સમગ્ર વિશ્વ પ્રવર્તમાન સમયે કોરોના જેવી મહામારી સામે લડી રહ્યું છે ત્યારે કોરોના વોરિયર્સ ગણાતાં આરોગ્યકર્મીઓ, સફાઈકર્મીઓ, પોલીસકર્મીઓ, શિક્ષણકર્મીઓ ઉપરાંત અનેક નામી-અનામી સામાજીક સંસ્થાઓ લોકોની સુખાકારી માટે પોતાનું યોગદાન આપી રહ્યા છે.
હાલ ગામડામાં કોરોનાનું સંક્રમણ મોટા પ્રમાણમાં વધી રહ્યું છે.
એ વાતને ધ્યાનમાં લઇ સંક્રમિત લોકો ઝડપથી સાજા થાય, કોરોનાનો વ્યાપ અટકે અને સાથે જ લોકો સલામત રહે એવા ઉમદા ભાવ સાથે ઓલપાડ તાલુકાનાં વિજય પટેલ (સી.આર.સી.કો-ઓર્ડિનેટર, કરંજ) તથા તેમનાં ધર્મપત્ની કલ્પના પટેલ (ઉપશિક્ષિકા, ભટગામ પ્રાથમિક શાળા) એ આજરોજ પોતાની મેરેજ એનિવર્સરી નિમિત્તે ઓલપાડ સહિત આજુબાજુનાં ગામોમાં હોમ કવૉરોન્ટાઇન થયેલ જરૂરિયાતમંદ લોકોને આયુર્વેદિક કીટનું નિ:શુલ્ક વિતરણ કરી પોતાનો નાગરિક ધર્મ બજાવ્યો હતો.
જરૂરિયાતમંદોને નિઃશુલ્ક આયુર્વેદિક કીટનું વિતરણ કરીને સાચા અર્થમાં આ શિક્ષક દંપતિએ તેમની લગ્નતિથિને યાદગાર બનાવી હતી. વિવિધ ગામોનાં લાભાર્થી ભાઈ-બહેનોએ આ નિ:શુલ્ક કીટ મેળવી સંતોષ વ્યક્ત કર્યો હતો.
