National news : અમેરિકામાં ગેરકાયદે રહેતા ભારતીયોને પરત મોકલવાનો સીલસીલો ચાલું છે. જેમાં ડિપોર્ટ કરાયેલા લોકોની અલગ અલગ કહાની હોય છે.    ડંકી રૂટથી અમેરિકા પહોંચવાના ચક્કરમાં બે અલગ-અલગ દેશોમાંથી ડિપોર્ટ થયેલો અને રશિયાની જેલમાં પણ ત્રણ દિવસ કાઢનારો એક યુવક હાલ ઈન્ડિયામાં જેલની હવા ખાઈ રહ્યો છે. લુધિયાણાનો ગુરવિન્દર સિંઘ 69.40 લાખ રૂપિયા ખર્ચીને કઈ રીતે ત્રીજા પ્રયાસમાં અમેરિકા સુધી પહોંચવામાં સફળ તે રહ્યો પરંતુ ત્યાંથી ડિપોર્ટ થયો હતો અને તેની પહેલા તેને કયા રૂટ પરથી મેક્સિકો પહોંચાડવા એજન્ટોએ ટ્રાય કર્યો હતો તેની કહાની કોઈને પણ ચોંકાવી દે તેવી છે.

એક અખબારના અહેવાલ અનુસાર ગુરવિન્દરને ફેબ્રુઆરી 15ના રોજ અમેરિકાથી આવેલી ડિપોર્ટેશન ફ્લાઈટમાં પાછો મોકલવામાં આવ્યો હતો, તેના પાસપોર્ટ પર એડ્રેસ ઉત્તર પ્રદેશનું હતું અને ઈન્ડિયામાં તેની સામે લૂંટના ગુનામાં બિનજામીનપાત્ર વોરન્ટ ઈશ્યૂ થયેલા હતા.

ગુરવિન્દરની પત્નીએ તેની પાસેથી 69.40 લાખ રૂપિયા લઈને અમેરિકા ના પહોંચાડનારા પાંચ એજન્ટો સામે ફેબ્રુઆરી 18ના રોજ ફરિયાદ નોંધાવી હતી, જેમાં એવું જણાવાયું હતું કે તેને સૌ પહેલા કેન્યાના રસ્તેથી મેક્સિકો મોકલવામાં આવ્યો હતો પરંતુ કેન્યામાં જ તેને પકડી લઈને ડિપોર્ટ કરી દેવાયો હતો, જ્યારે બીજા પ્રયાસમાં તે રશિયાવાળી લાઈનથી અમેરિકા જવા નીકળ્યો હતો.

બેલારૂસથી ડિપોર્ટ કરાયેલા ગુરવિન્દરને રશિયામાં ત્રણ દિવસ જેલમાં રહેવું પડ્યું હતું અને પછી તે ઈન્ડિયા પાછો આવ્યો હતો. જોકે, ત્રીજા પ્રયાસમાં તે આખરે મેક્સિકો સુધી પહોંચી ગયો હતો પરંતુ તેને બોર્ડર ક્રોસ કરાવાઈ ત્યાં સુધીમાં અમેરિકામાં ટ્રમ્પની સરકાર આવી ચૂકી હતી. ગુરવિન્દરે જાન્યુઆરી 25ના રોજ બોર્ડર ક્રોસ કરી હતી પરંતુ તેને માત્ર 25 દિવસમાં જ ઈન્ડિયા પાછો મોકલી દેવાયો હતો.ગુરવિન્દરની પત્નીએ જે પાંચ એજન્ટો સામે ફરિયાદ નોંધાવી છે.

તેમાંથી એક દુબઈમાં રહે છે, પોતાની ફરિયાદમાં તેણે જણાવ્યું હતું કે ગુરવિન્દર ડિસેમ્બર 2023ના રોજ અમેરિકા જવા નીકળ્યો હતો અને ત્યારબાદ તે પહેલા કેન્યાથી અને પછી બેલારૂસથી ડિપોર્ટ કરાયો હતો. ગુરવિન્દર પર લુધિયાણામાં 2021માં રોબરી અને સ્નેચિંગના કેસમાં ફરિયાદ નોંધાઈ હતી જેમાં તેની સામે બિનજામીનપાત્ર વોરન્ટ નીકળ્યું હતું અને તેમાં જ તેની યુએસથી ડિપોર્ટ થયા બાદ ધરપકડ કરાઈ હતી.

પોલીસના જણાવ્યા અનુસાર ગુરવિન્દરે પહેલા તો વિદેશ જવા માટે IELTSની પરીક્ષા ક્લીયર કરી દીધી હતી અને ત્યારબાદ તેનો સંપર્ક ચરણજીત સિંઘ નામના એક એજન્ટ સાથે થયો હતો, જેણે ગુરવિન્દરને 35 લાખમાં અમેરિકા મોકલી દેવાનું કહ્યું હતું.જોકે, ગુરવિન્દર સામે ત્રણ પોલીસ કેસ થયેલા છે તેની ખબર પડતાં એજન્ટે ફેક ડોક્યુમેન્ટ્સના આધારે ગુરવિન્દરનો નવો પાસપોર્ટ કઢાવ્યો હતો જેમાં ઉત્તરપ્રદેશનું એડ્રેસ હતું. એક્સપ્રેસના રિપોર્ટ પ્રમાણે 2023માં ચરણજીત ગુરવિન્દરને લખનઉ લઈ ગયો હતો જ્યાં તેની મુલાકાત નિશાંત કુમર સાથે થઈ હતી. તે વખતે ચરણજીત અને નિશાંતે સવા લાખ રૂપિયામાં ગુરવિન્દરના ફેક આધાર કાર્ડ, વોટર કાર્ડ અને નવા પાસપોર્ટ કઢાવ્યા હતા. ચરણજીતે ડિસેમ્બર 2023માં પહેલીવાર ગુરવિન્દરને ટુરિસ્ટ વિઝા પર મુંબઈથી નાઈરોબી મોકલ્યો હતો અને તેના માટે સાડા બાર લાખ રૂપિયા કેશમાં લીધા હતા.

