લો કોલેજની વિદ્યાર્થી સાથે દુષ્કર્મ અને જાતીય શોષણ માટે ધરપકડ કરાયેલા પૂર્વ કેન્દ્રીય ગૃહ રાજ્ય મંત્રી સ્વામી ચિન્મયાનંદની જામીન અરજીને જિલ્લા અદાલતે નામંજૂર કરી હતી. આ સાથે ચિન્મયાનંદ પાસેથી રૂ .5 કરોડની માંગનાં કેસમાં આરોપી સંજય, સચિન અને વિક્રમની જામીન અરજી પણ રદ કરવામાં આવી હતી. વળી કોર્ટે આ કેસમાં પીડિત વિદ્યાર્થીનીનાં આગોતરા જામીન માટેની અરજી સ્વીકારી છે. કોર્ટે આ કેસમાં આગામી 26 મી સપ્ટેમ્બરની તારીખ આપી છે. આપને જણાવી દઇએ કે અગાઉ ઈલાહાબાદ હાઈકોર્ટે પીડિત વિદ્યાર્થીનીનાં આગોતરા જામીનને ધ્યાનમાં લેવાનો ઇનકાર કર્યો હતો.
23 સપ્ટેમ્બરનાં રોજ સ્વામી ચિન્મયાનંદને અચાનક બિમારીનાં કારણે લખનઉમાં એસજીપીજીઆઇમાં દાખલ કરવામાં આવ્યા હતા. મંગળવારે ચિન્મયાનંદની તબિયતમાં સુધારો થયો હતો. તેમના બધા મહત્વપૂર્ણ અંગો સામાન્ય રીતે કાર્યરત છે. ડૉકટરોનાં જણાવ્યા મુજબ, જો સ્થિતિ સારી રહી તો તેમને બે દિવસમાં સંસ્થામાંથી રજા આપવામાં આવશે. અગાઉ વિશેષ તપાસ ટીમે પીડિતાની અટકાયત કરી તેની પૂછપરછ કરી હતી. આ કેસમાં એસઆઈટી દ્વારા પકડાયેલા બે આરોપી વિક્રમ અને સચિનને રિમાન્ડ પર લેવામાં આવ્યા છે. એસઆઈટી બંનેને રાજસ્થાન લઈ જવાની તૈયારીમાં છે. જાણવા મળ્યું છે કે એસઆઈટી રાજસ્થાનમાં ફેંકી દેવાયેલા બંને મોબાઇલની પણ પૂછપરછ કરશે.
જાતીય શોષણ અને બ્લેકમેઇલિંગ કેસની તપાસ કરી રહેલા એસઆઈટીનાં વડા નવીન અરોરાનાં જણાવ્યા અનુસાર બ્લેકમેઇલ કરવા મામલામાં પીડિત વિદ્યાર્થીની પણ સામેલ હોવાની પૂરી સંભાવનાઓ છે. પુરાવા મળતાં તેની સામે કાર્યવાહી પણ કરવામાં આવશે. અગાઉ પીડિત વિદ્યાર્થીનીએ સોમવારે ધરપકડ પર પ્રતિબંધ મુકવા માટે ઈલાહાબાદ હાઈકોર્ટમાં અરજી કરી હતી. કોર્ટે પીડિતાનાં આગોતરા જામીનને ધ્યાનમાં લેવાની ના પાડી અને નીચલી અદાલતમાં અરજી આપવા કહ્યુ હતુ. જે બાદ પીડિતાએ શાહજહાંપુરની એડીજે પ્રથમ ની કોર્ટમાં આગોતરા જામીન અરજી કરી હતી, જેને કોર્ટે સ્વીકારી લીધી છે, આ કેસની સુનાવણી માટે આગામી 26 મી સપ્ટેમ્બરની તારીખ આપી છે.
નીચે આપેલી લીંક પર ક્લિક કરીને જોડાવ મંતવ્ય ન્યૂઝ સાથે…
તમે અમને ફેસબુક, ટ્વીટર, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.
લેટેસ્ટ ન્યૂઝ અપડેટ્સ આપના ફોન પર સૌથી ઝડપી મેળવવા માટે આજે જ ડાઉનલોડ કરો “મંતવ્ય ન્યૂઝ” ની નવી મોબાઇલ એપ્લિકેશન.
