ભારતીય સંસ્કૃતિ અને અધ્યાત્મના ધામ સમા વિશ્વ પ્રસિદ્ધ અક્ષરધામ ના મંદિરના મહંત પૂજ્ય આનંદસ્વરૂપ સ્વામીએ ભગવાનના પ્રાસાદિક પુષ્પહાર પહેરાવી તેઓનું અભિવાદન કરી આશીર્વાદ પાઠવ્યા હતાં. ત્યારબાદ તેઓએ ભવ્ય અક્ષરધામ મંદિરમાં મંદિરમાં ભગવાન શ્રી સ્વામિનારાયણને પ્રાર્થના કરી હતી.
ભગવાનને પુષ્પાંજલિ અર્પણ કરી આશીર્વાદ મેળવ્યા હતા. નીલકંઠ અભિષેક મંડપમાં વૈદિક શાંતિપાઠના મંત્રોચ્ચાર સહિત તેઓએ ભગવાન શ્રી સ્વામિનારાયણના તપોમય સ્વરૂપ શ્રી નીલકંઠવર્ણી પર પવિત્ર જળાભિષેક કર્યો હતો. ત્યારબાદ અક્ષરધામના મંદિરના મહંત પૂજ્ય આનંદસ્વરૂપ સ્વામી તથા કોઠારી સંત પૂજ્ય વિશ્વવિહારી સ્વામી સાથે આધ્યાત્મિક વાર્તાલાપમાં જોડાયા હતા.
મુખ્યમંત્રી ભુપેન્દ્ર પટેલે આ પ્રસંગે અક્ષરધામના રચયિતા અને વિશ્વવિખ્યાત સંતવિભૂતિ પરમ પૂજ્ય પ્રમુખસ્વામી મહારાજની દિવ્ય સ્મૃતિઓ યાદ કરી તેમના પ્રત્યે આદર પ્રગટ કર્યો હતો. અને BAPS સંસ્થાના વર્તમાન અધ્યક્ષ પરમ પૂજ્ય મહંત સ્વામી મહારાજને વંદન પાઠવ્યા હતા.
સંતોએ માનનીય મુખ્યમંત્રી ભુપેન્દ્રભાઈ પટેલને આશીર્વાદ અને ભગવાનનો પ્રસાદ અર્પણ કર્યો હતો. અત્યંત વ્યસ્ત દૈનિક ક્રમ છતાં અક્ષરધામ મંદિરની યાત્રા દરમિયાન માનનીય મુખ્યમંત્રીએ ખૂબ પ્રસન્નતા, હળવાશ અને ભગવાનની દિવ્ય કૃપાનો અનુભવ કર્યો હતો.