એજન્ટે ત્યારે એવું કહ્યું હતું કે ગુરવિન્દરને કેન્યાથી સુરિનામ, નિકારાગુઆ અને મેક્સિકો થઈને અમેરિકા મોકલી દેવાશે પરંતુ ગુરવિન્દર નાઈરોબીથી જ ડિપોર્ટ થઈ મુંબઈ પાછો આવ્યો હતો.માર્ચ 2024માં ચરણજીતે ગુરવિન્દરની મુલાાત સંદીપ કુમાર અને રવિન્દર દેઓલ નામના બીજા બે એજન્ટો સાથે કરાવી હતી, જેમણે 32 લાખ રૂપિયામાં ડીલ ફિક્સ કરી હતી તેમજ સાડા આઠ લાખ રૂપિયા એડવાન્સમાં લીધા હતા, તે વખતે ગુરવિન્દરને થાઈલેન્ડની ટ્રીપ પર મોકલવામાં આવ્યો હતો.

પોલીસ ફરિયાદમાં જણાવ્યા અનુસાર થાઈલેન્ડથી પાછા આવ્યા બાદ તેને મેક્સિકો મોકલવાનું કહીને એજન્ટે ફરી સાડા છ લાખ રૂપિયા લીધા હતા પરંતુ વાયા દુબઈ મેક્સિકો મોકલવાને બદલે તેને રશિયા રવાના કરાયો હતો.તે વખતે ગુરવિન્દર એજન્ટના કહ્યા અનુસાર નવ હજાર ડોલર કેશ લઈ ગયો હતો પરંતુ બેલારૂસની બોર્ડર ક્રોસ કરતી વખતે તે આર્મીવાળાના હાથમાં આવી ગયો હતો અને ત્યાંથી તેને રશિયા મોકલાયો હતો જ્યાં તેને ત્રણ દિવસ જેલમાં રખાયા બાદ ડિપોર્ટ કરાયો હતો. રશિયાથી પાછા આવ્યા બાદ ગુરવિન્દર ટુરિસ્ટ વિઝા પર અબુધાબી પહોંચ્યો હતો, ત્યારે એજન્ટે તેને બ્રાઝિલ મોકલવાના નામે વધુ બે લાખ રૂપિયા લીધા હતા પરંતુ બ્રાઝિલ જવાને બદલે ગુરવિન્દરને ફરી દિલ્હી લવાયો હતો.

અમેરિકા જવાના ત્રણ પ્રયાસ નિષ્ફળ રહેતા આખરે ગુરવિન્દર અને તેની પત્ની સતનામ સિંઘ નામના એક એજન્ટને મળ્યા હતા જેણે 32 લાખમાં ડીલ ફાઈનલ કરી હતી. સતનામે ગુરવિન્દરને ગુયાના સુધી પહોંચાડ્યા બાદ દસ લાખ લીધા હતા અને તે બ્રાઝિલ પહોંચ્યો ત્યાર પછી બીજા આઠ લાખ તેને ચૂકવવામાં આવ્યા હતા.બ્રાઝિલથી ગુરવિન્દર પનામાના જંગલોમાં થઈને ગ્વાટેમાલા અને ત્યાંથી ફાઈનલી મેક્સિકો પહોંચ્યો હતો.તેના મેક્સિકો ટચ થતાં જ એજન્ટે બીજા 13 લાખ રૂપિયા ગુરવિન્દરની પત્ની પાસેથી લઈ લીધા હતા,

જોકે જાન્યુઆરી 25ના રોજ ગુરવિન્દરે મેક્સિકો બોર્ડર ક્રોસ કરી તે સાથે જ તે બોર્ડર પેટ્રોલના હાથમાં આવી ગયો હતો અને તેને સીધો જેલમાં લઈ જવાયો હતો અને આખરે ફેબ્રુઆરી 15ના રોજ તેને ઈન્ડિયા ડિપોર્ટ કરાયો હતો. જોકે, ઈન્ડિયા પાછા આવતા જ તેની સામે જે જૂના વોરન્ટ પેન્ડિંગ હતા તેમાં તેની ધરપકડ થઈ હતી, ગુરવિન્દરના નકલી પાસપોર્ટ સહિતના ડોક્યુમેન્ટ્સની વ્યવસ્થા કઈ રીતે થઈ હતી તે પણ હાલ પોલીસ શોધી રહી છે.

આ પણ વાંચો: રેખા ગુપ્તા બનશે દિલ્હીના નવા CM, પ્રવેશ વર્મા ડે. સીએમ; આવતીકાલે લેશે શપથ

આ પણ વાંચો: સિદ્ધારમૈયાને મોટી રાહત, MUDA જમીન કૌભાંડ કેસમાં લોકાયુક્તે આપી ક્લીનચીટ

આ પણ વાંચો: કોણ બનશે દિલ્હીના સીએમ? આજે ભાજપ ધારાસભ્ય દળની બેઠકમાં થશે નિર્ણય, જાણો કોનું નામ છે સૌથી આગળ