ સતત પ્રક્રિયા છે અને દરેક પક્ષે સારા અને ખરાબ સમયમાંથી પસાર થવું પડે છે.
તેમણે એક ટ્વિટમાં કહ્યું, “આપણે સારા સમય માટે સખત મહેનત કરવી પડશે અને તકની ધીરજપૂર્વક રાહ જોવી પડશે. હું મ્યુનિસિપલ બોર્ડના પરિણામોની જવાબદારી સ્વીકારું છું.” રાજ્યના 80 મ્યુનિસિપલ બોર્ડ માટે 6 માર્ચે પ્રથમ વખત ઈવીએમ દ્વારા મતદાન થયું હતું. આ ચૂંટણીઓમાં લગભગ 70 ટકા મતદાન નોંધાયું હતું.
