નવી દિલ્હી: અવૈધ રેતી ખનન મામલે સીબીઆઈએ શનિવારે ઉત્તર પ્રદેશ અને દિલ્હીમાં 14 સ્થળો પર દરોડા પાડ્યા હતા. સીબીઆઈ દ્વારા IAS ચંદ્રકલા સહીત વરિષ્ઠ અધિકારીઓના મકાનો પર દરોડા પાડવામાં આવ્યા હતા. આ મામલામાં સીબીઆઈ દ્વારા IAS ચંદ્રકલાના લોકર અને બેંક એકાઉન્ટ સીઝ કરવામાં આવ્યા છે.

અવૈધ રેતી ખનન મામલે સીબીઆઈએ શનિવારે ઉત્તર પ્રદેશ અને દિલ્હીમાં 14 સ્થળો પર દરોડા પાડ્યા હતા. જેમાં અવૈધ રેતી ખનનની સામે અભિયાન ચલાવનાર મહિલા આઈએએસ અધિકારી બી. ચંદ્રકલા સહીત વરિષ્ઠ અધિકારીઓના ઘરે સીબીઆઈ દ્વારા દરોડા પાડવામાં આવ્યા હતા. સીબીઆઈએ ઉત્તર પ્રદેશના જાલૌન, હમીરપુર, લખનઉ, નોઈડા ઉપરાંત દિલ્હી સહીત અનેક સ્થળો પર દરોડા પાડવામાં આવ્યા હતા.

સીબીઆઈએ બીજી જાન્યુઆરીએ કરી હતી એફઆઈઆર

સીબીઆઈએ આ મામલામાં 11 સરકારી અને કેટલીક ખાનગી વ્યક્તિઓની સામે કેસ દાખલ કરવામાં આવ્યો હતો. હકીકતમાં 31-05-2012ના રોજ એક ટેન્ડર બહાર પાડવામાં આવ્યું હતું. જે ઈ-ટેન્ડર મારફત બહાર પાડવામાં આવ્યું ન હતું. જેના કારણે આ મામલાને કોર્ટ દ્વારા ઘણી ગંભીરતાથી લઈને સીબીઆઈને તપાસ સોંપવાનો નિર્દેશ કરવામાં આવ્યો હતો.

આજે સીબીઆઈને બે લોકરની જાણકારી મળી હતી. જેમાં એક નોઈડા અને એક લખનઉમાં મળ્યું છે. આ લોકરોમાંથી એક આઈએએસ બી. ચંદ્રકલા એન બીજું માઈનિંગ લીઝ હોલ્ડર આદિલ ખાનનું છે. આ મામલે સીબીઆઈ દ્વારા આઈએએસ બી. ચંદ્રકલાના એક લોકર અને બે બેંક એકાઉન્ટ સીઝ કરવામાં આવ્યા છે.

એફઆઈઆરના આધારે અખિલેશ યાદવની થઈ શકે છે પૂછપરછ

આ મામલામાં સીબીઆઈએ બીજી જાન્યુઆરીના રોજ એફઆઈઆર દાખલ કરી હતી. આ એફઆઈઆરમાં તત્કાલિન ખાણ ખનીજ મંત્રી ગાયત્રી પ્રજાપતિના નામનો પણ ઉલ્લેખ કરવામાં આવ્યો છે. જયારે એવા પણ સમાચાર છે કે, યુપીના પૂર્વ મુખ્યમંત્રી અખિલેશ યાદવના નામનો પણ આ એફઆઈઆરમાં ઉલ્લેખ હોવાની વાત સામે આવી રહી છે અને આ મામલામાં તેમની પણ પૂછપરછ કરવામાં આવી શકે છે.

જેને ત્યાં દરોડા પડ્યા છે તે આરોપીઓના નામ

મોઈનુદ્દીન (જિયોલોલિસ્ટ)

રમેશ કુમાર મિશ્ર (એમએલસી) અને દિનેશ કુમાર મિશ્ર (બંને ભાઈ છે)

અંબિકા તિવારી (હમીરપુર વતની)

રામાશ્રય પ્રજાપતિ (પૂર્વ ખનન કલાર્ક)

સંજય દીક્ષિત (બીએસપીમાંથી ચૂંટણી લડી ચૂક્યા છે)

સંજય દીક્ષિતના પિતા સત્યદેવ દીક્ષિત

સંજય દીક્ષિતની પત્ની (એફઆઈઆરમાં નામ નથી પણ તેને ત્યાં દરોડા પડ્યા)

રામ અવતાર સિંહ (સિનિયર કલાર્ક-જાલૌન)